Efesus 2 - Jaji ma Su-sungi

Nyawa 'i 'ahu sababu marimoi ra Kristus

¹ 'Au nga'ene ngini ma tero sa'olo ngowa'a raḏi sengene sababu ni baraḏosa re ni mete'e ua Ma Jou'ongu Madutu 'ai parenta.

² Toma 'orasa gena-ge, ngini ni mete'e dungia ma nyafusu, re ni mete'e 'Iblisi ma kuasa ga'a 'i kuasa toma roh-roh ma jira toma ngawa-ngawa, re ḏi'i 'i kuasa toma ngowa-ngowa'a ga'a mete'e Ma Jou'ongu Madutu ua.

³ 'Au nga'ene, ngene mo-moini wo ma tero sa'olo ananga gena-ge: Nanga 'ahu mete'e dungia ma nyafusu, wo 'a'a 'oru ḇato di'a sisanangi nanga lese re 'akala re sinyingara. Toma 'orasa gena-ge, ngene wo osama nyo-nyoimi ra ananga ga'a ḏuanga i'a sanga hukumu ra Ma Jou'ongu Madutu, ma tero sa'olo ngowa'a lelegu ga'a 'aḏi ngaku Yesus ua.

⁴ Mada'a sababu Ma Jou'ongu Madutu 'o dadalara ngene lai lamo'o, Unanga 'a sijumu 'Ai 'akala re sinyingara ma la-la lai lamo'o ra ngene.

⁵ Kalaha ngene ma tero sa'olo ngowa'a raḏi sengene sababu nanga ḏosa-ḏosa, Ma Jou'ongu Madutu dadunu ro si'ahu moju ngene mamete'e rea Kristus. Sababu gena-ge, pa'i Ma Jou'ongu Madutu 'ai mura re dadalara ḇato, ngene wo sanga salamata.

⁶ Ma Jou'ongu Madutu dadunu ro si'ahu ngene nanga nyawa, ma tero sa'olo Unanga dadunu ro si'ahu Yesus moju toma ngowa'a senge-sengene ma ngi'i. Sidogo ḏi'i, sababu ngene rewo marimoi ra Kristus, enanga 'i ma tero sa'olo Ma Jou'ongu Madutu ro sibere ngene da'u toma soroga re wo tegoro mamete'e ra Kristus toma ngi'i gena-ge. Sababu gena-ge, enanga 'i ma tero sa'olo ngene ḏi'i wo parenta mamete'e ra Yesus Kristus toma soroga.

⁷ Ma Jou'ongu Madutu 'o 'a'a so'o gena, la ḏuanga i'a manusia mo-moini ya oḏi'i mangale Ma Jou'ongu Madutu 'ai mura re dadalara lai lamo'o ra ngene. 'Ai mura re dadalara gena-ge 'a sidodai ra ngene sababu ngene wo marimoi ra Kristus Yesus.

^8-9 I'a sa'olo Unanga ro sisalamata ngini?! Sababu ngini reni madaga'a 'ori i'a ma la-la?! So'o gena-ge ua! Mada'a sababu Unanga 'ai mura re dadalara ra ngini. Ma sababu gena-ge, Unanga ro sisalamata ngini sababu ngini reni ngaku Yesus. Ngini ni sanga salamata sababu ninga de'oso re ḏegoro ma la?! So'o gena-ge ua! Mada'a ngini reni sanga salamata pa'i Ma Jou'ongu Madutu 'ai cocatu ḇato. Dadi matengo i'a mai ua 'o mahie 'ai diri mangale sanga salamata gena-ge,

¹⁰ sababu Ma Jou'ongu Madutu masiretene 'o 'a'a ngene manusia su-sungi wo marimoi ra Kristus Yesus. Ma Jou'ongu Madutu 'o tuhu ngene so'o gena-ge, la ngene nyengara wo 'a'a ga'a ma la-la, ga'a Unanga ra sidodahe di'a ngene.

Marimoi sababu Kristus

¹¹ Sababu gena-ge, ioronongoḏu ngo-ngaku rimoi, ngini ni sibuoro sa'olo ngowa'a Yahudi ua, 'elingi ninga 'ahu ma siḏa: Ngowa'a Yahudi ga'a 'aḏi mafikiri pa'i ananga ḇato Ma Jou'ongu Madutu 'ai 'umata sababu ananga raḏi masuna mete'e Musa 'ai hukumu. Ananga gena-ge 'aḏi si'aro'o ngini “ngowa'a masuna ua”. Mada'a suna gena-ge, manusia ya 'a'a tamanga lese ḇato.

