Kolose 3 - Jaji ma Su-sungi

¹ 'Au nga'ene, ngini ma tero sa'olo ngowa'a raḏi sengene. Mada'a nange-ne, ngini ma tero sa'olo ngowa'a dadunu 'aḏi 'ahu moju mamete'e ra Kristus. Sababu gena-ge, ngini balasu ni nyafusu mode-mode'e 'ori i'a i'a toma soroga, ga'a Kristus ro tegoro ra Ma Jou'ongu Madutu 'ai giama ma kuwiḏa i'a, re 'O parenta mamete'e ra Ma Jou'ongu Madutu.

² Ngini balasu ni siboloto ninga fikirana di'a ni disa tau-taunu 'ori i'a i'a toma soroga. Awa pa'i ni disa 'ori i'a i'a toma dungia nena-ne ma dara.

³ Sababu ngini ma tero sa'olo reni sengene mamete'e Kristus. Gena-ge mangale: 'Ori i'a i'a toma dungia nena-ne 'i parenta ngini riwara. Nange-ne, ngini ma tero sa'olo ngowa'a dadunu 'aḏi 'ahu moju mamete'e ra Kristus. Dadi ni 'ahu marimoi ra Kristus ra Ma Jou'ongu Madutu 'ai biono toma soroga. Mada'a 'ahu gena-ge 'i go-gogono moju

⁴ sababu ninga 'ahu su-sungi ma cimi gena-ge Kristus. Wakutu Unanga dadunu 'o sapolo Rai kabasarana, ngini ni mamete'e ra Unanga, re Unanga 'O sibalangu 'Ai mulia ra ngini ḏi'i.

'Ahu ma siḏa, re 'ahu ma su-sungi

⁵ Sababu gena-ge, ngini ni upa'a mo-moini dungia ma nyafusu ga'a ma 'asala toma manusia: su-sudala, 'a'a 'ori i'a ma cafarune, oḏi'i we-were'a yoḏu'u, nyafusu ma jira, re da-danata. Da-danata gena-ge ma tero sa'olo silamo'o re siḏubuso jou'ongu ma somoara.

⁶ Sababu 'ahu ma duhu so'o gena-ge, 'i sibaolo Ma Jou'ongu Madutu 'ai borata. Ḏua Unanga 'o sihukumu ngowa'a gena-ge.

⁷ 'Au nga'ene ngini masiretene ninga 'ahu ma duhu so'o gena-ge, wakutu ngini ni marimoi ra Kristus nyangu.

⁸ Mada'a nange-ne ngini balasu ni mete'e rawara duhu so'o nena-ne: Ni ruta-ruta rawara, ni mangamo rawara, ninga 'akala re sinyingara ma dara 'i emono ngowa'a lelegu rawara, ni do-doana ngowa'a rawara, bolo ninga demo cafarune rawara.

⁹ Ngini ni ma'u sa-sakala rawara matengo re matengo. Sababu ma siḏa ngini ninga 'ahu re de'oso re ḏegoro ma duhu so'o gena. Mada'a, nange-ne rena upa'a.

¹⁰ Nange-ne ngini reni dawongo 'ahu su-sungi sababu Ma Jou'ongu Madutu ro sidadi ngini manusia su-sungi. Unanga 'o sidiai ninga de'oso re ḏegoro tau-taunu, la ngini ni dadi ma tero ra Unanga gena-ge re mode-mode'e ngini ni nana'o Unanga ti-tiai.

¹¹ Toma 'ahu su-sungi ma dara, ngene wo siwo-wola rawara ngowa'a Yahudi re ngowa'a Yahudi ua, ngowa'a ma suna re ma suna ua, ngowa'a tagi-tagi ino, re ngowa'a biadab, ngowa'a budaka re ngowa'a bebasa. Sababu Kristus lebe la-lamo'o i'a reo mo-moini gena-ge re Unanga ḏi'i 'o tegoro Tai 'umata manga 'akala re sinyingara ma dara mo-moini.

¹² Ma Jou'ongu Madutu ro cumutu ngini sa'olo 'Ai 'umata ga'a ngowa'a 'ofi-'ofi re Unanga ro dadalara ngini. Sababu gena-ge, ngini ni 'ahu so'o ne: Ni riono matengo re matengo, ni pake 'akala rousu, ni maholo ninga diri, ni pake 'akala re sinyingara mereoso re 'akala ḇanyo.

