Tingoýi 14 - Jaji ma Su-sungi

Doba ma Ngowa re 'Ai ngowa-ngowa'a

¹ Gena ḏua, ngoi to oḏi'i Doba ma Ngowa 'o made-de'oso toma Kie Sion. Ngowa'a nga cala latu moi re cala nyagi rata re cala rata (144,000) 'aḏi mamete'e ra Unanga. Tamanga memese matengo re matengo gena-ge 'i silefo Doba ma Ngowa ma lomanga re ma Ḇaḇa 'ai lomanga ḏi'i.

² Ḏua ngoi to 'isene iḏingi da'u soroga tala sa'olo duduala ma rurusu re sa'olo murasa 'i te'iri lai siḏi. Ma iḏingi gena-ge ta 'isene sa'olo ngowa'a ḇisa-ḇisa kecapi 'aḏi ḇisa manga kecapi.

³ Ngowa'a nga cala latu moi re cala nyagi rata re cala rata (144,000) gena-ge 'aḏi manyanyi nyanyi su-sungi ra Ma Jou'ongu Madutu 'ai ḏe-ḏegoro ma biono re makhluk nga ḏuata re bi-biri'i—bi-biri'i ma biono, mo-moini ga'a sigoloḏi 'Ai ḏe-ḏegoro gena-ge. Nyanyi gena-ge matengo i'a mai ua nga'unu 'o manyanyi, ḏuga-ḏuga ananga nga cala latu moi re cala nyagi rata re rata (144,000) ḇato; ananga gena-ge ga'a raḏi salamata ḏua.

⁴ Ananga gena-ge ngowa-ngowa'a 'ofi-'ofi ma tero sa'olo na-nau'u waro 'oru nyangu sababu 'aḏi sebanga we-were'a nyangu. Ananga gena-ge mete-mete'e tau-taunu Doba ma Ngowa'a le'a ḇato, Enanga 'i tagi. Toma ngowa'a mo-moini manga sigolona, ananga gena-ge raḏi salamata sa'olo hasili ma jomolo ra Ma Jou'ongu Madutu re Doba ma Ngowa.

⁵ Soi moi i'a mai nyangu ananga raḏi sa-sakala ngowa'a re ananga kamanga faja ceka'a i'a mai ua.

Mala'ekata nga ḏu'ange

⁶ Ḏua ngoi to oḏi'i mala'ekata ma lelegu matengo 'o soloro kau'u toma diwanga. Mala'ekata gena-ge 'o gasa habari mangale barakati kasingado-ngadolo i'a di'a singadolo toma ngowa-ngowa'a dungia: Bangsa mo-moini, suku mo-moini, demo mo-moini re nagara mo-moini.

⁷ Mala'ekata gena-ge 'o kanau rai iḏingi siduga-duga: “Ni mojongo Ma Jou'ongu Madutu re ni puji re silamo'o 'Ai kabasarana, sababu ma 'orasa ri ngadolo di'a Ma Jou'ongu Madutu 'o sijuruhakimi manusia. Ni silamo'o re siḏubuso Unanga ga'a 'o sidadi 'ori i'a mo-moini: diwanga, tana'a, ngoloto re 'o ḇanyo ma utu'u mo-moini!”

⁸ Mala'ekata ma nyo-nyoimi romoḏiḏi 'o sidu'u mala'ekata ma mulaingi re 'o kanau, “Pinya'olo ḏua, limau lamo'o Babel 'i pinya'olo ḏua. Ngowa'a Babel 'aḏi si'a'a bangsa mo-moini 'aḏi dadi 'etolo reo 'anggur. Re 'anggur gena-ge ma ngale: 'Ori i'a mo-moini ga'a sibaolo nyafusu ma jira!”

