Tingoýi 11 - Jaji ma Su-sungi

Sakisi romoḏiḏi

¹ Gena ḏua, 'age 'i pula'a ra ngoi ate ma jule sa'olo didiki duga kara soma'a, “Tagi na tuga Ma Jou'ongu Madutu 'ai Wala re jou-jou ma ngi'i. Re na roimi toma dara ngowa'a nga muḏuo 'aḏi silamo'o re siḏubuso Ma Jou'ongu Madutu.

² Mada'a awa na tuga Ma Jou'ongu Madutu 'ai Wala ma soana ma ḏuḏunu sababu enanga gena-ge sipula'a ḏua di'a ngowa'a ga'a 'aḏi nana'o Ma Jou ua. Ananga gena-ge ḏuanga i'a ya jo'u-jo'u limau 'ofi-'ofi ma di'ara ngara nyagi rata re romoḏiḏi.

³ Ngoi ḏuanga i'a to 'utusu 'Ari sakisi nga muḏiḏi ga'a mapake pakeanga duka re korou'u. Ananga gena-ge 'aḏi siajele habari da'u ra Ma Jou'ongu Madutu tala ma di'ara wangere cala moi re latu ḏiḏi re nyagi rarama.”

⁴ Sakisi nga muḏiḏi gena-ge ma tero sa'olo 'o ate zaitun ma lese ḏu ḏiḏi re poci ma ngi'i ngai romoḏiḏi ga'a 'i te'o-te'oso ra Ma Jou'ongu Madutu 'ai biono, Unanga ga'a 'o parenta dungia.

⁵ Na'o ngowa'a 'aḏi sitai'i 'aḏi 'a'a ma jira ra sakisi gena-ge, tamanga madanga ma dara 'i supu u'u di'a sisengene manga lawana gena-ge. Duhu so'o gena-ge 'a guna ḇato ga'a 'a'a cira toma sakisi gena-ge 'o sengene.

⁶ Sakisi gena-ge remanga kuasa 'aḏi kuci diwanga, la besa'a 'i sapolo awa wakutu ananga 'aḏi siajele moju habari da'u ra Ma Jou'ongu Madutu tala. Ananga gena-ge remanga kuasa ḏi'i toma ḇanyo ya sidadi ngaunu, re ananga remanga kuasa 'aḏi sihukumu dungia reo bahala 'oru ḇato, toma 'orasa le'a ḇato mete'e manga mau.

⁷ Ananga 'aḏi siajele habari da'u ra Ma Jou'ongu Madutu tala togumu i'a, haiwani rimoi ga'a ma 'asala toma ngabanga maut, enanga ya parangi sakisi gena-ge singadolo ananga nga muḏiḏi gena-ge 'aḏi sengene.

⁸ Re sakisi manga mayeti 'i sigare toma ngo'omo lamo'o toma limau lamo'o. Ngi'i gena-ge ananga sisalib manga Jou. Limau ma lomanga gena-ge ma kiasana Sodom bolo Mesir.

⁹ Ngowa-ngowa'a toma nagara mo-moini, suku mo-moini, demo mo-moini, re bangsa mo-moini ḏuanga i'a 'aḏi oḏi'i sakisi manga mayeti gena-ge ma di'ara wangere ro'ange re ma jule re mayeti gena-ge simaha ua ya otomo.

¹⁰ Ngowa'a mo-moini toma dungia ḏuanga i'a 'aḏi maroanga sababu sakisi nga muḏiḏi ga'a 'aḏi gasa bahala di'a ngowa'a toma dungia, nange-ne ananga raḏi sengene. Dadi ananga 'aḏi 'a'a laya re ma'u pula'a bu-bula'a.

¹¹ Sakisi nga muḏiḏi 'aḏi sengene ma di'ara wangere ro'ange re ma jule togumu i'a, Ma Jou'ongu Madutu 'o pula'a ngagara 'ahu ra ananga nga muḏiḏi gena-ge, kara ananga dadunu 'aḏi 'ahu moju re 'aḏi momi'i. Ḏua ngowa'a mo-moini ga'a ya oḏi'i, 'aḏi matai mojongo.

