Filipi 3 - Jaji ma Su-sungi

Ba-banari madutu

¹ Ma ḏo-ḏogumu, ioronongoḏu ngo-ngaku rimoi, ngini balasu ni maroanga sababu ngini reni marimoi ra Ma Jou. Ngoi to basono kangela ua di'a to dadunu to lefo 'oru ga'a ta siḏingoto ḏua ra ngini 'au nga'ene; sababu ngoi mau to sipo-poma ngini, la 'a guna ḇato nga'unu sihaga ngini yoḏu'u.

² Ni ma'istiari toma ngowa-ngowa'a ga'a 'aḏi madaga'a 'ori i'a ma jira re 'aḏi patasa si'aro'o ananga nunu'u tata-goḏi. Ni ma'istiari ra ananga, sababu ananga mau 'aḏi simau-mau ngowa'a di'a 'aḏi sanga suna.

³ Momongolo ua, ngene nena-ne ga'a sanga ḏua suna 'i banari ga'a rewo dadi mode-mode'e Ma Jou'ongu Madutu 'ai ngowa-ngowa'a sababu rewo ngaku Kristus Yesus. Ngene nena-ne ga'a Ma Ngagara 'Ofi-'Ofi na sinyanyasele wakutu wo silamo'o re siḏubuso Ma Jou'ongu Madutu. Re ḏi'i ngene sibere ie nanga murasa ma la sababu ngene nanga 'ahu marimoi ra Kristus Yesus. Ngene nena-ne ga'a wo sigare ua nanga ngo-nganono mete'e 'agama ma 'atoranga di'a sisalamata ngene.

⁴ Kalaha so'o gena-ge, ngoi nyengara to sigare 'ari ngo-nganono mete'e 'agama ma 'atoranga gena-ge. Si'ade-'ade i'a 'age rema ngowa'a matengo i'a rai 'alasana-'alasana di'a 'o sigare ngo-nganono mete'e 'agama ma 'atoranga di'a sisalamata unanga, ngoi mai rari 'alasana lebe te'e i'a ḏi'i:

⁵ Ngoi to sanga suna wakutu 'ari 'umuru wangere tu'angere mete'e Musa 'ai hukumu. Ngoi 'ari ngaunu pa'ala re 'ari 'asala toma suku Benyamin, 'ari ete re dotumu mo-moini ngowa'a 'Ibrani. Wakutu ngoi to ngaku Yesus nyangu, ngoi to osama nyo-nyoimi toma ngowa'a Farisi, to mete'e Yahudi manga 'agama ma 'atoranga mo-moini,

⁶ Ngoi to mete'e mode-mode'e 'a Musa 'ai hukumu singadolo ngoi to sisikisa ngowa-ngowa'a ngaku Yesus. Re ngoi to cufala masala to mete'e Musa 'ai hukumu mo-moini, singadolo matengo i'a mai ua nyengara 'o kanau, ceka'a i'a mai ua, ngoi Paulus ta mete'e ua.

⁷ Ma siḏa, ngoi to mafikiri enanga mo-moini gena-ge 'i sigasa Ma Jou'ongu Madutu 'ai barakati ma repe ra ngoi. Mada'a 'orasa nange-ne, ngoi reta waro enanga mo-moini gena-ge ma faeda 'i cua. Momongolo ua, enanga 'i sigasa rugi ra ngoi, sababu enanga 'i dola'aku ngoi to nana'o Kristus!

⁸ Pa'i gena-ge ḇato ua, mada'a mo-moini ma tero sa'olo enanga gena-ge ga'a ngoi ta 'a'a ma siḏa, nange-ne ngoi ta site-tero enanga gena-ge ma faeda 'i cua ra ngoi. 'Oru ga'a 'age ra ngoi toma 'orasa nange-ne enanga ma ijana lai hali madutu, gena-ge mangale nana'o Kristus Yesus 'ari Jou. Sababu Kristus, ngoi ta sieanga mo-moini ga'a ma siḏa ngoi to site-tero 'i sigasa Ma Jou'ongu Madutu 'ai barakati ra ngoi. Mo-moini gena-ge ma tero sa'olo jeremoto, la ngoi nga'unu to dawongo Kristus,

⁹ re ngoi mode-mode'e to marimoi ra Unanga gena-ge. Ngoi to makutale riwara to dadi ngowa'a loasa re banari sababu ngoi to mete'e Musa 'ai hukumu. Siḏibo ḏi'i, Ma Jou'ongu Madutu 'o site-tero ngoi sa'olo ngowa'a loasa re banari sababu ngoi reto ngaku Kristus. Dadi ngoi reto dadi ngowa'a loasa re banari ra Ma Jou'ongu Madutu 'ai momina, pa'i sababu ngo-ngaku ra Kristus ḇato.

