'Ibrani 9 - Jaji ma Su-sungi

Ma duhu mangale pula'a jou-jou ra Ma Jou'ongu Madutu 'ai suyu'u toma dungia

¹ Mangale Ma Jou'ongu Madutu 'ai jaji ma siḏa ga'a Musa ro pula'a toma ngowa-ngowa'a Yahudi: Toma jaji gena-ge ma dara 'age 'atoranga-'atoranga mangale ma duhu sa'olo wo silamo'o re siḏubuso Ma Jou'ongu Madutu. Re enanga ḏi'i rema 'atoranga-'atoranga mangale Ma Jou'ongu Madutu 'ai suyu'u ga'a manusia ya simomi'i.

² Suyu'u ga'a manusia ya simomi'i enanga rema ḏe-ḏegoro romoḏiḏi. Toma ḏe-ḏegoro ma biono 'i silomanga Kamara 'Ofi-'Ofi. Toma kamara gena-ge 'age poci ma ngi'i ma rou re 'age ḏi'i rema meja di'a sigare roti di'a manga jou-jou ra Ma Jou'ongu Madutu.

³ Toma kamara gena-ge ma dara, enanga ma ḏe-ḏegoro ngalana ma da-daku. Toma ngalana ma da-daku ma ḏuḏunu gena-ge rema kamara lelegu ga'a 'i si'aro'o Kamara Lai 'Ofi-'Ofi.

⁴ Toma Kamara Lai 'Ofi-'Ofi gena-ge 'age rema meja di'a tau'u manyanyi. Meja gena-ge 'i si'a'a reo guraci. Re 'age ḏi'i burua jaji enanga ma ḏuḏunu ya silape reo guraci. Toma burua gena-ge ma dara 'age rema giu'u guraci, ma dara rema manna, Harun 'ai didiki ga'a ri ju'uda, re maḏi bela ḏiḏi ga'a 'i silefo Ma Jou'ongu Madutu 'ai Hukumu Nyagi Moi.

⁵ Toma burua gena-ge ma re'u 'age rema dulada kerub romoḏiḏi rema kalatu'u, gena-ge ma ngale: Ma Jou'ongu Madutu 'ai mulia. Dulada kerub romoḏiḏi gena-ge ma kalatu'u ya sese ma tero sa'olo 'i soloro. Burua gena-ge ma da-damunu, gena-ge ma ngi'i di'a singi-ngiranga ngowa'a manga ḏosa. Mada'a mo-moini gena-ge ngene wo sitarangi ua toma 'orasa nange-ne.

⁶ Mo-moini gena-ge si'aturu pasala ḏua ra Ma Jou'ongu Madutu 'ai suyu'u, wange moi-wange moi 'imam-'imam 'aḏi osama Kamara 'Ofi-'Ofi di'a ya siḏagi manga munara.

⁷ Mada'a pa'i 'imam 'agung ḇato 'o osama toma Kamara Lai 'Ofi-'Ofi. Unanga gena-ge 'o osama toma ngi'i gena-ge musungu rimoi pa'i soi moi ḇato. Re wakutu unanga 'o osama balasu 'o gasa ngaunu sa'olo jou-jou ra Ma Jou'ongu Madutu di'a 'ai diri masiretene ma ḏosa re ḏi'i di'a ngowa'a manga ḏosa ga'a ya 'a'a toma masiwaro ua ma dara.

⁸ Reo 'atoranga gena-ge Ma Ngagara 'Ofi-'Ofi ya sitarangi mangale na'o kamara gena-ge enanga 'i te'o-te'oso moju, ngo'omo osama toma Kamara Lai 'Ofi-'Ofi 'i welanga nyangu di'a 'a guna ḇato mada'a pa'i 'imam 'agung ḇato.

⁹ Gena-ge 'i dadi gabara di'a 'orasa nange-ne mangale bu-bula'a—bu-bula'a re jou-jou haiwani ga'a sidoa'a ra Ma Jou'ongu Madutu, enanga ngai moi i'a ua nyengara ya sigofi ngowa'a manga 'akala re sinyingara ma kanau ga'a pula'a jou-jou.

