Roma 16 - Jaji ma Su-sungi

Paulus 'ai tabea

¹ Ngoi to sinana'o ra ngini matengo ga'a nanga biḏanga ngo-ngaku rimoi, 'ami lomanga ngo Febe. Munanga gena-ge 'ami de'oso re ḏegoro la-la re mo munara riono jama'ata toma Kengkrea.

² Ngoi to golo'o ra ngini, ni dawongo munanga sa'olo ninga biḏanga ra Ma Jou'ongu Madutu 'ai 'umata, gena-ge 'i patasa di'a ngowa'a ngaku Yesus. Ni riono munanga na'o mo majangangata ra ngini, sababu munanga masiretene romo riono ngowa'a manga repe; re ngoi masiretene ḏi'i, munanga miri riono.

³ Siḏingoto 'ari tabea ra ngo Priskila re Akwila. Ananga 'ari ḏagilomu munara di'a Kristus Yesus.

⁴ Ananga nga muḏiḏi 'aḏi riono ngoi, singadolo sa'i sengene. Ngoi to pula'a murasa ma la ra ananga — re pa'i ngoi masiretene ua, mada'a jama'ata-jama'ata toma bangsa Yahudi ua ḏi'i, ananga mo-moini 'aḏi pula'a manga murasa ma la ra ananga nga muḏiḏi.

⁵ Siḏingoto ḏi'i 'ari tabea toma jama'ata ga'a 'aḏi malomu ra ngo Priskila re Akwila manga wala. Siḏingoto 'ari tabea ra Epenetus ga'a ngoi to dadalara. Unanga ngowa'a ma mulaingi toma daeraha Asia, ga'a ngaku Kristus.

⁶ Siḏingoto 'ari tabea ra ngo Maria. Munanga mo munara mode-mode'e ra ngini.

⁷ Siḏingoto 'ari tabea ra Andronikus ra Yunias. Ananga re ngoi, ngomi bangsa rimoi re 'aḏi osama bui mamete'e ra ngoi. Wakutu ngoi to ngaku Kristus nyangu, ananga nga muḏiḏi raḏi ngaku Kristus siḏa. Ananga ḏi'i 'o sayanga ma jingi'i ra Yesus 'ai so-soma'a manga sigolona.

⁸ Siḏingoto 'ari tabea ra Ampliatus, ga'a ngoi to dadalara, sababu ngomi nga muḏiḏi minga 'ahu marimoi ra Ma Jou.

⁹ Siḏingoto 'ari tabea ra Urbanus, nanga ḏagilomu munara moi di'a Kristus. Siḏingoto 'ari tabea ra Stakhis, ga'a ngoi to dadalara.

¹⁰ Siḏingoto 'ari tabea ra Apeles. Unanga 'o basono susa re sangisara sababu 'ai ngo-ngaku, mada'a unanga ro ngaku re macako'o namo-namoto ra Kristus. Siḏingoto 'ari tabea ra 'a Aristobulus 'ai ngitu re ngale.

¹¹ Siḏingoto 'ari tabea ra ngo Herodion. Munanga re ngoi ngomi bangsa rimoi. Siḏingoto 'ari tabea tari ioronongoḏu ngo-ngaku rimoi ra Narkisus 'ai ngitu re ngale.

¹² Siḏingoto 'ari tabea ra ngo Trifena re ngo Trifosa ga'a 'aḏi munara mode-mode'e di'a Ma Jou. Siḏingoto 'ari tabea ra ngo Persis ga'a ngoi timi dadalara, munanga ḏi'i romo munara mode-mode'e ra Ma Jou.

¹³ Siḏingoto 'ari tabea ra Rufus re ma ngina, ga'a ma tero ḇato 'ari ngina madutu ḏi'i. 'A Rufus ngowa'a ngaku Yesus ga'a 'o sayanga ma jingi'i toma ngowa'a ngaku Yesus.

¹⁴ Siḏingoto 'ari tabea ra Asinkritus, ra 'a Flegon, ra Hermes, ra Patrobas, re ra Hermas, re toma ioronongoḏu ngo-ngaku rimoi mo-moini ga'a mamete'e ra ananga.

¹⁵ Siḏingoto 'ari tabea ra 'a Filologus re ngo Yulia, ra 'a Nereus re ma biḏanga re 'a Olimpas re toma ngowa'a ngaku Yesus mo-moini ga'a mamete'e ra ananga.

