Kolose 2 - Jaji ma Su-sungi

¹ Ngoi to mau ngini ni waro mangale ngoi to munara mode-mode'e, lobi'i re wangere di'a ngini, re di'a ngowa-ngowa'a toma limau Laodikia, re ngowa'a mo-moini ga'a ma'u sanga ngoi nyangu.

² Mo-moini gena-ge, ngoi ta si'a'a di'a site'e ngini ninga 'akala re sinyingara re ananga manga 'akala re sinyingara, la ngini mo-moini ni ma'u dadalara matengo re matengo singadolo ninga 'ahu 'i marimoi. Dadi ngini re ananga mo-moini nga'unu ni sahe re ni ngaku ti-tiai mangale Ma Jou'ongu Madutu 'ai rahasia, gena-ge Kristus masiretene.

³ Pa'i ra Kristus gena-ge ḇato, toma ngowa'a lelegu 'i cua, 'akala soro'unu re wo-waro mo-moini mangale Ma Jou'ongu Madutu. Enanga gena-ge 'i ma tero sa'olo harata ga'a 'ua re 'au wali moju 'i go-gogono.

⁴ Ngoi to lefo so'o gena-ge, la ngini ni ngaku awa 'a guna ḇato 'o sapolo remanga demo-demo lai mami ra ngini, sababu ananga 'aḏi sa-sakala di'a sihaga ngini ḇato.

⁵ Kalaha ngoi re ngini wo ma'u kiḏanga, ngoi ta 'oro ino ma tero sa'olo ngoi 'age taninga sigolona. Ngoi to maroanga sababu to 'isene ḏua ngini ninga 'ahu 'i marimoi re ninga ngo-ngaku ra Kristus lai te'e.

'Ahu ga'a ti-tiai ra Kristus

⁶ Ioronongoḏu ngo-ngaku rimoi, ngini reni dawongo Kristus Yesus, sa'olo ninga Jou. Sababu gena-ge, wange moi-wange moi ngini ninga de'oso re ḏegoro demo re ganau balasu 'i ma tero sa'olo ngowa'a ga'a manga 'ahu 'i marimoi ḏua ra Unanga:

⁷ Ngini ninga 'akala re sinyingara balasu 'i utu'u ra Unanga tau-taunu ma tero sa'olo ate ma utu'u 'i osama lai kiḏanga toma tana'a ma dara. Ngini ninga 'akala re sinyingara balasu 'i simomi'i ra Unanga tau-taunu ma tero sa'olo wala 'i simomi'i toma bangini te-te'e ma re'u. Ngini balasu ni dogo ninga ngo-ngaku re ninga ngo-nganono mode-mode'e ra Kristus, mete'e ma do-doto'o banari ngini reni dawongo. Re ḏi'i, ngini ninga 'akala re sinyingara balasu 'i romanga reo murasa ma la tau-taunu ra Ma Jou'ongu Madutu.

⁸ Ngini balasu ni ma'istiari! Awa ngowa-ngowa'a nu'u sihaga re piri'u reo do-doto'o ga'a 'i sa-sakala, re ma faeda 'i cua. Do-doto'o gena-ge ma 'asala ra Kristus ua, mada'a toma manusia manga fikirana ino, re toma roh-roh ma jira ga'a 'i parenta dungia nena-ne.

⁹ Dadi ngini ni mete'e awa manga do-doto'o ma faeda 'i cua gena-ge, sababu Ma Jou'ongu Madutu 'ai duhu ri waiti ra pa'i Kristus 'ai lese ḇato.

¹⁰ Unanga gena-ge 'o dadi sae'e toma roh mo-moini ga'a 'i kuasa re 'i siḏagi ma pareta. Dadi, na'o ngini ni marimoi ra Kristus, ngini ninga nyawa ma 'ahu 'i ti-tiai.

¹¹ Sababu ngini ni marimoi ra Kristus, enanga 'i ma tero sa'olo ngini ni sanga suna. Suna gena-ge manusia ya 'a'a ua, mada'a Kristus 'a 'a'a taninga 'akala re sinyingara, wakutu Unanga 'o sibebasa ngini toma ḏosa ga'a 'i parenta ninga 'ahu.

¹² Sababu toma 'orasa ngini ni sanga baptis, enanga 'i ma tero sa'olo ngini siotomo ḏua mamete'e ra Kristus. Re ni sanga baptis gena-ge ngini dadunu ni 'ahu moju mamete'e ra Kristus, sababu ngini ngaku Ma Jou'ongu Madutu 'ai kuasa ga'a dadunu ro si'ahu Unanga moju.