¹⁰ Sababu 'atoranga-'atoranga gena-ge pa'i mangale ngo-ngoromo re ka'e re ḏi'i ma duhu sa'olo ngowa'a nyengara 'aḏi sigofi manga lese masiretene ḇato. Mo-moini gena-ge enanga 'i si'a'a singadolo Ma Jou'ongu Madutu 'ai jaji ma su-sungi 'i ngadolo.

¹¹ Mada'a wakutu Kristus 'o waiti sa'olo 'Imam 'Agung, Unanga 'o gasa barakati ga'a ngene nyengara wo dawongo nange-ne. Unanga 'o osama ua toma suyu'u ma dara ga'a manusia raḏi 'a'a toma dungia nena-ne. Unanga 'o osama toma ngi'i ga'a ma tero sa'olo suyu'u, mada'a suyu'u gena-ge toma soroga. Sababu gena-ge suyu'u gena-ge 'i ti-tiai re lebe rousu reo suyu'u toma dungia.

¹² Wakutu Kristus 'o osama toma Kamara Lai 'Ofi-'Ofi toma soroga Unanga 'o mete'e ua Yahudi manga 'imam 'agung manga 'atoranga. Pa'i ananga nga'unu osama Kamara Lai 'Ofi-'Ofi ḇato sababu 'aḏi gasa 'abingi ma ngaunu bolo sapi ra-ramasa ie ma ngaunu sa'olo manga jou-jou. Mada'a Kristus nga'unu 'o osama toma Kamara Lai 'Ofi-'Ofi 'O talaḏi ra Ma Jou'ongu Madutu sababu pa'i Unanga 'ai ngaunu masiretene ḇato. Unanga 'o osama pa'i soi moi ḇato sababu 'Ai ngaunu ri situusu ngene kasingado-ngadolo i'a.

¹³ 'Abingi ma ngaunu bolo sapi ma nau'u ma ngaunu, bolo sapi ma were'a ra-ramasa ie ma 'omanga ga'a ngowa'a raḏi tau'u re sicapuru reo ḇanyo, 'imam-'imam ya siji-jiri enanga gena-ge toma ngowa'a di'a sigofi ananga manga lese, la ananga gena-ge nyengara 'aḏi silamo'o re siḏubuso Ma Jou'ongu Madutu moju.

¹⁴ Na'o ngaunu re 'omanga gena-ge nga'unu 'i sigofi ngowa'a manga lese, Kristus 'ai ngaunu ma kuasa lebe lamo'o i'a: Unanga 'ai ngaunu nga'unu sigofi nanga 'akala re sinyingara ma kanau ga'a 'i faja moju sababu ngene wo mete'e 'agama ma 'atoranga ga'a ma faeda 'i cua, la ngene nga'unu wo silamo'o re siḏubuso Ma Jou'ongu Madutu ga'a 'O 'ahu-'ahu. Kristus nga'unu 'o sidoa'a 'ai lese ga'a kama ḏosa ua ra Ma Jou'ongu Madutu, sababu ri-riono toma Ngagara 'Ofi-'Ofi ga'a 'ahu kasingado-ngadolo i'a.

¹⁵ Ma sababu gena-ge Kristus 'o dadi lese to golona di'a Ma Jou'ongu Madutu 'ai jaji ma su-sungi, la ngowa'a ga'a Ma Jou'ongu Madutu ro 'aro'o, ananga gena-ge nyengara 'aḏi dawongo barakati-barakati kasingado-ngadolo i'a ga'a Unanga 'o sijaji pasala ḏua di'a 'Ai 'umata. Mo-moini gena-ge ri dadi sababu Kristus 'ai se-sengene ri dadi du-duusu di'a sibebasa ngowa'a tamanga ḏosa sababu ananga 'aḏi mete'e 'atoranga ti-tiai ua ra Ma Jou'ongu Madutu 'ai jaji ma siḏa.

¹⁶ Na'o 'age rema surata wasiata, balasu 'age rema bukiti mangale ngowa'a ga'a 'a'a surata gena-ge ro sengene.

¹⁷ Sababu na'o ngowa'a ga'a 'a'a surata gena-ge 'o 'ahu-'ahu moju, surata gena-ge sipake yoḏu'u moju, pa'i nyengara 'a sipake ḇato na'o ngowa'a gena-ge ro sengene.

¹⁸ Sababu gena-ge jaji ma siḏa mai balasu si'aku sah reo ngaunu.

