Tingoýi 19 - Jaji ma Su-sungi

¹ Gena ḏua, ngoi to 'isene iḏingi sa'olo ngowa'a repe masala manga nyiwere da'u soroga tala 'aḏi poa'a, ma betongo so'o ne: “Puji re silamo'o Ma Jou'ongu Madutu, Unanga gena-ge nanga Jou'ongu Madutu re 'O sisalamata ngene. Unanga gena-ge 'O mulia re 'O kuasa,

² sababu Unanga 'ai hukumu 'i 'adili re banari. Unanga 'a singe-ngeta'a 'Ai hukumu toma limau Babel ga'a ma tero sa'olo we-were'a su-sudala, munanga ga'a mo su-sudala sigasa dungia 'i dadi cira. Ma Jou'ongu Madutu 'o sihukumu ngowa'a ga'a tegoro toma limau Babel gena-ge, sababu ananga gena-ge 'aḏi sisengene ananga ga'a ta Unanga ma tero sa'olo 'Ai budaka-budaka.”

³ Ḏua ngowa'a repe masala gena-ge 'aḏi kanau siduga-duga ḏi'i: “Puji re silamo'o Ma Jou'ongu Madutu. U'u ma loworo toma Limau Babel lamo'o gena-ge 'i tubolo kama togu-togumu ua.”

⁴ Ḏua ngowa'a bi-biri'i nga nyagi romoḏiḏi re nga ḏuata re makhluk rata ga'a 'aḏi sigoloḏi Ma Jou'ongu Madutu 'ai ḏe-ḏegoro 'aḏi mapagara manga biono tala re 'aḏi silamo'o re siḏubuso Ma Jou'ongu Madutu. Ananga 'aḏi kanau, “ 'Amin! Puji re silamo'o Ma Jou'ongu Madutu!”

Molo'ara ma laya di'a Doba ma Ngowa

⁵ Ḏua iḏingi ra Ma Jou'ongu Madutu 'ai ḏe-ḏegoro gena-ge ma betongo so'o ne: “Ngini mo-moini ga'a ta Ma Jou'ongu Madutu ma tero sa'olo 'Ai budaka-budaka, ngini gena-ge ni puji re silamo'o nanga Jou'ongu Madutu; ngini ga'a ni silamo'o re siḏubuso Unanga: bae ngowa'a ma pake ua bae ngowa'a la-lamo'o”

⁶ Gena ḏua, ngoi to 'isene iḏingi sa'olo ngowa'a repe masala manga nyiwere, ma iḏingi sa'olo duduala ma rurusu re ma tero sa'olo murasa 'i te'iri lai siḏi. Ngoi to 'isene ananga 'aḏi poa'a re 'aḏi kanau siduga-duga: “Puji re silamo'o Ma Jou'ongu Madutu! Sababu Ma Jou'ongu Madutu nanga Jou, Unanga ga'a 'Ai kuasa ma pari cua 'O parenta 'orasa nange-ne!

⁷ Ino, ngene wo maroanga re monere; re ino ngene wo puji re silamo'o 'Ai kabasarana. Sababu molo'ara ma laya di'a Doba ma Ngowa ma 'orasa ri ngadolo, re geri molo'ara we-were'a re mo ḏu-ḏuanga ḏua di'a simolo'ara.

⁸ Pakeanga lenan ga'a jama-jamanga sipula'a ḏua toma geri molo'ara we-were'a di'a mapake.” (Pakaeanga lenan gena-ge ma ngale: Ma Jou'ongu Madutu 'ai ngowa-ngowa'a manga ga'a 'i loasa re banari.)

⁹ Ḏua mala'ekata gena-ge 'o kanau ra ngoi, “Na lefo so'o ne: ‘Bara'utungu ngowa-ngowa'a sanga saele toma molo'ara ma laya di'a Doba ma Ngowa.’ ” Gena ḏua, mala'ekata gena-ge dogo kanau ḏi'i, “Gena-ge habari banari ra Ma Jou'ongu Madutu tala.”

¹⁰ Ngoi to mapagara 'ari biono tala toma mala'ekata gena-ge 'ai biono di'a to silamo'o re siḏubuso unanga. Mada'a unanga 'o kanau, “Ra ngoi awa! Awa no silamo'o re siḏubuso ngoi. Pa'i no silamo'o re siḏubuso Ma Jou'ongu Madutu ḇato! Sababu ngoi ḏi'i ta Unanga ma tero sa'olo 'Ai budaka ma tero ngana re ma tero 'ani ioronongoḏu ngo-ngaku rimoi ga'a 'aḏi macako'o namo-namoto do-doto'o ba-banari ga'a Yesus 'o pula'a pasala ḏua. Do-doto'o ba-banari gena-ge 'i sigaraki ngowa-ngowa'a di'a 'aḏi pula'a habari da'u ra Ma Jou'ongu Madutu tala.”

