Tingoýi 13 - Jaji ma Su-sungi

Haiwani rimoi ga'a 'i baolo toma ngoloto

¹ Gena ḏua, ngoi to oḏi'i haiwani rimoi 'i baolo toma ngoloto, enanga ma sae'e tumudingi re ma tadu'u nyagi moi toma tadu'u rema lastari mo-moini. Toma sae'e rimoi-rimoi 'i silefo lomanga rimoi ga'a sije-jengere Ma Jou'ongu Madutu.

² Haiwani gena-ge ga'a ngoi ta oḏi'i, enanga ma rupa sa'olo macan tutul, ma rou sa'olo beruang, ma madanga sa'olo singa, kara haiwani gena-ge naga ya sipula'a ma de-de'e re ma ḏe-ḏegoro, re kuasa lai lamo'o.

³ Haiwani ma sae'e tumudingi gena-ge, 'age ma sae'e rimoi rema nyaboto ma pari cua singadolo enanga sa'i sengene. Mada'a ma nyaboto gena-ge ri dadi la! Sababu gena-ge, ngowa'a toma dungia sitabi donga 'aḏi heranga singadolo ya mete'e haiwani gena-ge.

⁴ Re ananga ya silamo'o re siḏubuso naga gena-ge, sababu enanga reya pula'a kuasa toma haiwani gena-ge. Re ananga 'aḏi silamo'o re siḏubuso ḏi'i haiwani gena-ge. Ananga 'aḏi kanau, “Haiwani nena-ne ma pari cua! Matengo i'a mai ua nga'unu lawana enanga nena-ne!”

⁵ Ma Jou'ongu Madutu 'o si'a'a haiwani gena-ge nyengara 'i kanau ma demo-demo pa'i mahie ḇato re sije-jengere Unanga. Re ḏi'i Unanga 'o pula'a watasa toma haiwani gena-ge, la enanga nyengara 'i parenta ma di'ara ngara nyagi rata re romoḏiḏi.

⁶ Dadi enanga mulaingi 'i sije-jengere Ma Jou'ongu Madutu 'ai lomanga. So'o gena ḏi'i Ma Jou'ongu Madutu 'ai Wala re ngowa'a mo-moini ga'a 'aḏi tegoro toma soroga, enanga ya'u sije-jengere mo-moini.

⁷ Enanga ḏi'i nyengara lawana re sita'aloko Ma Jou'ongu Madutu 'ai ngowa-ngowa'a. Re sanga kuasa, la nyengara 'i parenta toma suku mo-moini, nagara mo-moini, bangsa mo-moini re demo-demo mo-moini.

⁸ Haiwani gena-ge, ngowa'a mo-moini toma dungia sitabi donga ḏuanga i'a ya silamo'o re siḏubuso ḏuga-ḏuga ananga ga'a manga lomanga 'i silefo ḏua toma ngowa'a 'ahu-'ahu manga boku wakutu dungia 'i sidadi nyangu. Boku gena-ge Doba ma Ngowa ma boku, Doba ma Ngowa ga'a ya tola'a ḏua.

⁹ Sababu gena-ge, 'a guna ḇato nga'unu 'o 'isene, balasu na totoho la-la habari nena-ne:

¹⁰ Ngowa'a ga'a balasu sanga dawana, tantu ḏua ananga ḏuanga i'a 'aḏi sanga dawana. Ngowa'a ga'a balasu 'aḏi sisengene reo samaranga, tantu ḏua ananga ḏuanga i'a 'aḏi sisengene reo samaranga. Sababu gena-ge Ma Jou'ongu Madutu 'ai ngowa-ngowa'a balasu 'aḏi tahana susa re sangisara reo 'akala ḇanyo re 'aḏi macako'o namo-namoto ra Yesus.

Haiwani rimoi ga'a 'i supu toma tana'a ie

¹¹ Ḏua ngoi to oḏi'i haiwani lelegu rimoi 'i supu toma tana'a ie. Enanga ma tadu'u romoḏiḏi sa'olo doba ma ngowa ma nau'u rema tadu'u. Mada'a ma iḏingi sa'olo naga ma iḏingi.

¹² Toma haiwani ma mulaingi ma biono, haiwani ma nyo-nyoimi romoḏiḏi gena-ge ya siḏagi ma kuasa lamo'o 'i sanga toma haiwani ma mulaingi. Haiwani ma nyo-nyoimi romoḏiḏi gena-ge 'i simau-mau ngowa'a mo-moini toma dungia sitabi donga di'a 'aḏi silamo'o re siḏubuso haiwani ma mulaingi, ga'a rema nyaboto lai lamo'o mada'a ri la.

¹³ Haiwani ma nyo-nyoimi romoḏiḏi gena-ge 'i 'a'a didina'o heranga ma lamo'o. Toma ngowa'a repe manga momina, enanga 'i si'a'a u'u 'uci da'u diwanga tala.

¹⁴ Dadi toma haiwani ma mulaingi ma biono, haiwani ma nyo-nyoimi romoḏiḏi gena-ge 'i pake kuasa ga'a 'i sanga toma haiwani ma mulaingi di'a 'a'a didina'o-didina'o heranga. Dadi haiwani ma nyo-nyoimi romoḏiḏi nyengara 'i sihaga ngowa'a mo-moini toma dungia sitabi donga. Enanga 'i soma'a ngowa'a 'aḏi 'a'a dulada, la ananga 'aḏi silamo'o re siḏubuso haiwani ma mulaingi. Dulada gena-ge ma duhu sa'olo haiwani ma mulaingi ga'a rema nyaboto lai lamo'o rema samaranga, mada'a 'i 'ahu moju.

¹⁵ Haiwani ma nyo-nyoimi romoḏiḏi gena-ge 'i sanga watasa ra Ma Jou'ongu Madutu ino, di'a 'i pula'a 'ahu toma dulada haiwani gena-ge singadolo dulada gena-ge nyengara 'i kanau re 'i soma'a ngowa'a 'aḏi sisengene ngowa'a mo-moini ga'a 'aḏi silamo'o re siḏubuso enanga ua.

¹⁶ Ngowa'a mo-moini: ngowa'a lamo'o re ngowa'a mapake ua, ngowa'a rema-enanga re ngowa'a ma dinga'unu ua, budaka re bebasa, haiwani ma nyo-nyoimi romoḏiḏi ya simau-mau di'a sigare nana'o tamanga giama ma kuwiḏa bolo tamanga memese.

¹⁷ Na'o ngowa'a 'aḏi sanga nana'o gena-ge ua, ananga 'aḏi simaha ua di'a wu'unu bolo 'aḏi tibo 'ori i'a i'a. Nana'o gena-ge haiwani ma mulaingi ma lomanga bolo nyo-nyoimi ma ngale haiwani ma mulaingi ma lomanga gena-ge.

¹⁸ Nyo-nyoimi gena-ge 'i paralu 'akala ma soro'unu di'a ya sahe ma ngale. Ngowa'a pahe nga'unu ya sahe mangale nyo-nyoimi haiwani gena-ge, sababu ma nyo-nyoimi latu rarama re nyagi rarama re rarama (666). Gena-ge 'o ngowa'a matengo 'ai lomanga.