¹³ Ngini matengo re matengo balasu ni pake 'akala ḇanyo, awa ni gogono 'akala na'o ngowa'a lelegu 'aḏi 'a'a sala ra ngini, re ma'u si'apongo matengo re matengo na'o ngowa'a 'aḏi 'a'a ḏosa ra ngini. Ma Jou'ongu Madutu rai 'akala re sinyingara sa-sanangi 'O singi-ngiranga ninga ḏosa-ḏosa, dadi ngini ḏi'i reninga 'akala re sinyingara balasu ma'u si'apongo matengo re matengo na'o ngowa'a 'aḏi 'a'a ḏosa ra ngini.

¹⁴ Mo-moini gena-ge ma la-lamo'o ma re'u i'a: Ngini balasu ni ma'u dadalara. Sababu dadalara gena-ge 'i si'a'a ngini ni 'ahu marimoi ti-tiai.

¹⁵ Ma Jou'ongu Madutu 'o sirimoi ngini ma tero sa'olo lese rimoi ḇato re 'o 'aro'o ngini ni tegoro toma lese gena-ge matengo re matengo reninga dame tau-taunu. Sababu gena-ge, Kristus 'ai dame balasu 'i parenta taninga 'akala re sinyingara ma dara. Re ḏi'i ngini balasu ni sibere ie murasa ma la tau-taunu ra Ma Jou'ongu Madutu.

¹⁶ Ngini balasu ni 'elingi tau-taunu Kristus 'ai do-doto'o, la 'i parenta taninga de'oso re ḏegoro, demo re ganau. Dadi ngini ni mete'e ma duhu so'o ne: Ni ma'u doto'o, ni ma'u si'elingi di'a mete'e 'Ai do-doto'o reninga 'akala soro'unu. Re ni mete'e ma duhu so'o ne ḏi'i: Ni manyanyi Mazmur, puji-pujiana re manyanyi nyanyi ma lelegu. Re wakutu ngini manyanyi, ni sibere ie murasa ma la ra Ma Jou'ongu Madutu.

¹⁷ 'Oru ḇato ga'a ngini ni si'a'a re ni siajele, gena-ge mode-mode'e balasu 'i patasa di'a ngowa'a ga'a mete'e Ma Jou Yesus. Re ḏi'i ngini balasu ni sibere ie murasa ma la ra Ma Jou'ongu Madutu sababu 'oru ga'a Ma Jou Yesus 'o 'a'a di'a ngini.

'Ahu ma duhu toma ngitu re ngale ma dara

¹⁸ Ngini ngowa'a manga were'a! Ngini balasu ni ta'aloko taninga nau'u, sababu duhu so'o gena-ge 'i patasa di'a were'a ga'a ngowa'a ngaku Yesus.

¹⁹ Ngini ngowa'a manga nau'u! Ngini balasu ni dadalara ninga were'a re ni kasara awa taninga were'a.

²⁰ Ngini ngowa-ngowa'a! Ngini balasu ni 'isene ninga ḇaḇa re ngina manga demo-demo mo-moini. Sababu duhu so'o gena-ge ni sisanangi Ma Jou'ongu Madutu 'ai 'akala re sinyingara.

²¹ Ngini ḇaḇa-ḇaḇa! Awa ni sikangela ninga ngowa-ngowa'a manga 'akala re sinyingara, singadolo manga 'akala re sinyingara 'i rapo'o.

²² Ngini ngowa'a budaka-budaka! Toma 'oru ḇato, ngini balasu ni isene ninga tuanga toma dungia nena-ne manga demo-demo. Awa pa'i tamanga biono ḇato di'a mau sanga sitoro. Mada'a ngini balasu ni isene reninga 'akala re sinyingara mode-mode'e ninga tuanga 'ai parenta, sababu ni mau silamo'o Ma Jou.

²³ Munara 'oru ḇato, ga'a ninga tuanga 'o pula'a, ngini balasu ni si'a'a reninga 'akala re sinyingara mode-mode'e ma tero sa'olo ngini ni munara di'a Ma Jou, awa pa'i ninga tuanga toma dungia nena-ne ḇato.

²⁴ 'Eli-'elingi! Na'o ni 'a'a so'o gena-ge, sababu ngini ni munara di'a Ma Jou masiretene sa'olo ninga Tuanga, ngini ḏuanga i'a ni sanga ma ngogele ga'a Ma Jou Yesus ra sidodahe di'a 'Ai 'umata.

²⁵ Sababu 'a guna ḇato 'o 'a'a ḏosa, unanga 'o sanga ma bo-bangu 'i mete'e manga ga'a. Re Ma Jou'ongu Madutu 'o pa'ala kaci moi ua!