Roma 7 - Jaji ma Su-sungi

Molo'ara ma hukumu sa'olo nana'o rimoi

¹ Ioronongoḏu ngo-ngaku rimoi, tantu ḏua ngini reni waro mangale hukumu-hukumu. Dadi ngoi to lefo ra ngini gena-ge ga'a ni waro mangale na'o matengo i'a 'o 'ahu-'ahu moju, unanga balasu 'o mete'e hukumu.

² Ngoi to pula'a nana'o rimoi mangale were'a: Na'o 'ami nau'u 'o 'ahu-'ahu moju, munanga balasu mo mete'e molo'ara ma hukumu, awa ma sisoi'i tala 'ami nau'u. Mada'a na'o 'ami nau'u ro sengene, were'a gena-ge munanga mo bebasa toma molo'ara ma hukumu.

³ Dadi, na'o were'a gena-ge mo 'ahu marimoi reo na-nau'u ma lelegu wakutu 'ami nau'u 'o 'ahu-'ahu moju, munanga mo tinikai mete'e molo'ara ma hukumu. Mada'a na'o 'ami nau'u ro sengene, munanga remo bebasa toma molo'ara ma hukumu. Re kalaha munanga mo molo'ara moju reo na-nau'u ma lelegu, munanga mo tinikai ua.

⁴ So'o gena ḏi'i di'a ngini, ngoi 'ari ioronongoḏu ngo-ngaku rimoi. Nange-ne ngini ḏi'i ni 'ahu marimoi reo Musa 'ai hukumu riwara. Sababu ma tero sa'olo ngini reni sengene marimoi ra Kristus 'ai lese, la ngini ni 'ahu marimoi toma ngowa'a lelegu, gena-ge Kristus, Unanga ga'a dadunu 'O 'ahu moju Tai se-sengene. Dadi ngene renanga faeda tananga 'ahu nena-ne ma dara di'a Ma Jou'ongu Madutu.

⁵ Sababu ma siḏa ngene wo 'ahu wo mete'e nanga nyafusu ga'a ma 'asala toma tabeata manusia baraḏosa. Re sababu wo waro Musa 'ai hukumu, nyafusu gena-ge 'i ganapu baolo tananga 'akala re sinyingara ma dara, singadolo enanga gena-ge 'i kuasa nanga lese. Dadi ngene wo patasa di'a sanga sengene kasingado-ngadolo i'a.

⁶ Mada'a nange-ne ngene rewo 'ahu marimoi riwara ra Musa 'ai hukumu sababu ngene rewo sengene marimoi ra Kristus. Dadi ngene rewo bebasa toma hukumu gena-ge ga'a ma siḏa moju enanga 'i kuasa ngene. Ngene wo de-de'oso Ma Jou'ongu Madutu mete'e ngo'omo ma siḏa riwara: Ngene wo mete'e riwara hukumu gena-ge ga'a 'i silefo ḏua. Siḏibo ḏi'i, nange-ne ngene wo de-de'oso mete'e ngo'omo su-sungi: Ngene wo mete'e Ma Ngagara 'Ofi-'Ofi.

Musa 'ai hukumu 'i doto'o mangale ḏosa

⁷ Na'o so'o gena, ngene wo kanau 'oru?! Musa 'ai hukumu 'i cira sababu enanga gena-ge 'i sigasa ngowa'a di'a ganapu 'a'a ḏosa?! Sanga ua! Siḏibo ḏi'i, hukumu gena-ge ri doto'o mangale ḏosa, la ngoi to nana'o mangale 'ari ḏosa. Si'ade-'ade, na'o Musa 'ai hukumu 'i cua moju, ngoi masiretene to waro ua wakutu to nyafusu ngowa'a lelegu manga harata, gena-ge 'i ḏosa bolo ua. Mada'a 'age parenta toma hukumu gena-ge ma dara so'o ne: “Awa nyafusu ngowa'a lelegu manga harata.” Dadi, ngoi to waro 'ari nyafusu gena-ge, 'i sigasa ngoi toma ḏosa ma dara.

⁸ Mada'a sababu parenta gena-ge, ḏosa sanga donga di'a si'a'a tari 'akala re sinyingara, singadolo ngoi to nyafusu 'ori i'a fara muḏuo i'a. Dadi na'o Musa 'ai hukumu 'i cua, ḏosa ma kuasa 'i cua moju ra ngoi.

⁹ Ma siḏa moju, ngoi masiretene to 'ahu to waro nyangu mangale Musa 'ai hukumu. Mada'a wakutu ngoi mulaingi to waro mangale hukumu gena-ge, ḏosa ḏi'i mulaingi 'i 'ahu tari 'akala re sinyingara ma dara.

¹⁰ Dadi ngoi to dadi ma tero sa'olo ngowa'a sengene ra Ma Jou'ongu Madutu 'ai momina. Musa 'ai hukumu ma maksudu di'a sigasa ngoi toma 'ahu marimoi ra Ma Jou'ongu Madutu. Momongolo ua, hukumu gena-ge 'i sigasa ngoi toma sengene kasingado-ngadolo i'a re siwola i'a ngoi ra Unanga!

