Tingoýi 16 - Jaji ma Su-sungi

Sawo'o tumudingi Ma Jou'ongu Madutu 'ai borata

¹ Ḏua ngoi to 'isene iḏingi siduga-duga ra Ma Jou'ongu Madutu 'ai Wala ma dara ino, kanau i'a toma mala'ekata tumudingi gena-ge, “Tagi na pa'ala sawo'o tumudingi ma dara, ga'a 'age Ma Jou'ongu Madutu 'ai borata toma dungia.”

² Mala'ekata ma mulaingi 'o tagi 'a pa'ala 'ai sawo'o ma dara toma dungia. Ḏua ngowa'a mo-moini toma dungia ga'a 'aḏi sanga ḏua nana'o haiwani gena-ge re ngowa'a ga'a 'aḏi silamo'o re siḏubuso dulada haiwani gena-ge, ananga mo-moini 'aḏi sanga si-siḏi bu'u ma jira.

³ Pasala i'a, mala'ekata ma nyo-nyoimi romoḏiḏi 'a pa'ala 'ai sawo'o ma dara toma ngoloto. Ḏua 'o ngoloto 'i dadi ma tero sa'olo ngowa'a senge-sengene manga ngaunu. Dadi makhluk mo-moini toma ngoloto 'i sengene mo-moini.

⁴ Gena ḏua, mala'ekata ma nyo-nyoimi ro'ange 'a pa'ala sawo'o ma dara toma ḇanyo ma lese re ḇanyo ma 'utu'u. Dadi ḇanyo mo-moini 'i dadi ngaunu.

⁵ Ḏua, ngoi to 'isene mala'ekata ga'a 'ai kuasa toma ḇanyo 'o kanau, “Ma Jou'ongu Madutu ga'a 'O 'Ofi-'Ofi ma pari cua, Ma Jou'ongu Madutu ga'a 'age nange-ne re toma 'ua re 'au wali! 'Ani hukumu ga'a siḏingoto toma dungia gena-ge 'i 'adili.

⁶ Sababu ananga ya sipa'ala ḏua 'Ani ngowa-ngowa'a re nabi-nabi manga ngaunu. Sababu gena-ge nange-ne, Ma Jou'ongu Madutu no si'a'a ananga 'aḏi ka'e ngaunu ḏi'i. Tero mode'e, ananga balasu sanga so'o gena!”

⁷ Ḏua ngoi to 'isene iḏingi toma tau'u jou-jou ma ngi'i ino ma betongo so'o ne: “Ya, Ma Jou ga'a Ma Jou'ongu Madutu, Unanga ga'a 'Ai kuasa ma pari cua, Unanga 'o singe-ngeta'a 'Ai hukumu gena-ge ga'a 'i 'adili re banari!”

⁸ Pasala i'a, mala'ekata ma nyo-nyoimi rata 'a pa'ala sawo'o ma dara toma wangere ma la'o. Dadi ngowa'a mo-moini na'o wangere ma la'o ya'u 'erese, ananga 'aḏi ro'u sababu ma sa-sau'u siḏi woḏi.

⁹ Ngowa'a ga'a 'aḏi ro'u toma wangere ma sa-sau'u, ananga gena-ge 'aḏi so-sowini Ma Jou'ongu Madutu 'ai lomanga ga'a 'o kuasa toma bahala mo-moini gena-ge. Kalaha ananga 'aḏi sanga bahala gena-ge, ananga 'aḏi maḏibo ua toma ngo'omo boloto, re ananga 'aḏi oḏu'u puji re silamo'o Ma Jou'ongu Madutu 'ai kabasarana.

¹⁰ Ḏua mala'ekata ma nyo-nyoimi romotoa 'a pa'ala sawo'o ma dara toma haiwani ma mulaingi ma ḏe-ḏegoro. Dadi haiwani ma pareta mo-moini 'i dadi hafu-hafu re manusia ya goḏi manga yai'i sababu sangisara siḏi woḏi.

