Tingoýi 1 - Jaji ma Su-sungi

¹ Boku nena-ne 'i silefo mangale Yesus Kristus 'o siajele mangale 'oru ga'a tantu ḏua ḏuanga i'a 'i dadi ti'ara riwara. Ma Jou'ongu Madutu 'a siajele ra Kristus so'o gena-ge, la Unanga 'o sijumu toma ngowa-ngowa'a ga'a ta Ma Jou'ongu Madutu ma tero sa'olo 'Ai budaka-budaka, mangale 'ori i'a i'a ḏuanga i'a 'i dadi. Yesus Kristus 'o cumutu 'Ai mala'ekata sapolo di'a siajele mangale gena-ge ra ngoi, Yohanes ga'a ta Ma Jou'ongu Madutu ma tero sa'olo 'Ai budaka.

² Dadi ngoi, 'a Yohanes to sisakisi mo-moini mangale 'ari tingoḏi'i gena-ge: Gena-ge mangale Ma Jou'ongu Madutu 'ai habari re 'oru ḇato ga'a Yesus Kristus 'o siajele mangale ḏuanga i'a 'oru ga'a 'i dadi.

³ 'A guna ḇato ga'a baca habari ra Ma Jou'ongu Madutu ino toma boku nena-ne toma jama'ata manga biono bolo 'aḏi 'isene ḏua, kara ya si'a'a ma tero sa'olo 'i silefo ḏua toma boku ma dara, ananga mo-moini gena-ge Ma Jou'ongu Madutu ya'u sibarakati. Sababu ti'ara riwara mo-moini nena-ne 'i dadi.

Yohanes 'o siḏingoto 'ai tabea toma jama'ata tumudingi toma daeraha Asia ma ngowa

⁴ Ioronongoḏu ngo-ngaku rimoi toma jama'ata tumudingi toma daeraha Asia ma ngowa! Ngoi, Yohanes to golo'o ra Ma Jou'ongu Madutu mangale Unanga 'o pula'a 'Ai mura re dadalara re ḏi'i 'Ai dame ra ngini. Unanga ga'a 'age ḏua toma 'ua re 'au wali moju, nange-ne re kasingado-ngadolo i'a. Sidogo ḏi'i ngoi to golo'o toma Roh tumudingi re Yesus Kristus mangale, Ananga gena-ge 'aḏi pula'a mura re dadalara re dame ra ngini. Roh gena-ge da'u ra Ma Jou'ongu Madutu tala 'ai ḏe-ḏegoro ma biono.

⁵ Yesus Kristus gena-ge Sakisi ma cufala re Unanga ma mulaingi dadunu 'O 'ahu moju toma ngowa'a senge-sengene manga sigolona, ma tero sa'olo ngowa'a nau'u ma jomolo. Re Unanga 'o dadi 'Olana ma Sae'e toma 'olana-'olana mo-moini toma dungia nena-ne. Yesus gena-ge 'o dadalara ngene re Unanga 'o sengene, la ngene sanga bebasa tananga ḏosa-ḏosa.

⁶ Sidogo ḏi'i, Unanga gena-ge 'o sidadi ngene sa'olo ngowa-ngowa'a ga'a 'aḏi osama nyo-nyoimi ra Ma Jou'ongu Madutu 'ai Pareta. Re ḏi'i Unanga 'o sidadi ngene sa'olo 'Ai 'imam-'imam di'a wo de-de'oso Ma Jou'ongu Madutu, Unanga 'ai Ḇaḇa. Dadi ngene wo puji re silamo'o Yesus Kristus, ga'a 'O mulia re 'Ai kuasa singado-ngadolo i'a. 'Amin.

⁷ Oḏi'i, Unanga 'o sapolo sa'olo mabalene toma kakamo. Re ngowa-ngowa'a mo-moini 'aḏi oḏi'i Unanga. So'o gena ḏi'i, ngowa'a ga'a 'aḏi topo'o Unanga. Bangsa mo-moini toma dungia ma dara, ananga gena-ge ya rerese ma gaḏi, wakutu 'aḏi oḏi'i Unanga. 'Amin.

⁸ Ma Jou ga'a Ma Jou'ongu Madutu 'o kanau, “Ngoi nena-ne 'Alfa re 'Omega. Ngoi nena-ne ga'a 'age ḏua toma 'ua re 'au wali moju, nange-ne re kasingado-ngadolo i'a, Ngoi nena-ne Unanga ga'a 'Ari kuasa ma pari cua.”

