'Ibrani 12 - Jaji ma Su-sungi

Ma Jou'ongu Madutu 'o doto'o ngene sa'olo 'Ai ngowa'a nau'u

¹ Sababu gena-ge, ngene nena-ne nyengara wo kanau mangale sakisi ma siḏa gena-ge ma repe, ma tero sa'olo kakamo ga'a 'i sigoloḏi ngene. Dadi ngene balasu wo dadi ma tero sa'olo ngowa'a lalara ga'a upa'a 'ori i'a ga'a 'i siḏubuso bolo 'i raiti ra unanga. So'o gena ḏi'i, ngene balasu wo upa'a 'ori i'a ga'a 'i siḏubuso re ḏosa ga'a 'i masiraiti i'a ra ngene. Re ino ngene wo lalara re wo matahana sangisara reo tahana tau-taunu, la nga'unu wa siḏuanga talaḏi tandingi toma biono i'a.

² Ino ngene wo tatamo tau-taunu pa'i ra Yesus ḇato. Sababu Unanga nena-ne 'o welanga salamata ma ngo'omo di'a ngene sababu 'Ai ngo-ngaku ra Ma Jou'ongu Madutu. Re ḏi'i sababu Unanga si'a'a nanga salamata 'i ti-tiai sababu nanga ngo-ngaku ra Unanga. Unanga 'o tahana wakutu sanga sangisara toma ngowa'a ga'a 'U salib. Re kalaha Unanga 'o sengene toma salib, gena-ge ga'a 'i sipula'a mara'a ngowa'a, Unanga 'a kalesanga ua sababu Unanga pa'i 'o 'elingi tau-taunu nena-ne: Togumu i'a 'O sanga roanga. Nange-ne Unanga 'o tegoro ra Ma Jou'ongu Madutu 'ai giama ma kuwiḏa, re 'O parenta mamete'e ra Unanga.

³ Wa fikiri ngido-ngido ma duhu sa'olo Unanga 'ai sangisara ga'a 'o sanga toma ngowa'a baraḏosa ga'a lawana Unanga. Dadi ngini awa ninga 'akala re sinyingara 'i ce-ceka'a re ninga 'akala re sinyingara 'i rapo'o.

⁴ Sababu wakutu ngini ni lawana ngowa'a baraḏosa, ngini ni tahana sangisara nyangu singadolo ninga ngaunu 'i pa'ala ma tero Yesus.

⁵ Re ni sidaioranga ḏua Ma Jou'ongu Madutu 'ai demo nena-ne ga'a 'i pula'a de-de'e ra ngini sababu ngini 'Ai ngowa-ngowa'a nau'u: “ 'Ari ngowa'a nau'u na totoho la-la ino Ma Jou'ongu Madutu 'ai do-doto'o, re awa 'ani 'akala re sinyingara 'i rapo'o na'o Tini ḇangata.

⁶ Sababu Ma Jou'ongu Madutu 'o doto'o toma ngowa'a ga'a Unanga 'o dadalara re 'O sihukumu 'a guna ḇato ga'a Unanga 'ai ngowa-ngowa'a nau'u.”

⁷ Dadi, wakutu ngini ni sanga sangisara, balasu ni tahana. Sababu Ma Jou'ongu Madutu 'o pake sangisara di'a 'O doto'o ngini ma tero sa'olo ḇaḇa 'o pake hukumu di'a 'o doto'o 'ai ngowa'a nau'u. Sanga ua, ḇaḇa 'o doto'o 'ai ngowa'a nau'u so'o gena-ge ua.

⁸ Na'o ngini sanga hukumu ua taninga ḇaḇa toma dungia nena-ne, ngini ngimono madutu ua. So'o gena-ge Ma Jou'ongu Madutu 'o pake sangisara di'a doto'o 'ai ngowa'a nau'u mo-moini. Na'o so'o gena-ge ua, ngene 'Ai ngowa'a nau'u ua, mada'a ngowa'a haram.

