Roma 6 - Jaji ma Su-sungi

Nange-ne ngene wo 'ahu marimoi ra Kristus

¹ Na'o so'o gena ngene wo kanau 'oru? Ḏa ngene wo kanau so'o ne: Ino ngene 'a'a ḏosa tau-taunu, la Ma Jou'ongu Madutu ganapu dogo pula'a 'Ai mura re dadalara ra ngene!

² Sanga ua! Sababu ḏosa 'i kuasa ngene riwara. Dadi i'a sa'olo ngene wo 'ahu 'a'a ḏosa tau-taunu?!

³ Tantu ḏua ngini reni waro nena-ne: Ngene mo-moini ga'a wo sanga baptis, ngene sirimoi ra Kristus Yesus. Dadi gena-ge ma tero sa'olo ngene rewo sengene marimoi ra Unanga.

⁴ Sababu gena-ge, wakutu ngene wo sanga ḇanyo, 'i ma tero sa'olo ngene siotomo marimoi ra Kristus, la ma tero sa'olo Kristus 'o dadunu 'ahu moju Tai sengene sababu 'Ai Ḇaḇa ma kuasa ga'a mulia, so'o gena ḏi'i ngene wo sanga 'ahu su-sungi.

⁵ Dadi na'o ngene rewo marimoi ra Yesus re Unanga 'ai se-sengene, tantu ḏua, ngene ḏi'i dadunu wo si'ahu moju ma tero Unanga.

⁶ Ngene rewa waro nanga tabeata baraḏosa ma siḏa ri sengene mamete'e ra Kristus toma salib, la ḏosa ma kuasa ri wejere singadolo ngene ngowa'a budaka toma ḏosa riwara.

⁷ Sababu na'o matengo i'a ro sengene, unanga gena-ge ro bebasa toma ḏosa ma kuasa.

⁸ Dadi na'o ngene rewo sengene marimoi ra Kristus, ngene wo ngaku ḏuanga i'a ngene rewo 'ahu marimoi ra Unanga.

⁹ Sababu ngene rewa waro mangale Kristus dadunu ro 'ahu moju, dadi 'O sengene riwara; Unanga ro bebasa toma sengene ma kuasa.

¹⁰ Kristus pa'i 'O sengene soi moi ḇato, di'a 'O siwejere kasingado-ngadolo i'a ḏosa ma kuasa. Mada'a nange-ne, Unanga 'o 'ahu di'a Ma Jou'ongu Madutu ḇato.

¹¹ Dadi so'o gena ḏi'i, ngini balasu ni fikiri mangale ngini masiretene sa'olo ngowa'a bebasa toma ḏosa ma kuasa re sa'olo ngowa'a ga'a 'ahu di'a Ma Jou'ongu Madutu, sababu ngini ni marimoi ra Kristus Yesus.

¹² Sababu gena-ge, awa ni simaha ḏosa di'a 'i kuasa moju taninga lese ga'a ḏuanga i'a 'i sengene, dadi ngini ni mete'e awa ninga nyafusu ma jira moju.

¹³ Awa ni sidoa'a moju ninga lese ma bageanga rimoi i'a toma ḏosa ma kuasa, di'a 'i 'a'a 'ori i'a ma jira. Mada'a siḏibo ḏi'i, ngini balasu ni sidoa'a ninga 'ahu ra Ma Jou'ongu Madutu sa'olo ngowa'a ga'a raḏi bebasa toma sengene re raḏi sanga 'ahu su-sungi. Ni sidoa'a ninga lese ma bageanga mo-moini ra Ma Jou'ongu Madutu, la Unanga nu pake di'a 'a'a 'ori i'a ga'a loasa re banari,

¹⁴ sababu ḏosa 'i kuasa ngini riwara. Dadi ngini ni 'ahu mete'e Ma Jou'ongu Madutu 'ai mura re dadalara, ngini ni 'ahu mete'e Musa 'ai hukumu riwara.

Ngene nange-ne ngowa'a budaka ra Ma Jou'ongu Madutu

¹⁵ Na'o so'o gena-ge, 'oru ngene nyengara wo 'ahu 'a'a ḏosa moju sababu wo 'ahu mete'e Musa 'ai hukumu riwara, mada'a rewo 'ahu mete'e Ma Jou'ongu Madutu 'ai mura re dadalara?! Sanga ua!

¹⁶ Tantu ḏua ngini reni waro nena-ne: Na'o ngini ni sidoa'a ninga diri ra matengo i'a di'a mete'e ngowa'a gena-ge 'ai mau, ngini reni dadi unanga 'ai budaka: bae budaka toma ḏosa ga'a sigasa toma sengene kasingado-ngadolo i'a, bae budaka ra Ma Jou'ongu Madutu ga'a si'a'a ngini ngowa'a loasa re banari.

¹⁷ Mada'a ino ngene wo sibere ie murasa ma la ra Ma Jou'ongu Madutu, sababu ma siḏa ngini ngowa'a budaka toma ḏosa mada'a nange-ne ngini ni mete'e reninga 'akala re sinyingara mode-mode'e do-doto'o banari ga'a 'i sipula'a ḏua ra ngini.

¹⁸ Ngini reni bebasa ḏua toma ḏosa ma kuasa, re nange-ne ni dadi Ma Jou'ongu Madutu 'ai budaka di'a 'a'a ga'a loasa re banari.

¹⁹ Ngoi reto pula'a nana'o gena-ge mangale ngowa'a budaka sababu ngini nga'unu na sahe nyangu do-doto'o banari gena-ge. Ma siḏa, ngini sidoa'a ninga lese ma bageanga sa'olo budaka toma ḏosa: Ngini ni mete'e ninga nyafusu ma faja re ma jira, singadolo ninga tabeata 'i dadi cira madutu. So'o gena ḏi'i nange-ne ngini balasu sidoa'a ḏi'i ninga lese ma bageanga sa'olo budaka ra Ma Jou'ongu Madutu, la ngini ni 'a'a ga'a loasa re banari singadolo ninga tabeata 'i dadi 'ofi-'ofi.

²⁰ Sababu ma siḏa wakutu ngini ngowa'a budaka toma ḏosa, ngini ni bebasa di'a mete'e ua 'ahu loasa re banari ga'a Ma Jou'ongu Madutu 'ai 'akala ma mau.

²¹ Toma 'orasa gena-ge, ngini ni sanga ma 'utungu 'oru?! Ma 'utungu rimoi i'a mai ua! Siḏibo ḏi'i, nange-ne ngini reni mara'a mangale nanga 'ahu ma siḏa ga'a sigasa ngowa'a 'aḏi basono sengene kasingado-ngadolo i'a!

²² Mada'a nange-ne, Ma Jou'ongu Madutu ro sibebasa ngini toma ḏosa ma kuasa, re ni dadi Ma Jou'ongu Madutu 'ai budaka. Dadi ma 'utungu so'o ne: Ngini ni 'ahu marimoi ra Ma Jou'ongu Madutu, re ma ḏo-ḏogumu tala sanga 'ahu kasingado-ngadolo i'a.

²³ Sababu ḏosa ma ngogele so'o ne: Sengene kasingado-ngadolo i'a! Mada'a Ma Jou'ongu Madutu 'ai cocatu so'o ne: 'Ahu kasingado-ngadolo i'a ga'a ngene wo sanga sababu wo marimoi ra Kristus Yesus nanga Jou.