'Ibrani 10 - Jaji ma Su-sungi

¹ Musa 'ai hukumu pa'i pula'a guḏumingi ḇato 'oru 'ori i'a la-la ga'a enanga ḏuanga i'a 'i dadi. Hukumu gena-ge nga'unu 'i sigasa ua 'ori i'a la-la ga'a Ma Jou'ongu Madutu ra sijaji pasala ḏua. Sababu gena-ge, sanga ua enanga gena-ge nga'unu ya sigofi ngowa'a manga ḏosa wakutu ananga 'aḏi sapolo di'a silamo'o re siḏubuso Ma Jou'ongu Madutu reo jou-jou ga'a ananga ya gasa. Sababu musungu rimoi-musungu rimoi ananga balasu ya si'a'a so'o gena-ge!

² Si'ade-'ade ngowa'a ga'a 'aḏi silamo'o re siḏubuso Ma Jou'ongu Madutu, ananga gena-ge mode-mode'e manga ḏosa ya sigofi ḏua. Tantu ḏua ananga 'aḏi gasa manga jou-jou riwara sababu 'aḏi mabasono tala kamanga ḏosa riwara!

³ Mada'a so'o gena-ge ua! Musungu rimoi-musungu rimoi manga jou-jou ya si'elingi ie tau-taunu mangale ananga ngowa'a baraḏosa!

⁴ Sababu sapi ma ngaunu re 'abingi ma nau'u ma ngaunu 'i singi-ngiranga ngowa'a manga ḏosa yoḏu'u.

⁵ Sababu gena-ge, wakutu Kristus 'o osama toma dungia, Unanga 'o kanau ra Ma Jou'ongu Madutu so'o ne: “Baba 'o mau ua jou-jou bolo bu-bula'a. Siḏibo ḏi'i, Baba ro sidodahe Ngoi 'ari lese 'i dadi jou-jou ga'a Ngoi ḏuanga i'a to sidoa'a ra Baba.

⁶ Baba 'o nyanyaḏi ua ananga manga jou-jou haiwani ga'a 'aḏi tau'u bolo jou-jou di'a singi-ngiranga ḏosa.

⁷ Dadi ngoi to kanau so'o ne: ‘Ngoi nena-ne Ma Jou'ongu Madutu. Ngoi reto sapolo di'a to siḏagi 'Ani mau, ma tero sa'olo 'i silefo toma kartasi lo-lolo mangale Ngoi.’ ”

⁸ Siḏa-siḏa kalaha manga jou-jou mo-moini ga'a 'aḏi pula'a mete'e Musa 'ai hukumu, Kristus 'o kanau ra Ma Jou'ongu Madutu, “Baba 'o nyafusu ua re 'o nyanyaḏi ua manga jou-jou, manga bu-bula'a, manga haiwani tau'u bolo manga bu-bula'a di'a singi-ngiranga manga ḏosa.”

⁹ Gena ḏua, Unanga 'o kanau, “Ngoi nena-ne Ma Jou'ongu Madutu, Ngoi reto sapolo di'a ta siḏagi 'Ani mau.” Dadi Ma Jou'ongu Madutu 'a singi-ngiranga 'atoranga ma siḏa mangale jou-jou re bu-bula'a gena-ge, kara 'A singali reo Kristus 'o dadi jou-jou.

¹⁰ Yesus Kristus ra siḏagi Ma Jou'ongu Madutu 'ai 'akala ma mau. Dadi pa'i soi moi ḇato Unanga 'a sidoa'a 'Ai lese masiretene sa'olo jou-jou di'a ngene. Sababu gena-ge, Ma Jou'ongu Madutu 'o siwola i'a ngene sa'olo dadi 'Ai ngowa'a 'ofi-'ofi kasingado-ngadolo i'a.

¹¹ Yahudi manga 'imam mo-moini 'aḏi te'oso di'a siḏagi manga munara sa'olo 'imam wange moi-wange moi ya sigasa da-dadunu manga jou-jou ma tero. Mada'a jou-jou gena-ge 'i singi-ngiranga 'o ḏosa yoḏu'u.

¹² Siḏibo ḏi'i, Kristus 'o pula'a 'ai jou-jou pa'i soi moi ḇato sababu enanga ri singi-ngiranga ḏosa. Togumu i'a, Unanga gena-ge tegoro ra Ma Jou'ongu Madutu 'ai giama ma kuwiḏa i'a.

¹³ Re 'orasa nange-ne Unanga 'o totoma singadolo 'Ai lawana Ma Jou'ongu Madutu ya'u 'a'a ananga 'aḏi ta'aloko ra Kristus.

¹⁴ Sababu pa'i reo 'Ai jou-jou rimoi ḇato, Kristus 'a singi-ngiranga manga ḏosa kasingado-ngadolo i'a, ananga ga'a Ma Jou'ongu Madutu ya'u siwola i'a sa'olo 'Ai ngowa-ngowa'a 'ofi-'ofi.

