'Ibrani 3 - Jaji ma Su-sungi

Yesus lebe kau'u rea Musa

¹ Sababu gena-ge, ioronongoḏu ngo-ngaku rimoi ngene mo-moini ga'a Ma Jou'ongu Madutu ro cumutu re siwola i'a ḏua di'a wo osama toma soroga, ino ngene wa fikiri ngido-ngido mangale Yesus gena-ge. Unanga Ma Jou'ongu Madutu 'ai so-soma'a re nanga 'Imam 'Agung ga'a ngene rewo ngaku.

² Yesus gena-ge ga'a Ma Jou'ongu Madutu 'U cumutu, 'O cufala madutu 'a siḏagi 'Ai munara ra Ma Jou'ongu Madutu tala; ma tero sa'olo 'ua re 'au wali 'a Musa 'o cufala madutu siḏagi 'ai munara ra Ma Jou'ongu Madutu 'ai Wala — gena-ge ma ngale Musa 'a de-de'oso Ma Jou'ongu Madutu 'ai ngitu re ngale.

³ Tai'i wa fikiri ngido-ngido mangale Yesus sababu Unanga gena-ge lebe patasa silamo'o rea Musa, ma tero sa'olo ngowa'a ga'a side'oso wala unanga lebe la-lamo'o reo wala gena-ge masiretene.

⁴ Tantu ḏua, wala enanga madate'oso masiretene ua, 'age tukanga wala ya simomi'i. Mada'a 'oru ḇato toma dungia ma dara, Ma Jou'ongu Madutu 'a sidadi ma tero sa'olo tukanga wala ma sae'e.

⁵ Musa 'o cufala de-de'oso Ma Jou'ongu Madutu 'ai ngitu re ngale ma tero sa'olo falalomu 'o cufala de-de'oso tai tuanga 'ai wala. Re Musa 'o singadolo 'oru ḇato ga'a Ma Jou'ongu Madutu 'a siajele toma bio-biono i'a.

⁶ Mada'a Yesus sa'olo Ma Jou'ongu Madutu 'ai Ngowa'a Nau'u 'o cufala parenta ra Ma Jou'ongu Madutu 'ai Wala — gena-ge ma ngale: Ma Jou'ongu Madutu 'ai ngitu re ngale. Re ngene nena-ne wo osama nyo-nyoimi ra Unanga 'ai ngitu re ngale. Mada'a pa'i na'o ngene wo macako'o namo-namoto tananga ngo-ngaku re wo masinganono tau-taunu mangale 'oru ga'a ḏuanga i'a Ma Jou'ongu Madutu 'o pula'a ra ngene.

Awa ngene nanga 'akala re sinyingara 'i dadi te'e

⁷ Sababu gena-ge, ni 'isene Ma Ngagara 'Ofi-'Ofi. Enanga gena-ge 'I siajele so'o ne: “Na'o toma wangere nange-ne ngini ni 'isene Ma Jou'ongu Madutu 'ai iḏingi,

⁸ awa ngini ninga 'akala re sinyingara 'i dadi te'e ma tero sa'olo ninga ete re dotumu 'au wali toma daeraha baulaco, ananga 'aḏi malawana Ma Jou'ongu Madutu re 'aḏi tai'i Unanga.”

⁹ Ma Jou'ongu Madutu 'o kanau, “Toma daeraha baulaco ninga ete re dotumu, ananga 'aḏi tai'i Ngoi. Kalaha toma musungu nyagi rata ma dara, ananga masiretene ya oḏi'i Ngoi reto 'a'a ga'a hera-heranga ma repe.

¹⁰ Sababu gena-ge, Ngoi ta'u ngamo re Ngoi to kanau, ‘Ananga gena-ge manga 'akala re sinyingara 'i sigasa ananga toma ḏosa tau-taunu, re 'aḏi mete'e ua Ngoi 'ari demo.’

¹¹ Ngoi to porata, dadi ta'u sisasi so'o ne: ‘Ananga ta'u simaha ua 'aḏi osama toma daeraha ga'a Ngoi to sitantukanga ta'u pula'a, la ananga 'aḏi mangomasa mamete'e ra Ngoi.’ ”

¹² Ioronongoḏu ngo-ngaku rimoi ni ma'istiari ino: Awa-awa 'age rema ngowa'a matengo i'a taninga sigolona 'ai 'akala re sinyingara 'i cira re 'ai ngo-ngaku 'i iranga singadolo unanga 'o maḏibo ḏuḏunu re 'o maki-kiḏanga ra Ma Jou'ongu Madutu, ga'a 'O 'ahu-'ahu.

¹³ Dadi awa ḏosa 'i sihaga matengo i'a taninga sigolona singadolo unanga 'o lawana Ma Jou'ongu Madutu. Mada'a ngini balasu ni ma'u pula'a duga re domolo taninga 'ahu ma dara wange moi-wange moi wakutu ngene wo 'ahu-'ahu moju toma 'orasa nange-ne ga'a 'i silefo toma Boku 'Ofi-'Ofi ma dara: “Salamata ma Wangere.”

¹⁴ Sababu ngene mo-moini wo dadi ḏagilomu munara marimoi ra Kristus, na'o ngene wa cako'o namo-namoto nanga ngo-ngaku ra Unanga gena-ge, toma mulaingi i'a moju singadolo ma ḏo-ḏogumu.

¹⁵ Gena-ge ma tero sa'olo 'i silefo ḏua toma Boku 'Ofi-'Ofi so'o ne: “Wangere Nange-ne, na'o ngini ni 'isene Ma Jou'ongu Madutu 'ai iḏingi, awa ngini ninga 'akala re sinyingara 'i dadi te'e, ma tero sa'olo ninga ete re dotumu 'ua re 'au wali, ananga gena-ge ga'a 'aḏi lawana Ma Jou'ongu Madutu.”

¹⁶ 'A guna ga'a 'isene ḏua Ma Jou'ongu Madutu 'ai iḏingi mada'a 'aḏi malawana?! Ananga gena-ge nanga ete re dotumu mo-moini ga'a 'a Musa 'o sisupu toma Mesir.

¹⁷ Re ra guna Ma Jou'ongu Madutu 'o ngamo singadolo ma di'ara musungu nyagi rata ma dara?! Ananga gena-ge nanga ete re dotumu ga'a madiga'a ḏosa re raḏi sengene toma daeraha baulaco.

¹⁸ Wakutu Ma Jou'ongu Madutu 'o sisasi, ma betongo so'o ne: “Ngoi to simaha ua ananga 'aḏi osama toma ngi'i ga'a Ngoi to sitantukanga to pula'a ra ananga, la ananga 'aḏi sanga ngomasa mamete'e ra Ngoi.” Ma Jou'ongu Madutu 'ai demo gena-ge di'a 'a guna?! Gena-ge di'a nanga ete re dotumu ga'a 'aḏi mete'e ua Unanga 'ai parenta.

¹⁹ Sababu gena-ge, ngene rewa waro mangale ananga gena-ge ga'a 'aḏi osama yoḏu'u toma daeraha ga'a Ma Jou'ongu Madutu 'o sitantukanga 'o pula'a ra ananga, sababu ananga 'aḏi ngaku ua Ma Jou'ongu Madutu.