Galatia 4 - Jaji ma Su-sungi

¹ Mangale gena-ge, ino ngoi ta sitarangi ra ngini: Kalaha matengo ga'a 'o warisi ma jengeta'a re dadi unanga warisi ma gu-gu'u, unanga 'o gu'u haku yoḏu'u na'o unanga 'o ngowa 'olo moju. Sababu gena-ge, unanga ma tero sa'olo budaka ḇato sababu unanga 'ai kuasa cua moju.

² Sidogo ḏi'i, 'age rema ngowa'a 'u 'aturu unanga 'ai paralu re 'u jaga-jaga unanga 'ai warisi, singadolo enanga ma 'orasa 'i ngadolo ga'a 'ai ḇaḇa 'a sitantukanga.

³ So'o gena ḏi'i di'a ngene: Wakutu ngene wo ngaku Kristus nyangu, ngene ma tero sa'olo ngowa 'olo moju. Re ngene rewo mete'e dungia ma 'atoranga singadolo enanga gena-ge 'i sibudaka ngene.

⁴ Mada'a wakutu ma 'orasa ri ngadolo, ga'a Ma Jou'ongu Madutu ro sitantukanga pasala ḏua, Unanga 'o siḏingoto 'ai Ngowa'a Nau'u sapolo toma dungia. Re we-were'a matengo mu sibuoro Unanga. Sababu gena-ge sa'olo ngowa'a Yahudi, Unanga balasu 'o ta'aloko ra Musa 'ai hukumu.

⁵ Unanga 'o sapolo di'a 'O tuusu ngowa-ngowa'a ga'a Musa 'ai hukumu 'i parenta manga 'ahu, la ngene nyengara wo dadi Ma Jou'ongu Madutu 'ai ngowa-ngowa'a nau'u.

⁶ Re sababu ngini mode-mode'e reni dadi Ma Jou'ongu Madutu 'ai ngowa-ngowa'a nau'u, Unanga gena-ge 'o siḏingoto 'Ai Ngowa'a Nau'u 'Ai Roh, di'a 'i osama ra ngini ninga 'akala re sinyingara ma dara. 'Ai Roh gena-ge 'i munara ra ngini ninga 'akala re sinyingara ma dara singadolo ngene nyengara wo maḏigaro'o ra Ma Jou'ongu Madutu, “Baba, 'ari Ḇaḇa!”

⁷ Sababu gena-ge, 'orasa nange-ne, ngini ni dadi budaka riwara mada'a reni dadi Ma Jou'ongu Madutu 'ai ngowa-ngowa'a nau'u. Sababu gena-ge, ngini reni dadi warisi ma jengeta'a ḏi'i re Ma Jou'ongu Madutu ḏuanga i'a 'o pula'a 'ai barakati mo-moini ra ngini, ga'a Unanga ro sijaji pasala ḏua.

Paulus 'ai 'akala kangela toma ngowa-ngowa'a Galatia

⁸ Ma siḏa, ngini ni nana'o ua Ma Jou'ongu Madutu, dadi ngini ni dadi budaka toma roh-roh ga'a ni ta'ajiri enanga rema kuasa. Mada'a enanga gena-ge mode-mode'e jou'ongu-jou'ongu ua.

⁹ Mada'a toma 'orasa nange-ne, ngini reni nana'o Ma Jou'ongu Madutu; re lebe rousu ḏi'i, Ma Jou'ongu Madutu ro nana'o ngini! Dadi, i'a sa'olo ngini ni maḏibo moju ni mete'e dungia ma 'atoranga?! 'Atoranga gena-ge 'i lamahana re ma faeda 'i cua di'a sigasa ngene toma salamata. Dadi, i'a sa'olo ngini mau ni dadi budaka moju toma enanga gena-ge?!

¹⁰ Ngoi to kanau so'o gena, sababu ngini ni situbo re ni silamo'o wangere enanga rema wangere, ngara enanga rema ngara, musungu enanga rema musungu!

¹¹ Sababu gena-ge, ngoi to dodato: Awa-awa 'ari galasau'u ma duduala di'a ngini, enanga 'i parasaja.