¹³ 'Au nga'ene, kalaha ngini ni 'ahu-'ahu, ngini ni ma tero sa'olo ngowa'a raḏi sengene. Gena-ge 'i dadi sababu reni baraḏosa re ngini sanga suna ua taninga 'akala re sinyingara ma dara. Mada'a nange-ne, Ma Jou'ongu Madutu dadunu 'o si'ahu ngini mamete'e ra Kristus sababu ngene nanga ḏosa mo-moini, Ma Jou'ongu Madutu ra singi-ngiranga.

¹⁴ Enanga 'i ma tero sa'olo Unanga ra singi-ngiranga nanga banyatoro ma surata. Nanga banyatoro enanga 'i ma tero sa'olo nanga ḏosa-ḏosa ga'a 'i sida'awa ngene. Banyatoro ma surata gena-ge ri sipaku ra Yesus 'ai salib. Dadi banyatoro ma surata gena-ge Ma Jou'ongu Madutu ra singi-ngiranga ra ngene.

¹⁵ Toma salib gena-ge, Kristus ra sita'aloko roh mo-moini ga'a 'i kuasa re ga'a 'i siḏagi maparenta. Enanga 'i ma tero sa'olo ngowa'a dawana sanga piri'u 'aḏi tagi tu-tuu'u ra Yesus 'ai ḏuḏunu, la ngowa'a dungia mo-moini 'aḏi oḏi'i, re 'aḏi waro mangale roh-roh gena-ge ri ta'aloko ra Unanga.

¹⁶ Sababu gena-ge, awa ni sieanga i'a ngowa'a 'aḏi sisala ngini mangale oromo re ka'e ga'a 'i wosono, bolo sababu ngini ni mete'e ua 'agama ma wangere lamo'o, ngara su-sungi ma laya, bolo Sabata ma wangere.

¹⁷ 'Agama ma 'atoranga re hukumu mo-moini gena-ge enanga 'i ma tero sa'olo guḏumingi ra Kristus, ga'a ḏuanga i'a 'O sapolo. Mada'a Unanga gena-ge ro sapolo re Ro gasa salamata ra ngene.

¹⁸ Awa ngini ni isene toma ngowa'a ga'a sisala ngini. Ngowa'a gena-ge 'aḏi masa-sakala maholo manga diri re 'aḏi silamo'o re siḏubuso mala'ekata-mala'ekata. Na'o ngini ni mete'e ananga gena-ge, ḏuanga i'a ninga ngogele ra Ma Jou'ongu Madutu 'i iranga. Ananga gena-ge 'aḏi siajele da-dadunu mangale manga tingoḏi-tingoḏi'i. Dadi ananga 'aḏi basono momole! Mada'a ananga gena-ge guru-guru sa-sakala ḇato ga'a manga momole 'i mete'e manga fikirana toma dungia ḇato.

¹⁹ Ananga gena-ge raḏi macako'o riwara ra Kristus sa'olo ananga manga sae'e. Mada'a Kristus 'a sirimoi 'Ai 'umata re 'O sinyanyasele manga 'ahu, la ananga manga ngo-ngaku ganapu dogo mete'e Ma Jou'ongu Madutu 'ai 'akala ma mau. Gena-ge ma tero sa'olo sae'e 'i siramasa lese, ga'a 'i sirimoi reo nguḏoto re donga-donga.

Sengene re 'ahu marimoi ra Kristus

²⁰ Ngini reni sengene mamete'e ra Kristus. Sababu gena-ge roh-roh ma jira ga'a 'i parenta dungia nena-ne 'i kuasa ngini riwara. Nah, i'a sa'olo ni 'ahu ma tero ḇato sa'olo roh-roh ma jira gena-ge 'i kuasa ngini moju?! Dadi awa ngini ni ta'aloko toma 'atoranga-'atoranga nena-ne:

²¹ “Awa ni gu'u nena-ne! Awa ni oromo gena-ge! Awa ni cigi gena-ge!”

²² 'Atoranga-'atoranga mo-moini gena-ge mangale oromo re ma lelegu ga'a 'i tahana ti'ara ua. Ngene wo pake gena-ge, ḏua ri moini. 'Atoranga gena-ge ma 'asala toma manusia manga hukumu re do-doto'o.

²³ Tantu ḏua, wakutu wa 'isene manga 'atoranga gena-ge wa ta'ajiri toma 'atoranga ma dara, 'age 'akala soro'unu. Sababu ngowa'a ga'a ya mete'e 'atoranga gena-ge, ananga 'aḏi cufala mete'e manusia manga 'agama ma 'atoranga, 'aḏi maholo manga 'akala re sinyingara, re 'aḏi sikisa manga lese. Mada'a 'atoranga mo-moini gena-ge ma faeda 'i cua! Re ḏi'i ma kuasa 'i cua toma 'atoranga ma dara di'a sibebasa ngowa'a, dadi ananga gena-ge mete'e ua manga nyafusu ma jira!