Roma 15 - Jaji ma Su-sungi

Ngene balasu sisanangi ngowa'a lelegu

¹ Ngene nena-ne ga'a nanga ngo-ngaku 'i te'e ra Kristus, balasu wo sijumu 'akala ḇanyo toma ngowa'a ga'a manga ngo-ngaku 'i te'e nyangu. Ino ngene pa'i wa sisanangi awa ngene nanga diri masiretene ḇato!

² Sidogo ḏi'i, ngene matengo re matengo balasu wo siḏagi 'oru ga'a sisanangi re siriono nanga ioronongoḏu ngo-ngaku rimoi, la ananga manga ngo-ngaku lebe te'e.

³ Sababu Kristus ḏi'i 'o disa ua di'a sisanangi 'ai diri masiretene. Mada'a ma tero sa'olo toma Boku 'Ofi-'Ofi ma dara ri silefo mangale Kristus ro kanau ra Ma Jou'ongu Madutu so'o ne: “Demo je-jengere ga'a ngowa'a 'aḏi kanau ra Ma Jou'ongu Madutu, gena-ge ri singe-ngeta'a ra Ngoi.”

⁴ 'Oru ga'a ri silefo toma Boku 'Ofi-'Ofi ma dara, mo-moini gena-ge di'a sidoto'o ngene. Sababu do-doto'o toma boku gena-ge, ngene nga'unu wo tahana susa re sangisara re sibabata ngene, dadi nanga ngo-nganono ra Ma Jou'ongu Madutu 'i dadi te'e.

⁵ Ngoi to golo'o ra Ma Jou'ongu Madutu ga'a nu sibabata ninga 'akala re sinyingara re siriono ngene wo tahana toma susa re sangisara ma dara, di'a nu siriono ngini ni 'ahu ma'u 'aro'o la ino matengo re matengo sa'olo ngini ni mete'e Kristus Yesus,

⁶ la ngini ni marimoi ni puji re silamo'o Ma Jou'ongu Madutu, Ma Jou Yesus Kristus 'ai Ḇaḇa.

Habari Roanga di'a bangsa ngowa'a Yahudi ua

⁷ Sababu gena-ge ioronongoḏu ngo-ngaku rimoi, ngini balasu ni ma'u dawongo matengo re matengo ma tero sa'olo Kristus 'o dawongo ngini, la ngowa'a 'aḏi puji re silamo'o Ma Jou'ongu Madutu.

⁸ Awa ni sidaioranga mangale Kristus ro sapolo toma dungia di'a 'O de-de'oso ngowa-ngowa'a Yahudi, la Unanga 'o sijumu ra ngene mangale Ma Jou'ongu Madutu 'o cufala sitotomo 'Ai jaji tananga ete re dotumu.

⁹ Ḏi'i Kristus 'o sapolo toma dungia nena-ne, la ngowa'a Yahudi ua 'aḏi puji re silamo'o Ma Jou'ongu Madutu sababu Unanga 'a sijumu 'ai 'akala re sinyingara ma la-la ra ananga. Gena-ge ma tero sa'olo 'a 'Olana Daud 'o kanau ra Ma Jou'ongu Madutu ga'a 'i silefo toma Boku 'Ofi-'Ofi ma dara so'o ne: “Sababu gena-ge, wakutu ngoi 'age toma ngowa'a Yahudi ua manga sigolona, ngoi to puji re silamo'o Ma Jou'ongu Madutu; ngoi to manyanyi puji re silamo'o 'Ai lomanga.”

¹⁰ Re toma Boku 'Ofi-'Ofi ri silefo ḏi'i so'o ne: “Maroanga ngini ga'a ngowa'a Yahudi ua mamete'e reo ngowa'a Yahudi ga'a 'Ai 'umata.”

¹¹ Re ḏi'i so'o ne: “Hei ngini ga'a ngowa'a Yahudi ua, puji re silamo'o Ma Jou'ongu Madutu, Ngowa'a mo-moini 'aḏi manyanyi puji re silamo'o Ma Jou'ongu Madutu.”

