'Ibrani 8 - Jaji ma Su-sungi

Yesus ngene nanga 'Imam 'Agung

¹ Ioronongoḏu ngo-ngaku rimoi, ngene ma kanau ma cimi so'o ne: Nanga 'Imam 'Agung 'o tegoro ra Ma Jou'ongu Madutu 'ai giama ma kuwiḏa i'a, Unanga gena-ge ga'a 'Ai kuasa ma pari cua, re 'Imam 'Agung gena-ge 'o parenta mamete'e ra Unanga toma soroga.

² Unanga 'o munara sa'olo 'Imam 'Agung ra Ma Jou'ongu Madutu 'ai suyu'u mode-mode'e toma soroga. Kamara Lai 'Ofi-'Ofi mode-mode'e gena-ge, manusia wa 'a'a ua mada'a Ma Jou'ongu Madutu ra 'a'a.

³ Ma Jou'ongu Madutu 'o tede 'imam 'agung mo-moini di'a gasa bu-bula'a—bu-bula'a re jou-jou haiwani ra Unanga. Dadi so'o gena ḏi'i 'a Yesus, ngene nanga 'Imam 'Agung, Unanga ḏi'i balasu gasa 'ori i'a di'a 'i dadi jou-jou.

⁴ Si'ade-'ade Yesus nange-ne 'o 'ahu toma dungia, Unanga 'o dadi 'imam yoḏu'u. Sababu 'age rema 'imam-'imam moju ga'a sigasa jou-jou mete'e Musa 'ai hukumu.

⁵ 'Imam-'imam gena-ge manga munara ra Ma Jou'ongu Madutu 'ai Kamara Lai 'Ofi-'Ofi toma dungia nena-ne. Kamara Lai 'Ofi-'Ofi gena-ge ma tero sa'olo gabara bolo guḏumingi di'a Kamara Lai 'Ofi-'Ofi toma soroga. Gena-ge ma sababu wakutu Musa mau 'o side'oso Ma Jou'ongu Madutu 'ai suyu'u, Unanga 'o kanau ra Musa so'o ne: “ 'Elingi, ngana balasu no 'a'a suyu'u gena-ge mete'e ma gabara Ngoi reta sijumu ra ngana toma kie 'au nga'ene.”

⁶ Mada'a nange-ne Yesus 'ai munara lebe mulia reo 'imam-'imam gena-ge manga munara. Sababu Yesus 'o dadi lese to golona di'a jaji ma su-sungi ga'a lebe mulia reo jaji ma siḏa. Re Sababu wakutu Ma Jou'ongu Madutu 'o pula'a jaji ma su-sungi gena-ge, Unanga 'o sijaji 'ori i'a lebe mulia di'a ngene reo 'ori i'a toma jaji ma siḏa.

⁷ Na'o jaji ma siḏa kama kuranga ua, ma faeda 'oru mau jaji ma su-sungi?!

⁸ Mada'a Ma Jou'ongu Madutu 'a sanga 'Ai 'umata manga ta-sala singadolo 'O kanau, “ 'Eli-'elingi! Ma 'orasa ḏuanga i'a 'i ngadolo wakutu Ngoi to 'a'a jaji ma su-sungi toma bangsa Israel re bangsa Yehuda.

⁹ Jaji gena-ge ma tero ua sa'olo jaji ma siḏa ga'a Ngoi ta si'a'a ḏua tamanga ete re dotumu wakutu Ngoi to sisupu ananga toma daeraha Mesir. Sababu toma 'orasa gena-ge, ananga ya mete'e ua Ngoi 'ari jaji ma siḏa, dadi ananga Ngoi ta'u siwaro i'a ua.

¹⁰ Mada'a jaji nena-ne ga'a Ngoi ḏuanga i'a ta 'a'a toma 'umata Israel toma biono i'a: Ngoi 'ari hukumu ta sigare tamanga fikirana, re ta silefo tamanga 'akala re sinyingara ma dara. Ngoi to dadi Ma Jou'ongu Madutu ga'a ananga 'aḏi silamo'o re siḏubuso re ananga 'aḏi dadi Ngoi 'ari 'umata.

¹¹ Ngowa'a ga'a manga suku ma tero, ananga matengo re matengo ma'u sidoto'o riwara, bolo ioronongoḏu matengo re matengo ma'u siajele riwara mangale, ‘Ngana balasu no nana'o Ma Jou'ongu Madutu.’ Sababu ananga mo-moini, ce-ceka'a ngadolo la-lamo'o, 'aḏi nana'o Ngoi.

¹² Ananga manga sala, Ngoi ḏuanga i'a ta singi-ngiranga re manga ḏosa-ḏosa, Ngoi ḏuanga ta 'elingi riwara.”

¹³ Sababu Ma Jou'ongu Madutu 'o kanau mangale jaji gena-ge “su-sungi,” Unanga ro 'a'a jaji ma siḏa ri pake riwara. Re 'ori i'a ga'a ri siḏa, ti'ara ua 'i iranga.