¹⁵ Ma Ngagara 'Ofi-'Ofi 'i pula'a sakisi ḏi'i ra ngene mangale gena-ge. Ma siḏa, Enanga gena-ge 'i kanau so'o ne:

¹⁶ “Jaji su-sungi nena-ne, Ngoi ḏuanga i'a to pula'a ra ananga toma 'orasa ga'a 'i ngadolo: Ngoi ḏuanga i'a ta sigare 'ari hukumu tamanga 'akala re sinyingara ma dara, re silefo gena-ge tamanga fikirana.”

¹⁷ Re Enanga 'i kanau ḏi'i: “Ngoi ḏuanga i'a ta 'elingi riwara ananga manga ḏosa-ḏosa re manga kajahatana.”

¹⁸ Dadi manga ḏosa-ḏosa re manga kajahatana Ma Jou'ongu Madutu 'a singi-ngiranga. Sababu gena-ge paralu riwara pula'a jou-jou di'a singi-ngiranga ḏosa!

Ino ngene wo maco-cori ra Ma Jou'ongu Madutu

¹⁹ Sababu gena-ge ioronongoḏu ngo-ngaku rimoi, nange-ne ngene wo mojongo riwara di'a wo sapolo ra Ma Jou'ongu Madutu sababu Yesus 'ai ngaunu. Gena-ge ma tero sa'olo Yahudi manga 'imam 'agung 'o osama gasa haiwani ma ngaunu toma Kamara Lai 'Ofi-'Ofi ma dara.

²⁰ Ngene nyengara wo sapolo wo mete'e ngo'omo su-sungi ra Ma Jou'ongu Madutu. Ngo'omo su-sungi gena-ge 'i sigasa 'ahu, re enanga ri welanga di'a ngene sababu Yesus ro sidoa'a 'Ai lese sa'olo jou-jou di'a ngene. Enanga gena-ge ma tero sa'olo 'Ai lese ri singi-ngiranga ngalana ma da-daku ga'a Yahudi manga 'imam 'agung 'o tola'a i'a di'a osama toma Kamara Lai 'Ofi-'Ofi.

²¹ Re 'orasa nange-ne, Unanga nanga 'Imam 'Agung rai kuasa ra ngene ga'a Ma Jou'ongu Madutu 'ai ngitu re ngale.

²² Sababu gena-ge ino ngene wo maco-cori ra Ma Jou'ongu Madutu renanga 'akala re sinyingara ma dara bo-boloto re nanga ngo-ngaku mode-mode'e. Gena-ge 'i nyengara sababu nanga 'akala re sinyingara ri si'ofi Rai ngaunu dadi ngene wo basono nanga sala riwara re nanga lese mai ri sigofi reo ḇanyo na'o wo sanga baptis.

²³ Ino ngene wo macako'o namo-namoto tananga ngo-nganono ga'a ngene wo kanau toma mandan. Sababu tantu ḏua Ma Jou'ongu Madutu ḏuanga i'a 'a sitotomo 'ai jaji ra ngene.

²⁴ Ino ngene ma'u sioḏi'i matengo re matengo, la ngene nga'unu wo ma'u babata di'a wo ma'u dadalara matengo re matengo re wo madaga'a 'ori i'a ma la-la.

²⁵ Ino ngene wo malomu tau-taunu. Awa ngene ma tero sa'olo ngowa'a lelegu ga'a 'aḏi malomu riwara. Siḏibo ḏi'i, ngene balasu lebe cufala ma'u babata matengo re matengo di'a malomu, sababu ngene wo waro mangale ti'ara riwara Ma Jou ḏuanga i'a 'o sapolo moju.

²⁶ Sababu na'o ngene rewo waro habari ga'a ba-banari ra Ma Jou'ongu Madutu tala, mada'a ngene wo sangaja wo 'a'a ḏosa tau-taunu, jou-jou 'i cua ḏua di'a singi-ngiranga nanga ḏosa,

²⁷ mada'a pa'i rimoi ḇato: Ngene wa totoma renanga mojongo di'a talaḏi Unanga ga'a 'o sijuruhakimi ngene. Re Unanga 'ai hukumu ma tero sa'olo u'u ma lejanga ḏuḏurana tau'u la-lamo'o ga'a ḏuanga i'a singi-ngiranga 'Ai lawana.

²⁸ 'A guna ḇato ga'a 'o sangaja mete'e ua Musa 'ai hukumu sababu 'a dawongo ua re 'o ta'ajiri enanga gena-ge sa'olo 'ori i'a ma faeda 'i cua, re 'age nga muḏiḏi bolo nga ḏu'ange sakisi 'aḏi kanau unanga ro 'a'a so'o gena, ḏua Musa 'o sijumu ua 'ai 'akala re sinyingara ma la-la re 'o singe-ngeta'a hukumu sengene ra unanga gena-ge.