Jarana bu-buḏo ma Ga-gasa

¹¹ Gena ḏua, ngoi to oḏi'i soroga enanga 'i welanga, kara to oḏi'i ḏi'i jarana bu-buḏo rimoi. Ma Ga-gasa toma jarana gena-ge 'ai lomanga: 'A Setia re Banari. Unanga gena-ge 'o parangi re 'o sijuruhakimi ngowa-ngowa'a mete'e 'Ai 'adili.

¹² 'Ai la'o sa'olo u'u malejanga re Tai sae'e 'o pake lastari ma repe. Tai lese 'i silefo lomanga rimoi; pa'i Unanga masiretene ḇato 'a waro lomanga gena-ge ma ngale.

¹³ Juba ga'a unanga 'a pake sitono ḏua toma ngaunu re Unanga si'aro'o “Ma Jou'ongu Madutu 'ai 'Idini.”

¹⁴ Sordado-sordado soroga 'aḏi mete'e Unanga re 'aḏi palene jarana-jarana bu-buḏo re manga pakeanga ḇa'a lenan buḏo lai 'ofi.

¹⁵ Tai madanga ma dara 'i supu samaranga mangono ḇotu moi. Rai samaranga gena-ge Unanga ḏuanga i'a 'o sita'aloko Tai lawana toma bangsa-bangsa, kara Unanga 'o parenta ananga Rai didiki ḇesi. Dadi Unanga ḏuanga i'a 'o co'o 'anggur toma 'anggur ma jo-jo'o ma ngi'i. Gena-ge ma ngale: Unanga 'o siḏagi Ma Jou'ongu Madutu ga'a 'Ai kuasa ma pari cua, Unanga 'ai borata Tai lawana.

¹⁶ Tai juba re Tai busuu'u 'i silefo lomanga so'o ne: “ 'Olana toma 'olana mo-moini re Ma Jou toma tuanga mo-moini.”

¹⁷ Ḏua ngoi to oḏi'i mala'ekata matengo 'o made-de'oso toma wangere ma la'o, rai iḏingi lai siḏi madutu. Unanga 'o kanau i'a toma namo so-soloro toma diwanga ga'a oromo la-la'eme, “Ino, ni malomu di'a Ma Jou'ongu Madutu 'ai laya lamo'o!

¹⁸ Ino ni oromo 'olana-'olana, sordado-sordado ma sae'e re sordado-sordado manga la-la'eme. Ino, ni oromo ngowa-ngowa'a ga'a palene jarana re jarana-jarana ma la-la'eme. Ino, ni oromo 'umata manusia mo-moini manga la-la'eme: bae ngowa-ngowa'a ma pake ua, bae ngowa-ngowa'a la-lamo'o, bae budaka bolo ngowa'a bebasa!”

¹⁹ Gena ḏua, ngoi to oḏi'i haiwani ma mulaingi gena-ge re 'olana-'olana re manga sordado-sordado 'aḏi malomu re ma'u parangi Unanga ga'a 'o palene jarana bu-buḏo re 'Ai sordado-sordado.

²⁰ Mada'a haiwani gena-ge re nabi sa-sakala ga'a 'aḏi 'a'a didina'o heranga toma haiwani gena-ge ma biono, ananga gena-ge 'aḏi sanga cako'o. (Nabi sa-sakala 'o 'a'a didina'o heranga gena-ge, la 'o sihaga ngowa-ngowa'a ga'a remanga nana'o haiwani gena-ge re ngowa-ngowa'a ga'a 'aḏi silamo'o re siḏubuso dulada haiwani gena-ge.) Ḏua haiwani re nabi-nabi sa-sakala gena-ge 'aḏi siupa'a koro-koro toma ngoloto u'u ga'a rema walira leja-lejanga.

²¹ Re Unanga ga'a palene jarana bu-buḏo gena-ge 'O sisengene ananga manga sordado-sordado Rai samaranga ga'a 'i supu Tai madanga. Ḏua namo-namo toma diwanga matai sapolo ya oromo ananga manga la-la'eme singadolo wunusu.