¹² 'Ari ioronongoḏu ngo-ngaku rimoi, ngoi to golo'o mode-mode'e ra ngini, la ngini ni dadi sa'olo ngoi ḏi'i. Sababu ngoi ḏi'i to dadi sa'olo ngini, ngowa-ngowa'a Yahudi ua ga'a mete'e ua Musa 'ai hukumu. Ma di'ara nena-ne, ngini ni madaga'a kaninga sala ua ra ngoi.

¹³ Tantu ḏua, ngini na sidaioranga ua mangale 'au nga'ene ngoi to singadolo Habari Roanga ra ngini. Gena-ge 'i dadi sababu ngoi reta sanga ma si-siḏi.

¹⁴ Toma 'orasa gena-ge, kalaha 'ari si-siḏi 'i sikangela ngini, ngini ni itomo ngoi ua. Siḏibo ḏi'i, ngini ni dawongo ngoi ma tero sa'olo ni dawongo mala'ekata matengo ra Ma Jou'ongu Madutu, bolo ni dawongo Yesus Kristus masiretene.

¹⁵ Ngini ḏi'i ni maroanga madutu, wakutu ni dawongo Habari Roanga. Mada'a 'orasa nange-ne, le'a ninga roanga gena-ge?! Toma 'orasa gena-ge, ngoi to waro ngini mau ni sipula'a 'oru ḇato ga'a ngoi ta paralu. Na'o nyengara, ni cuḇulenge ninga la'o ma moi'i di'a ngoi.

¹⁶ 'Orasa nange-ne, ngini ni magoro ino ngoi ne sa'olo ninga lawana sababu ngoi to siajele 'oru ga'a 'i banari?!

¹⁷ 'Age rema ngowa'a ga'a doto'o ngini mangale ngini balasu ni mete'e Musa 'ai hukumu. Ananga gena-ge 'aḏi makutale mode-mode'e 'aḏi mau baja ngini di'a ni marimoi ra ananga. Mada'a manga 'akala re sinyingara 'i cira. Ananga gena-ge 'aḏi mau ya sito-tola'a ngene ga'a ma'u gasa la, la ngini ni mete'e ananga ḇato reninga 'akala sa-sanangi.

¹⁸ Tantu ḏua lai rousu, na'o ngini ni mete'e 'ori i'a reninga 'akala re sinyingara mode-mode'e. Mada'a ngini ni mete'e so'o gena-ge di'a pa'i 'ori i'a ga'a 'i banari! Re ḏi'i, ngini ni 'a'a so'o gena-ge tau-taunu. Awa pa'i wakutu ngoi 'age taninga sigolona, mada'a wakutu ngoi to cua taninga sigolona ḏi'i, mai ngini balasu ni 'a'a so'o gena ḏi'i.

¹⁹ 'Ari ngowa-ngowa'a ga'a tunu dadalara, 'orasa nange-ne ngoi to basono kangela ma tero sa'olo we-were'a matengo mo basono sangisara sa'i mo maḏe-ḏegoro i'a. Ngoi ḏuanga i'a ta basono kangela, singadolo Kristus 'ai de'oso re ḏegoro ri konyo tiai taninga 'akala re sinyingara ma dara.

²⁰ 'Orasa nange-ne ngoi to mau masala ngoi 'age taninga sigolona, la ngoi to kanau reo demo ma lelegu; demo-demo ga'a 'i rousu ra ngini. Mada'a ngoi ta waro gogare riwara, sababu kalaha ngowa'a ma lelegu manga do-doto'o 'i banari ua, ngini ni mete'e do-doto'o gena-ge! Dadi ngoi ta waro ua ngoi balasu to kanau 'oru ra ngini!

Ngo Hagar re ngo Sara sa'olo nana'o romoḏiḏi

²¹ Ioronongoḏu ngo-ngaku rimoi, ngini ga'a ni mau ta'aloko ra Musa 'ai hukumu; tai'i na sigi-gisene ngoi 'ari demo! Ngoi ḏuanga i'a to siajele ra ngini mangale 'oru ga'a 'i silefo ra Musa 'ai hukumu ma boku:

²² Toma boku gena-ge 'i silefo mangale Abraham 'ai ngowa nau'u nga muḏiḏi. Ngina matengo we-were'a budaka ua re ngina lelegu, we-were'a budaka.