²⁹ Tantu ḏua, hukumu lebe tubuso i'a ḏi'i di'a 'a guna ḇato ga'a dawongo ua Kristus sa'olo 'ai 'Imam 'Agung! Gena-ge ma tero sa'olo ngowa'a gena-ge 'o sito-to'u Ma Jou'ongu Madutu 'ai Ngowa'a Nau'u re 'o ta'ajiri Kristus 'ai ngaunu ma faeda 'i cua. Ngaunu gena-ge ga'a ri si'aku sah jaji ma su-sungi re Ma Jou'ongu Madutu 'a pake di'a siwola i'a ngowa'a gena-ge ra Unanga masiretene. Sidogo ḏi'i ngowa'a gena-ge 'o sileleje Ma Ngagara 'Ofi-'Ofi ga'a 'i pula'a Ma Jou'ongu Madutu 'ai mura re dadalara ra ngene.

³⁰ Sababu ngene rewo waro mangale Ma Jou'ongu Madutu ro kanau, “Ngoi ḏuanga i'a ta balasa ninga ga'a ma jira, Ngoi ḏuanga i'a tini hukumu.” Re ḏi'i Unanga ro kanau, “Ngoi ḏuanga i'a to sijuruhakimi 'Ari 'umata.”

³¹ Sababu gena-ge, na'o ngene wo sangaja wo 'a'a ḏosa tau-taunu, ngene balasu 'o basono mojongo madutu, sababu ngene ḏuanga i'a wo sanga hukumu ra Ma Jou'ongu Madutu ga'a 'O 'ahu kasingado-ngadolo i'a!

³² Mada'a 'eli-'elingi 'orasa toma ḏuḏunu ioronongoḏu ngo-ngaku rimoi, wakutu ngini ni ngaku Habari Roanga ma mulaingi, ga'a ma tero sa'olo Ma Jou'ongu Madutu 'ai cahaya Nu'u 'erese ḏua. Ngini tantu ni basono sangisara ma repe, mada'a ni macako'o namo-namoto moju taninga ngo-ngaku.

³³ Soi rai o'o i'a ngowa'a nu'u si'u'ua, re nu'u sikisa toma mandan. Soi rai o'o i'a ḏi'i, ngini ni riono ioronongoḏu ngo-ngaku rimoi ga'a sanga kangela ma tero.

³⁴ Sababu ngini reni basono sangisara re kangela ma'u mete'e ioronongoḏu ngo-ngaku rimoi toma bui. Re ḏi'i ngini ninga 'akala re sinyingara kangela ua wakutu ngowa'a ya ra-rabasa ngini ninga 'ori i'a rana. Ma nyonyata ngini ni maroanga, sababu ngini ni waro toma soroga 'age ngini ninga harata moju ga'a 'i kasingado-ngadolo i'a re lebe la-lamo'o reo harata ga'a ngowa'a ya ra-rabasa.

³⁵ Sababu gena-ge, awa ninga 'akala re sinyingara 'i rapo'o. Sababu na'o ngini ni macako'o namo-namoto taninga ngo-ngaku tau-taunu ma tero sa'olo ma mulaingi, ḏuanga i'a ngini ni dawongo ngogele ga'a 'i lamo'o masala.

³⁶ Dadi, ngini balasu ni pake 'akala ma ḇanyo re ni ngaku tau-taunu, la ngini nga'unu ni 'a'a 'oru ḇato mete'e Ma Jou'ongu Madutu 'ai 'akala ma mau. Na'o so'o gena ngini ḏuanga i'a ni dawongo 'oru ga'a Unanga 'o sijaji.

³⁷ Sababu toma Boku 'Ofi-'Ofi ri silefo so'o ne: “Pa'i ngomasa moi ḇato, Unanga ga'a ḏuanga i'a 'o sapolo, Unanga 'o mati-ti'ara ua di'a 'O sapolo. Unanga 'a tuda-tuda ua 'Ai ta-sapolo.”

³⁸ Re Ma Jou'ongu Madutu 'o kanau so'o ne: “Mada'a 'Ari 'umata ga'a manga 'ahu loasa re banari, ananga gena-ge balasu 'aḏi 'ahu sijumu manga ngo-ngaku. Re na'o 'age rema ngowa'a tamanga sigolona ga'a 'aḏi madorusu tamanga ngo-ngaku, Ngoi to sanangi ua ra ananga gena-ge.”

³⁹ Mada'a ngene nena-ne 'Ai 'umata ga'a ḏuanga i'a wo sanga 'Ai hukumu ua sababu ngene wo madorusu ua tananga ngo-ngaku. Ngene ngowa'a ga'a raḏi ngaku Ma Jou'ongu Madutu; dadi Unanga ḏuanga na sisalamata ngene.