Galatia 6 - Jaji ma Su-sungi

Ma'u riono matengo re matengo

¹ Ioronongoḏu ngo-ngaku rimoi, na'o 'age rema ngowa'a matengo i'a ro ngaku Yesus 'o madaga'a ḏosa, ngini ga'a ninga 'ahu Ma Ngagara 'Ofi-'Ofi ya parenta, ngini balasu na'u sinyanyasele ngowa'a gena-ge, la 'o maḏibo toma ngo'omo boloto. Mada'a ngini na si'a'a reninga 'akala re sinyingara mereoso. Re ḏi'i ngini ni ma'istiari, la ngini masiretene ni sanga bo-baja ua di'a madaga'a ḏosa ḏi'i.

² Wakutu matengo i'a sanga susa, ngini balasu ni ma'u riono. Na'o ni madaga'a so'o gena, ngini ni mete'e Kristus 'ai hukumu.

³ Na'o matengo i'a 'o basono tala unanga lebe la-lamo'o, momongolo ua so'o gena ua, unanga gena-ge 'a sihaga unanga 'ai diri masiretene.

⁴ Matengo re matengo balasu ma'insafu 'ai diri masiretene: bae 'ai ga'a 'i rousu, bae 'i rousu ua. Na'o 'ai ga'a 'i rousu, kara unanga 'o maroanga. Mada'a awa 'a site-tero 'ai ga'a reo ngowa'a lelegu manga ga'a.

⁵ Sababu matengo re matengo matara doiti 'ai gina di'a 'ai ga'a masiretene.

⁶ 'A guna ḇato ga'a dawongo do-doto'o mangale Kristus tai guru; unanga gena-ge balasu 'a pula'a ceka'a i'a 'ai ngo-ngoromo bolo pipisi tai guru gena-ge.

⁷ Ni ma'istiari! Awa ni sihaga ninga diri mangale ngini nga'unu ni sihaga Ma Jou'ongu Madutu: 'Oru ḇato ngowa'a 'aḏi maso'ana, ananga ya 'utu'u enanga ma sowo'o:

⁸ Na'o ngowa'a 'aḏi maso'ana mete'e manusia manga nyafusu ma jira, ḏuanga i'a Ma Jou'ongu Madutu ya'u sihukumu kasingado-ngadolo i'a. Mada'a na'o ananga 'aḏi maso'ana mete'e Ma Ngagara 'Ofi-'Ofi ma nyafusu, ananga ḏuanga i'a ya basono 'ahu kasingado-ngadolo i'a toma Ngagara 'Ofi-'Ofi ino.

⁹ Sababu gena-ge, kalaha wo basono momoro, awa ngene wo matogumu 'a'a 'ori i'a ma la-la. Sababu na'o ngene wo madaga'a 'ori i'a ma la-la tau-taunu, ḏuanga i'a enanga ma 'orasa 'i ngadolo ngene wa sanga enanga ma sowo'o.

¹⁰ Sababu gena-ge, 'age renanga donga moju ra ngene, ngene balasu wo madaga'a 'ori i'a ma la-la ra guna ḇato, ma la-lamo'o i'a toma ngowa-ngowa'a ga'a manga ngo-ngaku 'i marimoi ra ngene.

Paulus 'o siḏingoto tabea re 'o si'elingi toma jama'ata

¹¹ Tailako la-la 'ori i'a ga'a ngoi masiretene ta lefo ma hurufu pako-pako.

¹² Ngowa'a gena-ge 'aḏi makutale simau-mau ngini di'a ni masuna sababu ananga gena-ge 'aḏi mau matoro toma ngowa'a Yahudi mangale ma duhu sa'olo 'aḏi mete'e 'atoranga pa'i ngowa'a nyengara 'aḏi oḏi'i ḇato. Ananga pa'i 'aḏi 'a'a so'o gena ḇato, la awa ngowa'a Yahudi ya'u sisikisa ananga. Sababu na'o ananga 'aḏi singadolo mangale Ma Jou'ongu Madutu 'o sisalamata pa'i ngowa'a ga'a 'aḏi ngaku ra Kristus 'ai se-sengene toma salib ḇato, ngowa'a Yahudi ya'u sisikisa.

¹³ Momongolo ua, ngowa-ngowa'a ga'a ya mete'e suna ma 'atoranga mai, ananga gena-ge ya mete'e Musa 'ai hukumu mo-moini ua. Mada'a ananga pa'i 'aḏi mau ngini ni sanga suna, la ananga nga'unu 'aḏi matoro sababu ngini reni mete'e manga suna ma 'atoranga.

¹⁴ Mada'a ngoi masiretene to oḏu'u madutu to matoro mangale 'oru ḇato, ḏuga-ḏuga ngoi mau to sitoro mangale nanga Jou Yesus Kristus ga'a ro sengene toma salib di'a ngene. Sababu Unanga 'ai se-sengene gena-ge, ngoi to 'ahu ma tero ua sa'olo manusia toma dungia nena-ne ga'a 'aḏi mete'e manga nyafusu ma jira. Re ḏi'i, manusia toma dungia nena-ne ya sahe ua mangale 'ari 'ahu marimoi ra Ma Jou Yesus.

¹⁵ Bae sanga suna bae sanga suna ua, gena-ge 'i 'oru ua. Mada'a ma la-lamo'o ma re'u i'a so'o ne: Ngowa'a matengo balasu dadi ma tero sa'olo manusia su-sungi sababu ro dawongo 'ahu su-sungi toma Ngagara 'Ofi-'Ofi ino.

¹⁶ Ngoi to golo'o ra Ma Jou'ongu Madutu mangale 'O pula'a dame re 'O sijumu dadalara toma ngowa'a mo-moini ga'a manga 'ahu 'i mete'e Ma Ngagara 'Ofi-'Ofi ma nyafusu, ananga ga'a raḏi osama nyo-nyoimi ra Ma Jou'ongu Madutu 'ai 'umata, Unanga 'ai bangsa Israel mode-mode'e.

¹⁷ Ma ḏo-ḏogumu, awa matengo i'a dadunu 'o sikangela ngoi moju. Sababu tari lese 'age rema bukiti-bukiti ga'a ngoi to sanga sikisa, sababu ngoi Yesus 'ai so-soma'a.

¹⁸ Ioronongoḏu ngo-ngaku rimoi, ngoi to manyiata to golo'o ra Yesus Kristus, nanga Jou, mangale 'Ai mura re dadalara sieanga i'a ngini ua. 'Amin.