⁹ Sidogo ḏi'i, ngene renanga ḇaḇa toma dungia, unanga na sihukumu di'a doto'o ngene, re dadi ngene wo silamo'o unanga, ma la-lamo'o i'a ḏi'i nanga Ḇaḇa toma soroga! Tantu ḏua ngene lebe wo ta'aloko ra Unanga, la ngene sanga 'ahu kasingado-ngadolo i'a.

¹⁰ Nanga ḇaḇa toma dungia nena-ne, ananga 'aḏi sihukumu di'a 'aḏi doto'o ngene toma dungia mete'e 'oru ga'a la-la tamanga fikirana re pa'i ti'ara ua. Mada'a Ma Jou'ongu Madutu 'o pake sangisara di'a doto'o ngene mete'e 'oru ga'a la-la di'a ngene, la wo dadi 'ofi-'ofi mamete'e ra Unanga.

¹¹ Wakutu Ma Jou'ongu Madutu 'o pake sangisara di'a doto'o ngene, nanga 'akala re sinyingara 'i sanangi ua sababu wo basono si-siḏi. Mada'a togumu i'a, ngene wo basono dame tananga 'akala re sinyingara re wo sijumu 'ahu loasa re banari.

Ngene ga'a rewo sanga jaji ra Ma Jou'ongu Madutu, nanga ga'a balasu su-sungi

¹² Sababu gena-ge, ngini ma tero sa'olo ngowa'a lalara ga'a 'ai giama 'i lamahana re 'ai bolono 'i terewete sababu ninga ngo-ngaku 'i lamahana. Dadi ngini balasu ni site'e ninga ngo-ngaku.

¹³ Ngini ninga 'ahu balasu mete'e ngo'omo boloto, la ngowa'a ga'a lamahana re 'aḏi mete'e ngini, ananga gena-ge manga ngo-ngaku 'i dadi lebe te'e. Gena-ge 'i ma tero sa'olo ngowa'a lalara ga'a sipicaru ngo'omo di'a ngowa'a lalara ma lelegu, la ananga 'aḏi ruba ua.

¹⁴ Ngini balasu ni makutale mode-mode'e ni 'ahu dame reo ngowa'a mo-moini. Re ni makutale mode-mode'e ni 'ahu 'ofi-'ofi, sababu pa'i ngowa'a ga'a manga 'ahu so'o gena ḇato, ḏuanga i'a 'aḏi oḏi'i Ma Jou'ongu Madutu.

¹⁵ Ngini ni ma ma'istiari 'ahu matengo re matengo, la matengo i'a mai ua 'o sieanga i'a Ma Jou'ongu Madutu ga'a 'O sijumu 'Ai mura re dadalara ra ngene. Re ngini ni ma'istiari ninga 'ahu matengo re matengo, la matengo i'a mai ua awa ma tero sa'olo go-gahu rema racimi ga'a si'a'a susa ngowa'a, re sigasa ngowa'a repe toma ḏosa ma dara.

¹⁶ Ngini ni ma'istiari ninga 'ahu matengo re matengo, la matengo i'a mai ua awa 'o 'ahu su-sudala, bolo 'o silamo'o ua Ma Jou'ongu Madutu 'ai barakati ma tero 'a Esau. Unanga gena-ge ga'a 'a wu'unu 'ai haku sa'olo ngowa nau'u ma jomolo, di'a pa'i ngo-ngoromo moku moi ḇato!

¹⁷ Togumu i'a, ngini reni waro mangale Esau nyafusu sanga 'ai barakati gena-ge moju tai ḇaḇa, mada'a unanga sanga itomo. Kalaha rai 'ongoro re saḏangutu unanga disa ngo'omo 'a sidiai 'ai ta-sala, mada'a donga ri cua di'a unanga.

¹⁸ 'Ua re 'au wali, Ma Jou'ongu Madutu 'o kanau toma ngowa'a Israel toma Kie Sinai ga'a ngowa'a nyengara 'aḏi lamusu. Wakutu ananga 'aḏi sapolo talaḏi kie gena-ge, 'aḏi oḏi'i u'u leja-lejanga; hafu-hafu re guḏumumutu re rato.