¹² Gena ḏua, ananga nga muḏiḏi gena-ge ḏuanga i'a 'aḏi 'isene iḏingi da'u soroga tala ya'u 'aro'o ananga siduga-duga ma betongo so'o ne: “Ino pere 'ane!” Ḏua tamanga lawana-lawana manga momina, ananga 'aḏi sitede sie toma soroga re 'o kamo-kamo ya'u sao.

¹³ Toma 'orasa gena-ge 'i dadi wusu lai siḏi masala. Limau gena-ge ma balangu rimoi toma balangu nyagi moi ma dara 'i wejere. Ngowa'a nga cala tumudingi 'aḏi sengene sababu wusu gena-ge. Ḏua ngowa-ngowa'a ma lelegu 'aḏi matai mojongo re 'aḏi puji re silamo'o re ananga silamo'o re siḏubuso Ma Jou'ongu Madutu toma soroga.

¹⁴ Bahala ma soi ḏiḏi 'i palisi'i ḏua. Mada'a na oḏi'i! Bahala ma soi ro'ange ngasamoi 'i sapolo tuu'u.

Mala'ekata ma nyo-nyoimi tumudingi 'o wusu terompet

¹⁵ Gena ḏua, mala'ekata ma nyo-nyoimi tumudingi 'o wusu terompet. Ḏua ngoi to 'isene iḏingi lai siḏi madutu da'u soroga tala ma betongo so'o ne: “Nange-ne dungia nena-ne ma pareta ri dadi di'a Ma Jou'ongu Madutu ga'a ngene wo silamo'o re siḏubuso, re 'O Kristus manga Pareta. 'O Kristus gena-ge ga'a Ma Jou'ongu Madutu 'o sijaji pasala ḏua, Unanga ḏuanga i'a 'o parenta kasingado-ngadolo i'a!”

¹⁶ Ḏua ngowa'a bi-biri'i nga nyagi romoḏiḏi re nga ḏuata ga'a 'aḏi tegoro tamanga ḏe-ḏegoro ra Ma Jou'ongu Madutu 'ai biono, ananga 'aḏi mapagara manga biono tala, kara 'aḏi silamo'o re siḏubuso Unanga.

¹⁷ Ananga 'aḏi kanau, “Ma Jou ga'a Ma Jou'ongu Madutu, Unanga ga'a 'Ai kuasa ma pari cua, re 'age nange-ne re toma 'ua re 'au wali! Ngomi mi sibere ie murasa ma la ra Ma Jou sababu No sijumu 'Ani kuasa lamo'o re No mulaingi ḏua No parenta!

¹⁸ Ngowa-ngowa'a ga'a 'aḏi nana'o ua Ma Jou'ongu Madutu 'aḏi maruta. Mada'a ma 'orasa ri ngadolo di'a Ma Jou'ongu Madutu no sipa'ala 'Ani borata re di'a No sijuruhakimi ngowa'a senge-sengene. Nange-ne enanga ma 'orasa di'a 'O pula'a ngogele Tai nabi-nabi ga'a 'aḏi de-de'oso Unanga ma tero sa'olo 'Ai budaka-budaka, re ḏi'i Tai ngowa-ngowa'a mo-moini ga'a 'aḏi silamo'o 'Ai lomanga: bae ngowa'a la-lamo'o, bae ngowa'a ceka'a. Nena-ne enanga ma 'orasa di'a singi-ngiranga ngowa-ngowa'a ga'a sijira dungia.”

¹⁹ Ḏua toma soroga, Ma Jou'ongu Madutu 'ai Wala ma ngalana 'i welanga re ya oḏi'i toma dara 'age 'o burua jaji. Gena ḏua, enanga 'i dadi ḇeḇelanga cawi-cawi re 'o murasa 'i te'iri ma'u sango-sangoro, kara 'i dadi wusu re besa'a 'es ḇa-ḇalaca'a singadolo welanga la'o mai yoḏu'u.