²³ Abraham 'ai ngowa'a nau'u matengo ga'a 'u sibuoro tai ngina ga'a we-were'a budaka, unanga 'o sibuoro biasa, mete'e manusia manga mau masiretene. Mada'a ngowa'a nau'u matengo ga'a 'o sibuoro tai ngina ga'a we-were'a budaka ua, unanga 'u sibuoro mete'e Ma Jou'ongu Madutu 'ai jaji ra Abraham

²⁴ Gena-ge 'i dadi sa'olo nana'o romoḏiḏi. We-were'a nga muḏiḏi ma tero sa'olo jaji romoḏiḏi. Jaji rimoi ma 'asala toma hukumu ga'a Ma Jou'ongu Madutu ro pula'a ra Musa toma Kie Sinai. Jaji gena-ge ma tero sa'olo ngo Hagar ga'a we-were'a budaka re munanga 'ami ngowa re danongo 'aḏi dadi budaka ḏi'i.

²⁵ Dadi ngo Hagar munanga ma tero sa'olo Kie Sinai toma Arab re munanga ḏi'i ma tero sa'olo limau Yerusalem toma 'orasa nange-ne. Sababu nange-ne, ngowa'a toma limau gena-ge raḏi dadi budaka ra Musa 'ai hukumu.

²⁶ Mada'a ngo Sara we-were'a budaka ua ma tero sa'olo Yerusalem ga'a toma soroga. Sababu munanga gena-ge re 'ami ngowa'a 'aḏi 'ahu bebasa ra Musa 'ai hukumu. Re ḏi'i munanga mo dadi ngina di'a ngowa'a mo-moini ga'a raḏi bebasa ra Musa 'ai hukumu.

²⁷ Sababu 'i ma tero ḏi'i 'i silefo toma Boku 'Ofi-'Ofi so'o ne: “Maroanga, ngana we-were'a ga'a no ngonono sanga ngowa'a ua, Ilele rema monere! Kalaha ngana gena-ge na basono nyangu enanga ma sangisara wakutu no maḏe-ḏegoro i'a Sababu ngana gena-ge kami nau'u ua ḏuanga i'a no sanga ngowa'a lebe repe reo we-were'a rami nau'u.”

²⁸ Dadi ngini 'ari ioronongoḏu ngo-ngaku rimoi, ngini reni dadi Ma Jou'ongu Madutu 'ai ngowa-ngowa'a nau'u mete'e Ma Jou'ongu Madutu 'ai jaji: Ngini ma tero sa'olo ngo Sara 'ami ngowa'a Ishak, ga'a mu sibuoro mete'e Ma Jou'ongu Madutu 'ai jaji ra Abraham.

²⁹ Ma siḏa, ngo Hagar 'ami ngowa'a nau'u matengo gena-ge ga'a sibuoro mete'e manusia manga mau, unanga gena-ge 'o sisikisa ngo Sara 'ami ngowa'a nau'u ga'a mu sibuoro mete'e Ma Ngagara 'Ofi-'Ofi ma kuasa. So'o gena ḏi'i nange-ne, ngowa'a ga'a 'aḏi mete'e Musa 'ai hukumu 'aḏi sisikisa Ma Jou'ongu Madutu 'ai ngowa-ngowa'a.

³⁰ Mada'a toma Boku 'Ofi-'Ofi 'i silefo so'o ne: “Dusu'u we-were'a budaka re 'ami ngowa'a nau'u matengo. Sababu 'ami ngowa'a nau'u matengo gena-ge 'o sanga warisi ua tai ḇaḇa. Pa'i we-were'a budaka ua 'ami ngowa'a nau'u 'o sanga warisi tai ḇaḇa.”

³¹ Sababu gena-ge, ioronongoḏu ngo-ngaku rimoi ngene wo dadi ma tero ua sa'olo we-were'a budaka 'ami ngowa-ngowa'a ga'a raḏi budaka ra Musa 'ai hukumu. Siḏibo ḏi'i, ngene wo dadi ma tero sa'olo we-were'a budaka ua 'ami ngowa-ngowa'a, sababu ngene rewo ngaku Yesus Kristus.