¹² Re nabi Yesaya 'o kanau ḏi'i: “Ra Isai 'ai ju'uda ḏuanga i'a 'i supu matengo i'a, re bangsa-bangsa Yahudi ua, ananga Unanga gena-ge ḏuanga i'a ya'u parenta, re ngowa'a Yahudi ua ḏuanga i'a 'aḏi masinganono ra Unanga.”

¹³ Ngoi to golo'o ra Ma Jou'ongu Madutu ga'a ninga ngo-nganono ma cimi, di'a nu siromanga taninga 'akala re sinyingara ma dara reo roanga re dame ti-tiai, ngini ga'a reni ngaku Unanga, la sababu Ma Ngagara 'Ofi-'Ofi ma kuasa, ninga ngo-nganono 'i ganapu te'e.

Paulus 'ai maksudu di'a 'o lefo surata nena-ne

¹⁴ 'Ari ioronongoḏu ngo-ngaku rimoi, ngoi nena-ne to ngaku mode-mode'e mangale ngini ninga de'oso re ḏegoro 'i la-la, re ngini ni waro Yesus 'ai do-doto'o ti-tiai. Ngini ḏi'i nga'unu ni ma'u doto'o matengo re matengo.

¹⁵ Mada'a tari surata ma dara nena-ne, ngoi to nau'u di'a lefo mangale 'ori i'a mamuni'a sababu 'ari maksudu di'a si'elingi ngini mangale mo-moini gena-ge. Ngoi to lefo so'o gena, sababu Ma Jou'ongu Madutu 'ai mura re dadalara, Unanga ro siwatasa ra ngoi di'a

¹⁶ to dadi Kristus Yesus 'ai falalomu di'a ngowa'a Yahudi ua. Re ngoi 'ari munara gena-ge ma tero sa'olo 'imam di'a to singadolo Habari Roanga ra Ma Jou'ongu Madutu tala, la ngowa'a Yahudi ua 'aḏi dadi ma tero sa'olo jou-jou rimoi ga'a Ma Jou'ongu Madutu nyengara 'o dawongo sababu Ma Ngagara 'Ofi-'Ofi 'i siwola i'a ananga gena-ge di'a Unanga.

¹⁷ Sababu ngoi reto marimoi ra Kristus Yesus, ngoi nyengara to sitoro mangale 'ari munara gena-ge di'a Ma Jou'ongu Madutu.

¹⁸ Ngoi to nau'u di'a to kanau mangale pa'i ma duhu sa'olo Kristus ro sigasa ngowa'a Yahudi ua di'a mete'e Ma Jou'ongu Madutu, sababu Unanga gena-ge ro sipake 'ari demo re ganau re 'ari ga'a:

¹⁹ Ngoi nga'unu to 'a'a didina'o heranga re 'ori i'a hera-heranga sababu Ma Ngagara 'Ofi-'Ofi ma kuasa. Dadi Habari Roanga mangale Kristus, ngoi reta singadolo toma ngowa'a mo-moini: mulaingi toma limau Yerusalem singadolo toma limau Ilirikum.

²⁰ Ma mulaingi, ngoi 'ari 'ulungu ma dara to tagi to singadolo Habari Roanga toma ngi'i-ngi'i ga'a ngowa'a ya 'isene nyangu mangale Kristus. Sababu ngoi to oḏu'u side'oso wala toma bangini ga'a ngowa'a lelegu ya ḏu-ḏuanga ḏua.

²¹ Siḏibo ḏi'i, ma tero sa'olo toma Boku 'Ofi-'Ofi ri silefo so'o ne: “Ngowa'a ga'a 'isene mangale Unanga nyangu, ḏuanga i'a 'aḏi 'isene re ananga ga'a 'aḏi 'isene nyangu mangale Unanga, ḏuanga i'a 'aḏi sahe.”