¹⁰ Pa'i rimoi ḇato ga'a ngoi to mau, gena-ge mangale ngoi lebe to nana'o Kristus: Ngoi ta basono 'Ai kuasa tari 'ahu ma dara. Kuasa gena-ge ma tero Ma Jou'ongu Madutu 'ai kuasa ga'a dadunu 'U si'ahu moju Unanga toma ngowa'a senge-sengene manga sigolona. Re ḏi'i ngoi ta basono sangisara ma tero sa'olo Unanga ra basono singadolo ngoi nyengara to sengene ma duhu ma tero sa'olo Unanga 'o sengene.

¹¹ Dadi ḏuanga i'a Ma Jou'ongu Madutu 'o dadunu si'ahu moju ngoi toma ngowa-ngowa'a senge-sengene manga sigolona.

Lalara ngadolo ma ḏo-ḏogumu

¹² Ngoi to kanau ua mangale ngoi 'ari duhu 'i ti-tiai bolo 'i ḏu-ḏuanga ḏua, mada'a ngoi to makutale tau-taunu di'a to dadi ma tero sa'olo Kristus Yesus. Ma sababu gena-ge, Unanga ri 'aro'o ngoi di'a to marimoi ra Unanga.

¹³ Ioronongoḏu ngo-ngaku rimoi, tantu ḏua ngoi to site-tero ua mangale ngoi 'ari de'oso re ḏegoro 'i ti-tiai ma tero sa'olo Kristus Yesus. Mada'a 'age hali rimoi moju ngoi balasu ta si'a'a ma tero sa'olo ngoi to lalara toma biono di'a to dedele ma ngogele ga'a da'a tari biono. Ngoi balasu ta sieanga 'oru ga'a ngoi ta si'a'a ma siḏa, re ngoi to makutale dedele tau-taunu mangale 'oru ga'a da'a tari biono.

¹⁴ Sababu gena-ge, ngoi to lalara turusu ta meta-meta i'a 'ari maksudu, la ta sanga ngogele. Gena-ge ma ngale: 'Ahu toma soroga, di'a gena-ge Ma Jou'ongu Madutu ri 'aro'o ngoi di'a to marimoi ra Kristus Yesus.

¹⁵ Dadi, ngene mo-moini ga'a nanga ngo-ngaku ri la'ere, nanga de'oso re ḏegoro balasu so'o gena-ge. Mada'a na'o taninga sigolona 'age rema ngowa'a matengo i'a 'ai 'akala ma sanga lelegu, maha ḏuanga i'a Ma Jou'ongu Madutu 'a sitarangi ḏi'i ra ngini.

¹⁶ Mada'a ngene nanga 'ahu balasu mete'e do-doto'o ga'a Ma Jou'ongu Madutu ra sijumu ḏua ra ngene.

¹⁷ Ioronongoḏu ngo-ngaku rimoi ngini mo-moini, ngoi reto sijumu de'oso re ḏegoro ga'a 'i banari ra ngini, ngini balasu na cuḏuḏu'u de'oso re ḏegoro gena-ge. Sababu gena-ge, tailako la-la ino ngowa'a ga'a 'aḏi mete'e minga de'oso re ḏegoro gena-ge, la na cuḏuḏu'u.

¹⁸ Ma jelele ḏua, ngoi to siajele ra ngini — re nange-ne dadunu ta siajele rari 'ongoro ra ngini — mangale ngowa'a repe manga 'ahu 'i ma'u sabi ḏuḏunu ra Kristus 'ai se-sengene toma salib ma maksudu.

¹⁹ Ma ḏo-ḏogumu tala, ngowa-ngowa'a ga'a 'aḏi 'ahu so'o gena, manga 'ahu 'i iranga sababu ananga 'aḏi silamo'o re siḏubuso manga nyafusu masiretene. Ananga 'aḏi matoro mangale manga de'oso re ḏegoro. Momongolo ua, sipula'a mara'a ananga masiretene. Ananga 'aḏi fikiri pa'i manga 'ahu toma dungia ḇato.

²⁰ Mada'a ngene rewo osama nyo-nyoimi toma Soroga ma Pareta. Re Ma Jou Yesus Kristus, nanga Salamata ma Cimi, ḏuanga i'a dadunu 'o sapolo da'a toma ngi'i gena-ge ino. Unanga gena-ge ga'a ngene wu totoma re wu ga-ganutu.

²¹ Wakutu Unanga gena-ge dadunu 'o sapolo moju, 'O ngali nanga lese ga'a nange-ne mereoso 'i sidadi ma tero sa'olo Unanga 'ai lese masiretene ga'a 'i mulia. Unanga nyengara 'a si'a'a so'o gena sababu Unanga rai kuasa di'a 'O 'a'a 'oru ḇato.