¹¹ Ḏua ananga gena-ge 'aḏi so-sowini Ma Jou'ongu Madutu toma soroga sababu ananga manga bu'u-bu'u ma sa'ara siḏi woḏi. Mada'a ananga 'aḏi maḏibo ua toma ngo'omo boloto re ya sieanga i'a ua 'aḏi 'a'a 'ori i'a ma jira.

¹² Pasala i'a, mala'ekata ma nyo-nyoimi rarama 'a pa'ala 'ai sawo'o ma dara toma ḇanyo lamo'o, ma lomanga Efrat. Dadi ḇanyo gena-ge 'i dudungu singadolo 'olana-'olana toma wangere ma la'o ino nyengara 'aḏi tagi ya tola'a i'a.

¹³ Ḏua ngoi to oḏi'i roh ma jira ro'ange ma duhu sa'olo papa'a: Papa'a ngai moi 'i supu toma naga ma madanga, ngai moi toma haiwani ma madanga, re ngai moi ḏi'i toma nabi sa-sakala 'ai madanga.

¹⁴ Roh-roh ma jira ro'ange gena-ge 'i 'a'a didina'o heranga re 'i tagi toma 'olana-'olana toma dungia sitabi donga di'a 'i lomu ananga di'a 'aḏi maparangi toma wangere lamo'o. Gena-ge Ma Jou'ongu Madutu 'Ai wangere, Unanga ga'a 'Ai kuasa ma pari cua, wakutu Unanga 'o sijuruhakimi ngowa-ngowa'a mo-moini.

¹⁵ Ma Jou Yesus 'o kanau, “Na 'isene, Ngoi ḏuanga i'a to sapolo sa'olo ngowa'a to-tori'i. Bara'utungu ngowa'a ga'a ma'istiari tau-taunu re 'aḏi maḏu-ḏuanga ḏua manga pakeanga, la wakutu Ngoi ḏuanga i'a to sapolo ngowa'a gena-ge awa 'aḏi tagi mawa-watolo. Dadi ananga 'aḏi mara'a ua toma mandan manga biono.”

¹⁶ Pasala i'a roh-roh ma jira gena-ge 'i lomu 'olana-'olana toma ngi'i rimoi, toma demo 'Ibrani si'aro'o “Harmagedon.”

¹⁷ Gena ḏua, mala'ekata ma nyo-nyoimi tumudingi 'a pa'ala 'ai sawo'o ma dara toma ngawa-ngawa. Dadi to 'isene iḏingi lai siḏi ra Ma Jou'ongu Madutu 'ai ḏe-ḏegoro Tai wala ma betongo so'o ne: “Togumu ḏua!”

¹⁸ Ḏua 'i dadi ḇeḇelanga cawi-cawi re 'o murasa 'i te'iri ma'u sango-sangoro re 'o wusu siḏi madutu. Mulaingi wakutu Ma Jou'ongu Madutu 'o sidadi manusia singadolo nange-ne, sanga nyangu wusu ma siḏi so'o nena-ne.

¹⁹ Limau lamo'o Babel gena-ge 'i polongara dadi balangu ro'ange re toma nagara-nagara toma dungia sitabi donga ma limau-limau mo-moini 'i pinya'olo. Ḏua Ma Jou'ongu Madutu 'a si'elingi ie limau lamo'o Babel ma ngowa'a manga kajahatana. Dadi Unanga 'o si'a'a ananga gena-ge 'aḏi ka'e 'Ai 'anggur toma sawo'o. 'Ai 'anggur ma ngale: 'Ai borata 'i kekolo.

²⁰ Pulo re kie mo-moini 'i iranga.

²¹ Besa'a 'es lamo'o 'i 'uci: rimoi-rimoi ma ḏubuso kilo nyagi romotoa. Enanga 'i eta'a da'u diwanga tala be-be'ara ngowa-ngowa'a. Ḏua ananga 'aḏi so-sowini Ma Jou'ongu Madutu sababu bahala besa'a 'es gena-ge.