Roma 12 - Jaji ma Su-sungi

'Ahu pa'i di'a Ma Jou'ongu Madutu ḇato

¹ Ioronongoḏu ngo-ngaku rimoi, Ma Jou'ongu Madutu 'o sijumu 'Ai 'akala re sinyingara ma la-la ra ngene. Sababu gena-ge, ngoi to golo'o mode-mode'e ra ngini mangale ngini ni pula'a ninga 'ahu ma tero sa'olo jou-jou ga'a 'ahu moju; pa'i 'ahu di'a Unanga ḇato re di'a sisanangi Unanga 'ai 'akala re sinyingara. Gena-ge ngo'omo rimoi di'a patasa silamo'o re siḏubuso Unanga.

² Ni mete'e ngowa'a manga tabeata rawara ga'a nana'o ua Ma Jou'ongu Madutu. Siḏibo ḏi'i, sieanga i'a Ma Jou'ongu Madutu 'o si'a'a ngini ninga fikirana su-sungi singadolo ninga tabeata 'i dadi su-sungi. Ḏua ngini nga'unu ni waro Ma Jou'ongu Madutu 'ai 'akala ma mau: 'oru 'i la-la, 'i ti-tiai re ḏi'i 'i sisanangi 'Ai 'akala re sinyingara.

³ Ma Jou'ongu Madutu ro pula'a barakati nena-ne ra ngoi: Unanga 'o siwatasa ngoi sa'olo Yesus 'ai so-soma'a. Sababu gena-ge, ngoi to pula'a duga re domolo nena-ne ra ngini mo-moini: Awa ni ta'ajiri lebe la-lamo'o reo ninga diri. Siḏibo ḏi'i, ngini matengo re matengo balasu tatamo ninga diri ga'a ma duhu 'i patasa mete'e ninga ngo-ngaku ma balangu, ga'a Ma Jou'ongu Madutu ro pula'a ra ngini matengo re matengo.

⁴ Ngene nanga lese 'age ma bageanga lai repe mada'a ma lese pa'i rimoi ḇato. Re lese ma bageanga rimoi re rimoi 'i siḏagi munara 'i ma tero ua.

⁵ So'o gena ḏi'i di'a ngene: Ngene lao repe mada'a rewo dadi ma tero sa'olo lese rimoi, sababu wo marimoi ra Kristus. Sidogo ḏi'i, ngene matengo re matengo ma'u marimoi, sababu wo lese moi.

⁶ Ngene matengo re matengo wo sanga cocatu 'i ma tero ua, mete'e barakati ga'a Ma Jou'ongu Madutu ro pula'a ra ngene: Na'o matengo i'a sanga cocatu di'a siajele habari da'u ra Ma Jou'ongu Madutu tala, unanga balasu 'a siḏagi mete'e Ma Jou'ongu Madutu 'ai do-doto'o.

⁷ Matengo i'a ga'a sanga cocatu di'a siriono ngowa'a lelegu; balasu 'a pake cocatu gena-ge. Matengo i'a ga'a sanga cocatu di'a sidoto'o; balasu 'a pake cocatu gena-ge.

⁸ Matengo i'a ga'a sanga cocatu di'a sibabata ngowa'a, balasu 'a pake cocatu gena-ge. Matengo i'a ga'a sanga cocatu di'a sibalangu 'ai 'ori i'a rana toma ngowa'a lelegu; balasu 'a siḏagi rai 'akala re sinyingara ma mura. Matengo i'a ga'a sanga cocatu di'a gasa ngowa'a; balasu 'a siḏagi rai 'akala re sinyingara mode-mode'e. Matengo i'a ga'a sanga cocatu di'a sijumu 'ai 'akala re sinyingara ma la-la toma ngowa'a lelegu ga'a manga kuranga re ngadolo ua; balasu 'a siḏagi rai 'akala re sinyingara sa-sanangi.

⁹ Ngini balasu ni dadalara ngowa'a reninga 'akala re sinyingara mode-mode'e. Re ni emono 'oru ga'a 'i cira, ni macako'o namo-namoto toma 'oru ga'a 'i la-la.

¹⁰ Ngini balasu ni ma'u dadalara matengo re matengo, ma tero sa'olo ngini ngowa'a gia nongoḏu toma ngitu re ngale rimoi. Re ngini balasu ni cautu ma'u silamo'o matengo re matengo.

¹¹ Ngini balasu ni cufala taninga munara di'a Ma Jou'ongu Madutu; awa ni pamalasa. Ngini ninga 'akala re sinyingara balasu 'i boloto tau-taunu; balasu ni de-de'oso Ma Jou'ongu Madutu reninga 'akala re sinyingara mode-mode'e.

¹² Ni maroanga tau-taunu sababu ninga ngo-nganono. Ni pake 'akala ma ḇanyo toma susa re sangisara, re ni manyiata tau-taunu.

¹³ Ni siriono ngowa'a manga ngo-ngaku rimoi ra ngini ga'a manga kuranga re ngadolo ua. Re na'u dawongo ngowa'a tagi-tagi ino taninga wala reninga 'akala re sinyingara sa-sanangi.

¹⁴ Ni golo'o ra Ma Jou'ongu Madutu di'a 'O sibarakati ngowa'a ga'a sikisa ngini. Ya, ni sibarakati ananga gena-ge, sikutuki awa.

¹⁵ Ni monere sirimoi toma ngowa'a ga'a 'aḏi monere, re ni gaḏi sirimoi toma ngowa'a ga'a gaḏi.

¹⁶ Ngini ni 'ahu ma'u 'aro'o la matengo re matengo. Awa ni matoro, mada'a ni siholo tala ninga diri re ni 'ahu marimoi reo ngowa'a ga'a manga ḏe-ḏegoro toma 'aḏu. Awa ni sitede ninga diri sa'olo ngowa'a pahe masala, mada'a so'o gena ua.

¹⁷ Na'o ngowa'a 'aḏi 'a'a cira ra ngini, awa ni mabalasa. Mada'a ni sidodai 'ori i'a ma la-la toma ngowa'a mo-moini.

¹⁸ Na'o nyengara gari'a ma mulaingi ra ngini ino, balasu ni makutale di'a ni 'ahu dame toma ngowa'a mo-moini.

¹⁹ Ioronongoḏu ngo-ngaku rimoi, ngini ga'a ngoi tunu dadalara: Awa singadolo ni ma'u gogono 'akala. Sieanga ḇato maha Ma Jou'ongu Madutu ya'u sihukumu. Sababu toma Boku 'Ofi-'Ofi ma dara silefo so'o ne: “Ma Jou'ongu Madutu 'o kanau: ‘Ngoi nena-ne ḏuanga i'a ta'u balasa. Ngoi nena-ne ḏuanga i'a ta'u sihukumu.’ ” Gena-ge Ma Jou'ongu Madutu 'ai demo-demo.

²⁰ Mada'a siḏibo ḏi'i, “Na'o ninga lawana 'o sawini; nu pula'a oromo. Re na'o unanga 'ai camala dudungu; nu pula'a ka'e ḇanyo. Sababu ninga ga'a so'o gena, unanga 'o mara'a, re awa-awa 'o maḏibo toma ngo'omo boloto.”

²¹ Awa ni balasa ngowa'a manga ga'a ma jira reo ngini ninga ga'a ma jira ḏi'i. Sababu na'o ngini ni 'a'a so'o gena, jira sita'aloko ngini. Siḏibo ḏi'i, ngini ni balasa ga'a ma jira ra ngini gena-ge reo ninga ga'a ma la-la. Dadi ngini sita'aloko jira.