¹¹ Sababu Musa 'ai hukumu, ḏosa 'i sanga donga di'a sihaga ngoi, singadolo ḏosa 'i sigasa ngoi toma sengene kasingado-ngadolo i'a.

¹² Dadi Musa 'ai hukumu ma 'asala ra Ma Jou'ongu Madutu tala re parenta mo-moini ga'a ri silefo toma hukumu gena-ge, ma 'asala ra Ma Jou'ongu Madutu tala ḏi'i. Dadi mo-moini gena-ge 'i 'adili re la-la.

¹³ 'Oru Musa 'ai hukumu ga'a la-la 'i sigasa ngoi toma sengene kasingado-ngadolo i'a?! Sanga ua! Momongolo ua ḏosa 'i sigasa ngoi toma sengene gena-ge. Sidiḇo ḏi'i, Musa 'ai hukumu ga'a la-la, enanga 'i sijumu mode-mode'e 'age ḏosa tari 'akala re sinyingara. Re ḏi'i, hukumu gena-ge 'i sijumu mode-mode'e ra ngoi mangale ḏosa, enanga gena-ge 'ori i'a ma jira madutu.

Ma'u lawana toma 'akala re sinyingara ma dara

¹⁴ Ngene wo waro mangale Musa 'ai hukumu ma 'asala toma Ngagara 'Ofi-'Ofi. Mada'a ngoi masiretene pa'i manusia lamahana ḇato ga'a nga'unu ua ta siḏagi sababu ngoi ma tero sa'olo ngowa'a budaka ga'a ri wu'unu tari tuanga, 'o ḏosa.

¹⁵ Sababu ngoi masiretene to sahe ua i'a sa'olo ngoi to 'a'a 'oru ga'a ngoi ta 'a'a: 'Oru ḇato ma la-la ga'a ngoi ta nyafusu, gena-ge ta 'a'a ua! Siḏibo ḏi'i 'oru ga'a ngoi ta emono, gena-ge ngoi ta 'a'a!

¹⁶ Mada'a, na'o ngoi to 'a'a 'ori i'a ga'a ngoi ta mau ua, gena-ge ma ngale ngoi ta 'akoru mangale Musa 'ai hukumu 'i la-la.

¹⁷ Dadi, gena-ge ma tero sa'olo ngoi ua ga'a ta 'a'a, mada'a ḏosa ga'a 'i 'ahu tari diri, enanga 'i kuasa ngoi.

¹⁸ Ngoi to waro mangale tari diri nena-ne, 'ori i'a ma la-la 'i cua sababu 'ari tabeata baraḏosa. Sababu ngoi to nyafusu to 'a'a 'ori i'a ma la-la, mada'a ta nga'unu ua.

¹⁹ Ngoi to 'a'a ua 'ori i'a ma la-la, ga'a 'ari 'akala re sinyingara ya nyafusu. Mada'a siḏibo ḏi'i, ngoi to 'a'a 'ori i'a ma jira ga'a ta nyafusu ua.

²⁰ Na'o ngoi to 'a'a 'ori i'a ga'a ngoi ta nyafusu ua, gena-ge ma ngale ngoi ua mada'a ḏosa ga'a 'i 'ahu tari diri, enanga 'i kuasa ngoi.

²¹ Dadi ngoi to magoro ino mangale hukumu ḏosa enanga ri kuasa ngoi: Kalaha ngoi to nyafusu to 'a'a 'ori i'a ma la-la, ngoi ta 'a'a pa'i 'ori i'a ma jira ḇato!

²² Kalaha 'ari 'akala re sinyingara ya nyafusu mete'e Ma Jou'ongu Madutu 'ai hukumu,

²³ ngoi to masiwaro tala rema hukumu ḏosa ḏi'i ga'a ri kuasa tari lese ma bageanga. Hukumu ḏosa gena-ge 'i ma'u lawana rea Ma Jou'ongu Madutu 'ai hukumu ga'a 'ari fikirana ya nyafusu, singadolo ḏosa ri piri'u ngoi 'ari lese ma bageanga.

^24-26 Dadi ngoi 'ari 'ahu ma duhu so'o ne: Ngoi ngowa'a budaka ga'a mete'e Ma Jou'ongu Madutu 'ai hukumu rari fikirana, mada'a ngoi 'ari tabeata manusia 'i kuasa ngoi, singadolo ngoi budaka toma ḏosa. Dadi ngoi mode-mode'e ngowa'a ga'a toma bahala! 'A guna nga'unu sisalamata ngoi tari lese ga'a sigasa ngoi toma sengene kasingado-ngadolo i'a?! Murasa ma la ra Ma Jou'ongu Madutu, Unanga ro sisalamata ngoi sababu Yesus Kristus nanga Jou.