Markus 16 - Jaji ma Su-sungi

Yesus dadunu 'o 'ahu moju

¹ Wakutu Sabata ma wangere palisi'i i'a, ngo Maria Magdalena, Maria (Yakobus 'ai ngina) re ngo Salome, ananga 'aḏi tibo bou-bounu di'a ya si'ese ra Yesus 'ai maiyeti.

² Da-daini i'a moju, ma wangere aro pilata i'a, wangere ma mulaingi toma migu gena-ge, ananga 'aḏi tagi toma kubu gena-ge.

^3-4 Toma ngo'omo ma golona, ananga 'aḏi makanau matengo re matengo, “ 'A guna silage maḏi toma kubu ma da-damunu?” Sababu maḏi gena-ge lai lamo'o. Mada'a ananga aro 'aḏi ngadolo, ananga ya oḏi'i maḏi gena-ge ri lulu.

⁵ Ḏua, ananga 'aḏi osama toma kubu ma dara. Tamanga kuwiḏa i'a ananga 'aḏi oḏi'i ngowa'a tubaie matengo 'o mapake juba buḏo 'o madi-dirini, re ananga 'aḏi sawana.

⁶ Tubaie gena-ge 'o kanau, “Ni mojongo awa. Ngoi to waro ngini ni tutumu Yesus ngowa'a Nazaret, ananga 'U salib. Unanga ro cua 'ane. Ma Jou'ongu Madutu dadunu 'U si'ahu ḏua! Oḏi'i ḇato 'Ai ngi'i, ananga 'U sigare.

⁷ Ngini ni tagi ni singadolo habari nena-ne ra Unanga 'ai me-mete'e sidogo ra Petrus ḏi'i, ni siajele, ‘Unanga ro siḏa da'a toma daeraha Galilea. I'a da'a, ngini ni oḏi'i Unanga ma tero sa'olo Unanga ro siajele ḏua ra ngini nga'ene.’ ”

⁸ Ḏua, ananga 'aḏi supu toma kubu ma dara re 'aḏi wiḏi, sababu ananga 'aḏi sawana re 'aḏi terewete. Ananga 'aḏi siajele ua ra guna ḇato sababu raḏi mojongo. [

Markus 'ai boku ma ḏo-ḏogumu 'a silefo mete'e boku-boku ma si-siḏa i'a toma demo Yunani Yesus 'o masibaiti ra ngo Maria Magdalena

⁹ Yesus dadunu 'o 'ahu pasala i'a, toma migu ma wangere, da-daini i'a moju, Unanga 'o masibaiti siḏa-siḏa ra ngo Maria Magdalena. Munanga gena-ge, Yesus 'o dusu'u roh ma jira tumudingi.

¹⁰ Ḏua munanga mo tagi mo sijarita ra Yesus 'ai ḏagilomu-ḏagilomu. Wakutu munanga mo sanga ananga, ananga manga 'akala re sinyingara kangela re 'aḏi 'aḏi.

¹¹ Ḏua wakutu, ngo Maria mo siajele remi roanga, “Yesus dadunu 'o 'ahu moju re ngoi to oḏi'i masiretene!” Mada'a ananga 'aḏi ngaku ua.

Yesus 'o masibaiti ra Unanga 'ai me-mete'e nga muḏiḏi

¹² Gena-ge togumu i'a, Yesus 'o masibaiti Tai me-mete'e nga muḏiḏi re 'O matuhu sa'olo ngowa'a lelegu. Gena-ge 'i dadi wakutu ananga 'aḏi tagi toma gamu rimoi.

¹³ Dadi ananga 'aḏi maḏibo, re 'aḏi siajele ra Yesus 'ai me-mete'e lelegu ḏi'i, mada'a ananga 'aḏi ngaku ua.

Yesus 'o masibaiti Tai me-mete'e

¹⁴ Siḏo-ḏogumu, Yesus 'o masibaiti Tai me-mete'e ngowa'a nga nyagi moi re matengo. Toma 'orasa gena-ge, ananga 'aḏi oromo. Unanga 'o ḇangata ananga, sababu manga 'akala re sinyingara lai te'e singadolo ananga ngaku ua ngowa'a 'aḏi oḏi'i Yesus dadunu 'o 'ahu moju.

¹⁵ Ḏua, Yesus 'o kanau ra ananga, “Ni tagi sikoloḏi dungia, re ni singadolo Habari Roanga da'u ra Ma Jou'ongu Madutu tala toma ngowa'a mo-moini.

¹⁶ Ngowa'a 'aḏi ngaku ua, ananga gena-ge 'aḏi osama naraka, mada'a ngowa'a 'aḏi ngaku Ngoi re 'aḏi sanga baptis, ananga gena-ge 'aḏi osama soroga.

¹⁷ Di'a didina'o-didina'o na'o ananga 'aḏi ngaku Ngoi so'o ne: Ngowa-ngowa'a gena-ge nyengara 'aḏi dusu'u roh ma jira rea Ngoi 'ari lomanga. Re ananga 'aḏi kanau demo-demo, mada'a ananga masiretene ya sahe ua ḏi'i.

¹⁸ Ananga 'aḏi gu'u ngorana bolo ananga 'aḏi ka'e racimi, mada'a kama 'oru-'oru ua. Na'o ananga ya siteru manga giama toma ngowa'a siḏi, ngowa'a gena-ge ro la.”

Yesus 'o pere da'u toma soroga

¹⁹ Wakutu Yesus 'o kanau ra ananga togumu i'a, Ma Jou'ongu Madutu 'U sibere da'u toma soroga. Da'a, Unanga 'o parenta ma'u mete'e re Ma Jou'ongu Madutu.

²⁰ Ḏua 'Ai me-mete'e 'aḏi tagi 'aḏi singadolo Habari Roanga da'u Ma Jou'ongu Madutu tala singadolo le'a bolo le'a. Re Ma Jou'ongu Madutu 'o mamete'e manga munara singadolo 'aḏi 'a'a ga'a hera-heranga. Enanga gena-ge 'i dadi bukiti mangale ananga manga habari 'i banari.]