⁹ Mala'ekata ma nyo-nyoimi ro'ange 'o sidu'u mala'ekata ma nyo-nyoimi romoḏiḏi nange-ge re 'o kanau rai iḏingi siduga-duga, “ 'A guna ḇato silamo'o re siḏubuso haiwani re dulada haiwani gena-ge, re sanga ḏua nana'o tamanga memese, bolo tamanga giama ma kuwiḏa,

¹⁰ ananga gena-ge ḏuanga i'a 'aḏi ka'e Ma Jou'ongu Madutu 'ai 'anggur borata sa'olo 'anggur mamaḏi ga'a 'a sidai'i ḏua toma 'anggur ma ngi'i kama capuru ceka'a i'a mai ua. Ananga mo-moini gena-ge ḏuanga i'a 'aḏi sanga sikisa toma u'u re walira toma mala'ekata-mala'ekata 'ofi-'ofi manga biono re Doba ma Ngowa ma biono ḏi'i.

¹¹ Ma loworo toma 'u'u ga'a sisikisa ananga, enanga 'i supu kama togumu ua. Lobi'i re wangere kasingado-ngadolo i'a, ananga basono sikisa sababu ananga ga'a silamo'o re siḏubuso ḏua haiwani re dulada haiwani gena-ge re tamanga memese rema nana'o silefo ḏua haiwani gena-ge ma lomanga.”

¹² Sababu gena-ge, Ma Jou'ongu Madutu 'ai ngowa-ngowa'a ga'a 'aḏi cufala mete'e Unanga 'ai parenta re 'aḏi macako'o namo-namoto ra Yesus, balasu 'aḏi tahana susa re sangisara reo 'akala ḇanyo.

¹³ Ḏua ngoi to 'isene iḏingi da'u toma soroga tala ma betongo, “Na lefo so'o ne: Mulaingi nange-ne, ngowa-ngowa'a 'aḏi sengene sababu 'aḏi mete'e Ma Jou, ananga gena-ge 'aḏi bara'utungu.” Ma Ngagara 'Ofi-'Ofi 'i kanau, “Tero mode'e, ananga 'aḏi munara kangela riwara sababu tantu ḏua ananga ḏuanga i'a sanga manga ngogele.”

Lomu ma hasili toma dungia

¹⁴ Gena ḏua, ngoi to oḏi'i kamo-kamo bu-buḏo. Toma kamo-kamo gena-ge ma re'u 'age sa'olo Manusia ma Ngowa'a Nau'u, Tai sae'e 'age rema lastari guraci re Tai giama 'age rema peḏa pale lai mangono.

¹⁵ Ḏua mala'ekata ma lelegu matengo 'o supu ra Ma Jou'ongu Madutu 'ai Wala re 'o kanau rai iḏingi siduga-duga ra Unanga toma kamo-kamo ma re'u nange-ge, “Dungia ri romu'u ḏua re 'utu'u ma 'orasa 'i ngadolo ḏua. Sababu gena-ge, na tede 'Ani giama re Na rari!”

¹⁶ Dadi Unanga ga'a 'o tegoro toma kakamo ma re'u 'O mulaingi 'O tede 'Ai peḏa pale re 'A sirari tala toma dungia, kara 'O lomu ma hasili.

¹⁷ Gena ḏua, ngoi to oḏi'i mala'ekata ma lelegu matengo 'o supu ra Ma Jou'ongu Madutu 'ai Wala toma soroga, 'a gu'u-gu'u ḏi'i peḏa pale lai mangono.

¹⁸ Togumu i'a, mala'ekata ma lelegu matengo ga'a 'o kuasa toma u'u 'o sapolo toma jou-jou ma ngi'i ino. Unanga 'o kanau rai iḏingi lai siḏi toma mala'ekata nange-ge ga'a gu'u-gu'u peḏa pale, “Na tede 'ani peḏa pale re no rado 'anggur ma sowo'o toma dungia, sababu ri romu'u!”

¹⁹ Ḏua mala'ekata gena-ge ga'a gu'u-gu'u peḏa pale 'o rado 'anggur ma sowo'o ga'a 'i romu'u ḏua, kara 'o siupa'a toma 'anggur ma jo-jo'o ma ngi'i: Gena-ge ma ngale Ma Jou'ongu Madutu 'ai borata ke-kekolo.

²⁰ 'Anggur ma sowo'o gena-ge ya co'o toma limau ma ḏuḏunu. Wakutu ya co'o enanga ma nganyi 'i supu ngaunu re 'uisi sa'olo ḇanyo ma lese: Ma giḏanga kilo latu ro'ange, re ma ngido co-cori metere romoḏiḏi.