Tingoýi 17 - Jaji ma Su-sungi

Limau lamo'o Babel ma tero sa'olo we-were'a su-sudala matengo

¹ Togumu i'a, mala'ekata matengo ga'a 'o gu'u-gu'u sawo'o rimoi toma mala'ekata nga tumudingi ma sigolona 'o sapolo ra ngoi re 'o kanau, “Ino, ngoi to sijumu ra ngana hukumu di'a limau lamo'o Babel ga'a co-cori ḇanyo lamo'o. Limau gena-ge ma tero sa'olo we-were'a su-sudala matengo.

² 'Olana-'olana toma dungia 'aḏi su-sudala reo we-were'a gena-ge re ngowa'a ga'a tegoro toma dungia 'aḏi dadi 'etolo sababu 'aḏi ka'e 'ami 'anggur. 'Anggur gena-ge ma ngale: Ga'a ma su-sudala.”

³ Ḏua Ma Ngagara 'Ofi-'Ofi ri ḏegoro ngoi, re mala'ekata gena-ge 'o gasa ngoi toma daeraha baulaco. Toma ngi'i gena-ge, ngoi to oḏi'i we-were'a matengo mo mabalene toma haiwani rimoi 'i ko-kolili madutu re ma lese 'i romanga rema demo-demo ga'a sije-jengere Ma Jou'ongu Madutu. Haiwani gena-ge ma sae'e tumudingi re ma tadu'u nyagi moi.

⁴ We-were'a gena-ge mo mapake baju 'ungu re ko-kolili madutu re mo mapake guraci, maḏi permata ma ijana hali-hali, re mutiara. Enanga gena-ge mo-moini 'i siromanga tami lese. Tami giama mo gu'u-gu'u sawo'o guraci 'i romanga ro 'anggur. 'Anggur gena-ge ma ngale: Ga'a ma kajahatana ma sowo'o su-sudala.

⁵ Tami memese 'i silefo rema lomanga rimoi ga'a rahasia. Lomanga gena-ge ma ngale: “Ngoi nena-ne Limau Babel Lamo'o, we-were'a su-sudala mo-moini manga ngina re ngowa'a su-sudala manga 'asala.”

⁶ Ḏua ngoi to oḏi'i we-were'a gena-ge mo etolo sababu remo ka'e Ma Jou'ongu Madutu 'ai ngowa-ngowa'a manga ngaunu. Ananga gena-ge ga'a 'aḏi macako'o namo-namoto ra Yesus singadolo 'aḏi sengene. Wakutu ngoi to oḏi'i we-were'a gena-ge, ngoi to heranga masala.

⁷ Ḏua mala'ekata gena-ge 'o kanau ra ngoi, “I'a sa'olo ngana no heranga? Maha ngoi to siajele rahasia romoḏiḏi ra ngana mangale we-were'a gena-ge, re haiwani ga'a munanga mo mabalene. Haiwani gena-ge ga'a ma sae'e tumudingi re ma tadu'u nyagi moi.

⁸ 'Ua re 'au wali, haiwani gena-ge 'i 'ahu, mada'a 'orasa nange-ne 'i sengene ḏua. Ngasamoi moju, enanga 'i supu toma ngabanga maut, kara Kristus 'a siwejere. Ngowa-ngowa'a toma dungia ga'a manga lomanga 'i silefo ua toma ngowa'a 'ahu-'ahu manga boku wakutu dungia 'i sidadi nyangu, ḏuanga i'a 'aḏi heranga na'o ya oḏi'i haiwani gena-ge. Sababu kalaha haiwani gena-ge 'ua re 'au wali 'i 'ahu re 'orasa nange-ne 'i sengene ḏua, enanga dadunu 'i baolo moju.

⁹ Toma mo-moini gena-ge paralu 'akala soro'unu re wo-waro. Sae'e tumudingi ma ngale: polono tumudingi ga'a we-were'a gena-ge mo tegoro. Re sae'e tumudingi gena-ge ḏi'i 'o 'olana nga tumudingi:

¹⁰ nga mutoara raḏi eta'a, matengo 'o parenta moju, re matengo ḏi'i 'o sapolo nyangu. Mada'a wakutu 'olana matengo gena-ge ḏuanga i'a 'o sapolo, 'o parenta ti'ara ua.

¹¹ Re haiwani ga'a 'ua re 'au wali enanga ri 'ahu, mada'a 'orasa nange-ne 'i sengene ḏua: gena-ge ma ngale 'olana ma nyo-nyoimi tu'angere. Unanga gena-ge ḏi'i osama nyo-nyoimi ra 'olana nga tumudingi, mada'a ma ḏo-ḏogumu unanga 'o tagi osama toma naraka.

¹² Tadu'u nyagi moi gena-ge ga'a ngana na oḏi'i ma ngale: 'Olana nga nyagi moi mada'a 'aḏi parenta nyangu. Mada'a ananga ḏuanga i'a sanga kuasa di'a 'aḏi parenta sa'olo 'olana mamete'e reo haiwani gena-ge ma di'ara pa'i jam rimoi.

¹³ 'Olana nga nyagi moi gena-ge, mo-moini manga maksudu 'i ma tero: Ananga mo-moini ya sidoa'a manga de-de'e re manga kuasa toma haiwani gena-ge.

¹⁴ Ananga ḏuanga i'a 'aḏi maparangi lawana Doba ma Ngowa. Mada'a Doba ma Ngowa 'i sita'aloko 'olana-'olana gena-ge sababu Doba ma Ngowa gena-ge Ma Jou toma tuanga mo-moini, re dadi 'Olana toma 'olana mo-moini. Re ḏi'i ngowa'a ga'a 'aḏi macako'o namo-namoto ra Yesus ga'a Ma Jou'ongu Madutu ya'u 'aro'o re ya'u cumutu ḏua, ananga gena-ge 'aḏi sanga 'utungu sababu 'aḏi mamete'e rema Doba ma Ngowa.”

¹⁵ Mala'ekata gena-ge 'o kanau ḏi'i, “Ḇanyo ga'a ngana na oḏi'i gena-ge we-were'a su-sudala 'ami ngi'i ma ngale: Ngowa'a toma dungia sitabi donga: toma bangsa mo-moini, toma nagara mo-moini, toma suku mo-moini re toma demo mo-moini.

¹⁶ 'Olana nyagi moi re haiwani gena-ge ga'a ngana na oḏi'i, ḏuanga i'a 'aḏi emono we-were'a su-sudala gena-ge. Ananga gena-ge ḏuanga i'a 'aḏi rabasa 'ori i'a rana mo-moini tami lese singadolo munanga mo wa-watolo. Ḏua ananga ya 'acingi 'ami lese re ya 'omo 'ami la-la'eme kara re ma jingianga ya tau'u.

¹⁷ Gena-ge 'i dadi sababu Ma Jou'ongu Madutu 'o sigaraki ḏua ananga manga 'akala re sinyingara di'a ya siḏagi Unanga 'ai maksudu. Dadi 'olana nga nyagi moi raḏi sidoa'a manga de-de'e toma haiwani gena-ge, la enanga ri parenta singadolo 'i dadi 'oru ga'a Ma Jou'ongu Madutu ro kanau ri sitotomo ḏua.

¹⁸ We-were'a su-sudala ga'a ngana na oḏi'i gena-ge mangale limau lamo'o ga'a 'i parenta 'olana mo-moini toma dungia.”