¹⁹ Dadi wakutu 'a Musa 'o singadolo Ma Jou'ongu Madutu 'ai parenta mo-moini toma bangsa Israel togumu i'a unanga 'o 'oro sapi ma ngowa ma ngaunu re 'abingi ma nau'u ma ngaunu, kara 'a sicapuru reo ḇanyo. Togumu gena-ge, unanga 'o 'oro rurubu-rurubu hisop ga'a 'i piri'u reo doba ma gogo ko-kolili, kara 'a tono toma ngaunu gena-ge ga'a ra capuru reo ḇanyo, kara 'a siji-jiri toma ngowa'a Israel re ḏi'i kartasi lo-lolo ga'a ri silefo hukumu ra Ma Jou'ongu Madutu tala.

²⁰ Musa 'a 'a'a so'o gena reo kanau, “Ngaunu nena-ne si'aku sah Ma Jou'ongu Madutu 'ai jaji ga'a ngini balasu na mete'e.”

²¹ So'o gena ḏi'i, Musa 'a siji-jiri ngaunu gena-ge ra Ma Jou'ongu Madutu 'ai suyu'u re 'ori i'a rana mo-moini Tai suyu'u ma dara.

²² Momongolo ua, mete'e Musa 'ai hukumu sa'i mo-moini balasu sigofi reo ngaunu. Re 'o ḏosa pa'i nga'unu sanga singi-ngiranga ḇato na'o 'age rema ngaunu pa'ala.

Yesus 'ai se-sengene di'a singi-ngiranga ḏosa

²³ Sababu gena-ge, 'oru ḇato ga'a ra Ma Jou'ongu Madutu 'ai suyu'u ma dara toma dungia nena-ne, ananga balasu ya sigofi reo haiwani ma ngaunu. Gena-ge 'i dadi gabara 'oru ga'a 'i dadi toma soroga. Mada'a 'oru ḇato ra Ma Jou'ongu Madutu 'ai suyu'u ma dara toma soroga, tantu ḏua enanga gena-ge 'i paralu ngaunu ga'a lebe la-lamo'o reo haiwani ma ngaunu.

²⁴ Sababu Kristus 'o osama ua toma suyu'u ga'a manusia ya 'a'a re enanga gena-ge pa'i gabara ḇato toma suyu'u ma banari, mada'a Unanga 'o osama toma soroga. Re nange-ne Unanga 'o talaḏi ra Ma Jou'ongu Madutu, la 'O manyiata di'a ngene.

²⁵ Unanga 'o osama toma soroga di'a 'A sidoa'a 'Ai diri pa'i soi moi ḇato. Gena-ge ma duhu 'i ma tero ua sa'olo ngowa'a Yahudi ga'a 'aḏi dadi 'imam 'agung. Musungu rimoi soi moi, ananga gena-ge 'aḏi osama toma Kamara Lai 'Ofi-'Ofi 'aḏi gasa haiwani ma ngaunu, re ngaunu gena-ge ananga manga ngaunu ua.

²⁶ Na'o Kristus ro mete'e 'imam 'agung gena-ge manga munara, ma musungu ma jelele i'a Unanga 'o basono sangisara, ma mulaingi toma 'orasa dungia 'i dadi singadolo nange-ne! Mada'a nange-ne, 'orasa nena-ne ga'a 'i co-cori toma kiamata ma 'orasa, Unanga 'o sapolo pa'i soi moi ḇato di'a 'a singi-ngiranga ngene nanga ḏosa Rai lese masiretene ga'a 'i dadi jou-jou.

²⁷ Re mete'e Ma Jou'ongu Madutu 'ai 'akala ma mau, manusia 'aḏi sengene pa'i soi moi ḇato. Togumu i'a kara Unanga na sijuruhakimi.

²⁸ So'o gena ḏi'i, Kristus ro sidoa'a 'Ai lese masiretene soi moi ḇato sa'olo jou-jou ra Ma Jou'ongu Madutu, la 'O singi-ngiranga ngowa'a repe manga ḏosa. Re ḏuanga i'a Unanga dadunu 'o sapolo moju ma soi ḏiḏi, Unanga 'o singi-ngiranga ḏosa riwara, mada'a 'O gasa salamata di'a ngowa'a ga'a 'aḏi totoma Unanga.