¹⁹ Ananga 'aḏi 'isene terompet ma iḏingi lai siḏi, re Ma Jou'ongu Madutu 'ai iḏingi. Wakutu ananga 'aḏi isene 'Ai iḏingi gena-ge ananga 'aḏi terewete re 'aḏi golo'o mode-mode'e iḏingi gena-ge ya 'isene rawara.

²⁰ Sababu ananga 'aḏi tahana nga'unu ua ya 'isene iḏingi gena-ge 'i kanau ma betongo so'o ne: “ 'Oru ḇato, bae manusia bae haiwani, na'o 'aḏi cigi kie nena-ne balasu sanga poini reo maḏi singadolo sengene.”

²¹ Ngowa'a Israel ga'a ya oḏi'i gena-ge 'aḏi terewete singadolo 'a Musa 'o kanau, “Ngoi to terewete sababu to mojongo masala.”

²² Siḏibo ḏi'i, ngini reni sapolo talaḏi toma Kie Sion, limau Yerusalem toma soroga, gena-ge Ma Jou'ongu Madutu ga'a 'ahu, Unanga 'ai limau. Ngini reni talaḏi toma mala'ekata rema cala-cala ga'a 'o malomu re 'o maroanga talaḏi ra Unanga gena-ge.

²³ Ngini reni sapolo talaḏi ra Ma Jou'ongu Madutu 'ai ngowa nau'u ma jomolo manga lo-lomu, ga'a manga lomanga 'i silefo toma soroga. Ngini reni sapolo talaḏi ra Ma Jou'ongu Madutu ga'a 'o sijuruhakimi manusia mo-moini, ngini reni sapolo talaḏi ḏi'i ngowa'a loasa re banari manga roh, ananga gena-ge ga'a raḏi sengene re raḏi dadi ti-tiai toma soroga.

²⁴ Ngini ni sapolo talaḏi ra Yesus ga'a 'o dadi lese to golona di'a jaji ma su-sungi. Unanga gena-ge 'ai ngaunu lebe rousu rea Habel 'ai ngaunu. Sababu wakutu Yesus 'ai ngaunu 'i pa'ala, Ma Jou'ongu Madutu 'o singi-ngiranga ninga ḏosa. Mada'a wakutu Habel 'ai ngaunu 'i pa'ala, Ma Jou'ongu Madutu 'o sihukumu 'a Kain.

²⁵ Sababu gena-ge, ngini balasu ni ma'istiari ino, awa ni dawongo ua Ma Jou'ongu Madutu 'ai demo. 'Ua re 'au wali, toma dungia ananga ga'a 'aḏi dawongo ua Musa 'ai demo ra Ma Jou'ongu Madutu tala, raḏi sanga hukumu. Tantu ḏua hukumu lebe ḏubuso na'o ngene ḏi'i wo dawongo ua Unanga 'ai demo, Unanga gena-ge ga'a 'o kanau toma soroga!

²⁶ Wakutu Ma Jou'ongu Madutu 'o kanau toma ngowa'a Israel toma Kie Sinai, dungia 'i ela-elala. Mada'a nange-ne Unanga 'o sijaji: “Soi moi moju, pa'i dungia ḇato ua mada'a diwanga ḏi'i, Ngoi ta elala.”

²⁷ 'Ai demo “soi moi moju” ma ngale: Dungia rema dara mo-moini ga'a Unanga ra sidadi, 'i elala re 'i singiranga, la pa'i sisoi'i tala 'ori i'a 'oru ga'a 'i elala yoḏu'u.

²⁸ Sababu gena-ge, ino ngene wo sibere ie nanga murasa ma la ra Ma Jou'ongu Madutu sababu ngene rewo osama nyo-nyoimi ra Unanga 'ai Pareta toma soroga ga'a 'i elala yoḏu'u. Dadi ino ngene wo silamo'o re siḏubuso Ma Jou'ongu Madutu renanga duhu ga'a sisanangi Unanga: Ngene balasu wo silamo'o re ḏi'i wo mojongo Unanga,

²⁹ sababu nanga Jou'ongu Madutu ma tero sa'olo u'u ga'a nyengara siro'u 'oru ḇato.