Paulus 'ai maksudu di'a tagi toma limau Roma

²² Sababu gena-ge, soi rai o'o i'a ngoi to sanga dola'aku di'a tini tutumu ngini.

²³ Mada'a 'orasa nange-ne ngoi 'ari munara toma daeraha-daeraha gena-ge reta ḏuanga ḏua. Re musungu muḏuo i'a ḏua, ngoi to nyafusu to tutumu ngini,

²⁴ dadi ngoi to nganono to tutumu ngini wakutu ngoi to tagi toma Spanyol re to tola'a i'a ngini ninga limau Roma di'a ma'u sanga ra ngini, kara kalaha ti'ara ua, to tegoro sanangi ra ngini. Togumu i'a ngoi to nganono ngini nga'unu ni riono ngoi, ta dowanga 'ari ḏo-ḏagi toma Spanyol.

²⁵ Mada'a 'orasa nange-ne, ngoi ḏuanga i'a to tagi toma limau Yerusalem di'a to pula'a bu-bula'a ga'a ma 'asala ra Ma Jou'ongu Madutu 'ai 'umata toma daeraha Makedonia re Akhaya.

²⁶ Sababu jama'ata-jama'ata toma daeraha Makedonia re Akhaya, ananga 'aḏi mafakati di'a 'aḏi pula'a manga bu-bula'a toma ngowa'a Yahudi ga'a ma dinga'unu ua toma limau Yerusalem, ga'a raḏi dadi Ma Jou'ongu Madutu 'ai 'umata.

²⁷ Ngowa'a Yahudi ua toma daeraha gena-ge, ananga raḏi mafakati remanga 'akala re sinyingara sa-sanangi, di'a 'aḏi riono so'o gena-ge. Ma nyonyata ananga 'aḏi mabanyatoro 'ori i'a toma ngowa'a Yahudi, sababu ananga ngowa'a Yahudi ua 'aḏi sanga barakati ra Ma Jou'ongu Madutu tala mete'e 'Ai jaji toma ngowa'a Yahudi. Dadi gena-ge 'i patasa di'a ananga riono remanga 'ori i'a rana toma ngowa'a Yahudi ga'a ma dinga'unu ua.

²⁸ Sababu gena-ge, si-siḏa ngoi balasu to siḏuanga 'ari munara gena-ge di'a to pula'a bu-bula'a ra ananga toma Yerusalem. Togumu i'a, ngoi to tagi toma Spanyol to tola'a i'a ngini ninga limau Roma.

²⁹ Re tantu ḏua ngoi to waro wakutu ngoi to sapolo ra ngini, ngoi to gasa barakati ma repe ra Kristus di'a ngini.

³⁰ Sababu nanga ngo-ngaku ra Ma Jou Yesus Kristus re sababu ḏi'i dadalara ga'a Ma Ngagara 'Ofi-'Ofi ri pula'a ra ngene matengo re matengo, ngoi to golo'o mode-mode'e ngini ni mamete'e ra ngoi di'a manyiata ra Ma Jou'ongu Madutu di'a ngoi.

³¹ Ni manyiata mangale Ma Jou'ongu Madutu 'o silalo'o ngoi toma ngowa-ngowa'a Yudea ga'a 'aḏi ngaku Yesus Kristus ua. Re manyiata ḏi'i mangale ngowa'a toma limau Yerusalem ga'a Ma Jou'ongu Madutu 'ai 'umata, ananga 'aḏi dawongo remanga 'akala re sinyingara sa-sanangi, bu-bula'a ga'a ngoi ta gasa.

³² Dadi na'o Ma Jou'ongu Madutu 'ai 'akala ma mau, ngoi nga'unu to sapolo ra ngini rari 'akala re sinyingara ma roanga. Re ḏi'i ngoi ta sibasono tala sanga hiburu sababu ngoi 'age taninga sigolona.

³³ Ngoi to golo'o mangale Ma Jou'ongu Madutu ga'a pula'a dame, Unanga gena-ge 'o sieanga i'a ua ngini mo-moini. 'Amin.