¹⁶ Ni ma'u siḏingoto ninga tabea i'a re ino matengo re matengo sa'olo gia nongoḏu ra Kristus. Ngowa'a ngaku Yesus mo-moini toma ngi'i 'ane-ne 'aḏi singadolo manga tabea ra ngini.

Duga re domolo ma ḏo-ḏogumu

¹⁷ Ioronongoḏu ngo-ngaku rimoi, ngoi to golo'o mode-mode'e ra ngini: Ni ma'istiari ino toma ngowa'a ga'a ma'u sabi ḏuḏunu re 'aḏi siruwahe ninga ngo-ngaku ra Ma Jou'ongu Madutu, sababu ananga gena-ge manga do-doto'o 'i ma'u rapu reo do-doto'o ga'a ngini na sanga ḏua. Dadi ni maki-kiḏanga ra ananga.

¹⁸ Sababu ngowa'a ga'a 'aḏi 'a'a so'o gena-ge ananga 'aḏi munara ua di'a nanga Jou Kristus, mada'a di'a sisanangi ḇato ananga manga 'akala re sinyingara ma mau masiretene. Ananga gena-ge 'aḏi baja re 'aḏi kanau rema demo-demo lai rousu madutu di'a sihaga ngowa'a ga'a waro 'oru rimoi ua.

¹⁹ Ngowa'a mo-moini reni waro ngini mode-mode'e ni mete'e do-doto'o mangale Habari Roanga ra Ma Jou'ongu Madutu tala. Dadi ngoi masiretene to maroanga mangale ngini ninga de'oso re ḏegoro gena-ge. Mada'a ngoi to mau ngini 'akala soro'unu mangale 'ori i'a ga'a ma la-la, re ni mete'e ua 'ori i'a ma jira.

²⁰ Dadi Ma Jou'ongu Madutu ga'a pula'a dame Tai ngowa-ngowa'a, Unanga jau-jau 'o sita'aloko 'Iblisi singadolo Enanga 'i ta'aloko ra ngini. Ngoi to golo'o ra Ma Jou Yesus mangale 'Ai mura re dadalara sieanga i'a ngini ua.

²¹ Timotius, 'ari ḏagilomu munara 'o siḏingoto 'ai tabea ḏi'i ra ngini. So'o gena ḏi'i 'a Lukius, 'a Yason re 'a Sosipater, ananga mo-moini re ngoi, ngomi bangsa rimoi.

²² Ngoi, Tertius ga'a lefo surata nena-ne, to siḏingoto 'ari tabea ra ngini mo-moini ga'a ioronongoḏu ngo-ngaku rimoi.

²³ Gayus 'o siḏingoto tabea ra ngini. Ngoi, Paulus, to masiḏingoto tai wala re ngomi minga jama'ata 'aḏi malomu tai wala gena-ge ḏi'i. 'A Erastus, unanga limau ma pipisi ma gu-gu'u, 'o siḏingoto 'ai tabea ra ngini. So'o gena ḏi'i nanga ioronongoḏu matengo ngo-ngaku rimoi, 'a Kwartus. [

²⁴ Ngoi to golo'o ra Ma Jou Yesus Kristus mangale 'Ai mura re dadalara sieanga i'a ngini ua. 'Amin.]

Surata ma ḏo-ḏogumu

²⁵ Puji re silamo'o Ma Jou'ongu Madutu! Unanga ga'a Rai kuasa 'i site'e ninga ngo-ngaku sababu reni dawongo Habari Roanga ga'a ngoi reta singadolo mangale Yesus Kristus. Ngoi reta singadolo habari gena-ge mete'e 'oru ga'a Ma Jou'ongu Madutu ra sijumu ra ngoi, mada'a toma 'ua re 'au wali moju ngene wa waro ua.

²⁶ Mada'a nange-ne mete'e Ma Jou'ongu Madutu 'ai parenta, Unanga ga'a 'ahu kasingado-ngadolo i'a, habari gena-ge 'i siajele re sijumu toma bangsa mo-moini mete'e nabi-nabi manga boku, la ngowa'a mo-moini nyengara ya ngaku re ya mete'e Unanga.

²⁷ Unanga gena-ge Ma Jou'ongu Madutu ga'a pa'i matengo ḇato re 'akala soro'unu ma cimi. Ino ngene wo puji re silamo'o Unanga kasingado-ngadolo i'a sababu Yesus Kristus 'ai ga'a. 'Amin.