Tingoḏi'i mangale Kristus

⁹ Ngoi, Yohanes, ninga ioronongoḏu ngo-ngaku rimoi, ngene wa basono ma susa re sangisara ma tero, sababu wo mete'e Kristus. Re ngene wo tahana susa re sangisara reo 'akala ḇanyo sababu ngene rewo osama nyo-nyoimi ra Ma Jou'ongu Madutu 'ai Pareta. Ngowa-ngowa'a ri siupa'a ngoi toma pulo Patmos sababu to singadolo habari ra Ma Jou'ongu Madutu tala re to siajele mangale ba-banari ga'a Yesus 'a sijumu Tai 'ahu ma dara.

¹⁰ Toma wangere gena-ge, Ma Jou 'ai Wangere, ngoi Ma Ngagara 'Ofi-'Ofi ri ḏegoro singadolo to 'isene iḏingi lai siḏi tari ḏuḏunu ma tero sa'olo ngowa'a 'aḏi wusu terompet.

¹¹ Ma iḏingi gena-ge ma betongo so'o ne: “ 'Oru ḇato ngana no oḏi'i, na lefo kara na siḏingoto toma jama'ata tumudingi toma limau nena-ne: Efesus, Smirna, Pergamus, Tiatira, Sardis, Filadelfia, re Laodikia.”

¹² Palisi i'a, ngoi to magelolo ḏuḏunu re to disa waro 'a guna ga'a 'o kanau ino ra ngoi. Gena ḏua, ngoi to oḏi'i poci ma ngi'i ngai tumudingi si'a'a reo guraci.

¹³ Toma poci-poci ma ngi'i gena-ge ma sigolona, 'age matengo 'ai duhu ma tero sa'olo Manusia ma Ngowa'a Nau'u 'o made-de'oso, 'Ai juba 'i masitaji tala, Tai katere 'a sirangi reo ban ga'a si'a'a reo guraci.

¹⁴ 'Ai sae'e re 'Ai utu 'i buḏo madutu ma tero sa'olo doba ma gogo ḇolo ma tero sa'olo kapa. 'Ai la'o majamanga ma tero sa'olo u'u ma lejanga.

¹⁵ 'Ai rou 'i ciḏo-ciḏoto ma tero sa'olo tau'u tamḇaga kara ya 'ese singadolo ma ja-jamanga 'i supu. 'Ai iḏingi ma siḏi sa'olo duduala ma rurusu.

¹⁶ Re Tai giama ma kuwiḏa 'o gu'u mumuḏungu ngai tumudingi, Tai madanga ma dara 'i supu samaranga mangono rimoi ma doto romoḏiḏi. 'Ai biono ma lalaki ma tarangi ma tero sa'olo wangere 'o 'olona tala.

¹⁷ Wakutu ngoi to oḏi'i Unanga, ngoi to ruba paga-pagara tari biono tala ma tero sa'olo ngowa'a sengene. Mada'a Unanga 'o siteru 'Ai giama ma kuwiḏa ra ngoi, ḏua 'O kanau, “Mojongo awa! Ngoi nena-ne Ma Mulaingi re Ma Ḏo-Ḏogumu.

¹⁸ Ngoi nena-ne 'ahu ma cimi. Ngoi reto sengene, mada'a dadunu To 'ahu moju re nange-ne To 'ahu kasingado-ngadolo i'a. 'Ari kuasa to ngadolo toma ngowa'a senge-sengene manga ngi'i. Dadi Ngoi nga'unu to si'ahu moju ngowa'a raḏi sengene.

¹⁹ Sababu gena-ge, 'oru ga'a no oḏi'i ḏua nange-ne, re toma biono i'a, gena-ge na lefo mo-moini.

²⁰ Nange-ge ngana na sahe nyangu ma rahasia mangale mumuḏungu ngai tumudingi na oḏi'i Tari giama ma kuwiḏa re poci ma ngi'i ngai tumudingi si'a'a reo guraci. Dadi nena-ne Ngoi ta sitarangi mangale gena-ge: Mumuḏungu ngai tumudingi gena-ge ma ngale jama'ata tumudingi manga mala'ekata, re poci ma ngi'i ngai tumudingi si'a'a reo guraci gena-ge ma ngale jama'ata tumudingi.”