¹² 'Elingi toma 'orasa gena-ge, ngini ni marimoi ra Kristus nyangu, re ni osama nyo-nyoimi ua toma ngowa'a Yahudi ga'a ma 'asala toma Israel ino. Dadi 'oru ḇato ga'a Ma Jou'ongu Madutu ro sijaji di'a ngowa'a Yahudi, ngini ḏuanga i'a sanga ma balangu ua. Ngini ni 'ahu toma dungia, mada'a ngini ni nana'o ua Ma Jou'ongu Madutu dadi ni masinganono yoḏu'u ra Unanga di'a 'O sisalamata ngini.

¹³ 'Au nga'ene, ngini ni kiḏanga ra Ma Jou'ongu Madutu. Mada'a 'orasa nange-ne, sababu Kristus 'ai ngaunu ngini reni masebanga ra Ma Jou'ongu Madutu sababu ngini ni marimoi ra Kristus Yesus.

¹⁴ Kristus masiretene 'O sidame ngene ra Ma Jou'ongu Madutu. Unanga 'o sirimoi ngowa'a Yahudi re ngowa'a Yahudi ua singadolo ananga gena-ge raḏi marimoi re 'aḏi dadi bangsa rimoi. Dadi ananga gena-ge ma'u gugutu riwara. Gena-ge ma tero sa'olo Yesus 'a siruba ge-gelo ga'a sidaku ngowa'a Yahudi re ngowa'a Yahudi ua ga'a si'a'a ananga 'aḏi ma'u ngadolo yoḏu'u.

¹⁵ Unanga masiretene 'o sidoa'a 'Ai lese sa'olo jou-jou rimoi di'a 'A singi-ngiranga Musa 'ai hukumu re 'agama ma 'atoranga. 'Ai maksudu bangsa romoḏiḏi 'i dadi rimoi, ma tero sa'olo manusia su-sungi, ga'a marimoi ra Unanga. Reo duhu gena-ge, Kristus 'o sidame ngowa'a Yahudi re ngowa'a Yahudi ua.

¹⁶ Dadi sababu Yesus 'ai se-sengene toma salib, ngowa'a Yahudi re ngowa'a Yahudi ua 'A sirimoi, re 'A sirimoi ananga ra Ma Jou'ongu Madutu. Sababu gena-ge ananga 'aḏi ma'u gugutu riwara.

¹⁷ Kristus 'o sapolo toma dungia di'a singadolo Habari Roanga ra ngini mangale dame gena-ge, bae ngowa'a Yahudi ua ga'a ma siḏa 'aḏi kiḏanga ra Ma Jou'ongu Madutu, bae ngowa'a Yahudi ga'a masebanga ra Ma Jou'ongu Madutu.

¹⁸ Dadi sababu Kristus, nange-ne ngene mo-moini: bae ngowa'a Yahudi, bae Yahudi ua, nyengara wo sapolo tananga Ḇaḇa. Gena-ge ri dadi sababu kuasa toma Ma Ngagara 'Ofi-'Ofi, pa'i rimoi ḇato, ga'a 'i riono ngene mo-moini.

¹⁹ Sababu gena-ge, 'au nga'ene ngini ga'a ngowa'a Yahudi ua ma tero sa'olo ngowa'a tagi-tagi ino, toma 'orasa nange-ne, so'o gena-ge riwara. Siḏibo ḏi'i, ngini reni dadi Ma Jou'ongu Madutu 'ai 'umata, re reni osama nyo-nyoimi ra Ma Jou'ongu Madutu 'ai ngitu re ngale.

²⁰ Ngini ḏi'i ma tero sa'olo maḏi ga'a ngowa'a ya sifato toma wala ma bangini ma re'u. Bangini gena-ge ma tero sa'olo Yesus 'ai so-soma'a re nabi-nabi re bangini ma maḏi ma re'u i'a gena-ge Kristus Yesus.

²¹ Wala gena-ge 'i te'e sababu 'i simomi'i toma bangini ma maḏi ma re'u i'a, gena-ge Kristus Yesus ga'a 'A dogo lebe lamo'o i'a singadolo 'i dadi Ma Jou'ongu Madutu 'ai Wala ga'a 'i patasa di'a Unanga.

²² Sababu ninga 'ahu marimoi ra Kristus, ngini ḏi'i ni mamete'e reo ngowa'a lelegu, ni simomi'i sa'olo wala ḏu moi di'a Ma Jou'ongu Madutu. Wala gena-ge, Ma Ngagara 'Ofi-'Ofi 'i tegoro.