'Ibrani 2 - Jaji ma Su-sungi

Awa sisoi'i tala ninga ngo-ngaku

¹ Sababu gena-ge, ngene balasu macako'o mode-mode'e do-doto'o ga'a ngene rewa 'isene, la awa ngene wa sisoi'i tala nanga ngo-ngaku.

² 'Ua re 'au wali mala'ekata-mala'ekata ro singadolo 'a Musa 'ai hukumu ga'a banari ra ngene nanga ete re dotumu. Re ngowa-ngowa'a ga'a ya mete'e ua re siḏagi ua, ananga sanga hukumu ma'u pasi reo ananga manga ga'a.

³ Dadi na'o ngene wo gare 'akala re sinyingara ua tananga salamata gena-ge, tantu ḏua ngene wo wiḏi yoḏu'u toma sanga hukumu sababu salamata gena-ge lebe la-lamo'o reo Musa 'ai hukumu. Re ngowa'a ma siḏa ga'a siajele habari mangale salamata toma ngowa-ngowa'a, Unanga gena-ge Ma Jou Yesus masiretene! Ḏi'i ananga gena-ge ya isene ḏua Unanga 'ai habari Tai 'uḏu ma betu'u, ananga raḏi dadi sakisi re ya sijarita ḏua ra ngene. Dadi ngene rewa waro habari gena-ge 'i banari.

⁴ Sidogo ḏi'i, Ma Jou'ongu Madutu 'a site'e ngowa'a gena-ge manga sakisi: Unanga 'o pula'a kuasa ra ananga di'a 'a'a ga'a hera-heranga ma fara muḏuo i'a, didina'o heranga re 'ori i'a hera-heranga. Re ḏi'i Unanga 'o pula'a cocatu di'a matengo re matengo mete'e Unanga 'ai 'akala ma mau masiretene. Cocatu gena-ge ma 'asala toma Ngagara 'Ofi-'Ofi.

Salamata ma ngo'omo

⁵ Ma Jou'ongu Madutu 'o pula'a ua kuasa toma mala'ekata-mala'ekata di'a 'o parenta dungia su-sungi ga'a ngene wa kanau nange-ne.

⁶ Ḏi'i 'age bu-bula'a toma Boku 'Ofi-'Ofi ma dara ga'a ngowa'a matengo ro silefo 'o sisakisi so'o ne: “Ya Ma Jou'ongu Madutu, 'oru manusia gena-ge singadolo Ma Jou'ongu Madutu ya'u 'eli-'elingi?! Bolo manusia ma ngowa'a nau'u ga'a pa'i manusia ḇato! Mada'a Ma Jou'ongu Madutu 'u dadanu!

⁷ Ngana no dadi mala'ekata pa'i lebe la-lamo'o ceka'a i'a ḇato reo manusia. Mada'a Ma Jou'ongu Madutu ro pula'a toma manusia ma ḏe-ḏegoro lebe kau'u ga'a 'i mulia re Unanga Ro silamo'o manusia ma tero sa'olo 'olana.

⁸ Re Unanga ro pula'a kuasa toma manusia, la 'aḏi parenta toma 'ori i'a mo-moini.” Na'o Ma Jou'ongu Madutu 'o si'a'a manusia rema kuasa, la 'aḏi parenta toma 'ori i'a mo-moini, gena-ge ma ngale 'ori i'a i'a mai ua bolo matengo i'a mai ua ga'a ta'aloko ua toma manusia manga kuasa. Kalaha so'o gena, toma 'orasa nange-ne ngene wa oḏi'i nyangu mangale manusia rema kuasa toma 'ori i'a mo-moini.

⁹ Mada'a ngene wo oḏi'i Yesus: Ma Jou'ongu Madutu 'o sidadi mala'ekata pa'i lebe la-lamo'o ceka'a i'a ḇato reo Unanga wakutu 'O 'ahu toma dungia nena-ne. Mada'a 'orasa nange-ne, ngene wo oḏi'i Unanga ro sanga ḏe-ḏegoro lebe kau'u ga'a 'i mulia re Ma Jou'ongu Madutu 'U silamo'o sa'olo 'olana. Sababu Unanga 'a basono sangisara ḏua singadolo sengene di'a manusia mo-moini, gena-ge mete'e Ma Jou'ongu Madutu 'ai mura re dadalara.

¹⁰ Ma Jou'ongu Madutu 'o 'a'a 'ori i'a mo-moini toma dungia nena-ne di'a 'Ai maksudu masiretene. Unanga gena-ge ra sitantukanga mangale ngowa'a ma repe 'aḏi dadi 'Ai 'umata re sibalangu 'Ai mulia ra ananga gena-ge. Sababu gena-ge, Yesus ga'a welanga ngo'omo di'a ngene wo sanga salamata, Unanga gena-ge balasu 'o sanga sangisara singadolo 'o sengene, la Unanga nyengara 'o dadi Salamata ma Cimi ga'a 'i ti-tiai.

¹¹ Yesus ga'a 'o sigofi manusia tamanga ḏosa-ḏosa re ananga ga'a sanga sigofi ḏua, ananga gena-ge Ḇaḇa moi. Sababu gena-ge Yesus 'o mara'a ua 'o kanau mangale ananga gena-ge 'Ai ioronongoḏu.

¹² Yesus 'o kanau ra Ma Jou'ongu Madutu so'o ne: “Ngoi ḏuanga i'a to sijarita Tari ioronongoḏu mangale Baba; Ngoi ḏuanga i'a to puji re silamo'o Baba ra ananga manga lo-lomu.”

¹³ Yesus 'o kanau ḏi'i so'o ne: “Ngoi ḏuanga i'a ta sigare 'ari ngo-nganono ra Ma Jou'ongu Madutu.” Re Unanga 'o kanau ḏi'i so'o ne: “Nena-ne Ngoi, mamete'e Tani ngowa-ngowa'a ga'a Ḇaḇa reno pula'a ra Ngoi.”

¹⁴ Ngowa-ngowa'a ga'a Ma Jou'ongu Madutu 'o si'aro'o 'Ai ngowa-ngowa'a, ananga gena-ge manusia remanga lese. Sababu gena-ge, Yesus 'o dadi ngowa'a manusia matengo ma tero sa'olo ngene, la 'ai se-sengene 'i singi-ngiranga 'Iblisi ma kuasa. 'Iblisi gena-ge 'i sigasa manusia toma sengene.

¹⁵ Ma duhu gena-ge, Unanga 'a sibebasa ngene toma basono mojongo sengene ma kuasa, ga'a ri kuasa ngene nanga 'ahu. Ngene wo mojongo maut ma tero sa'olo budaka matengo 'o mojongo 'ai tuanga.

¹⁶ Dadi ngene rewo waro mangale Unanga 'o riono mala'ekata ua, mada'a 'O riono ngene, Abraham 'ai ju'uda.

¹⁷ Sababu gena-ge, Yesus balasu 'o dadi manusia matengo ma tero sa'olo ngene, 'Ai ioronongoḏu, kama ma'u rapu ua. Ma duhu gena-ge, Unanga nyengara 'o dadi 'Imam 'Agung ga'a 'o sijumu 'Ai 'akala re sinyingara ma la-la re 'O cufala munara di'a siḏagi Ma Jou'ongu Madutu 'ai munara, la 'O singi-ngiranga ngene tananga ḏosa.

¹⁸ Re sababu Yesus masiretene 'a basono sangisara wakutu Unanga 'o sanga bo-baja, Unanga nga'unu 'O riono ngowa-ngowa'a ga'a sanga bo-baja ḏi'i.