Efesus 1 - Jaji ma Su-sungi

¹ Ioronongoḏu ngo-ngaku rimoi, ngini ga'a reni dadi Ma Jou'ongu Madutu 'ai 'umata toma limau Efesus. Ngini ga'a reni marimoi ra Kristus Yesus re ni macako'o namo-namoto ra Unanga.

² Ngoi, 'a Paulus, Kristus Yesus 'ai so-soma'a mete'e Ma Jou'ongu Madutu 'ai 'akala ma mau. Ngoi to manyiata to golo'o ra Ma Jou'ongu Madutu, nanga Ḇaḇa, re Ma Jou Yesus Kristus di'a pula'a mura re dadalara re pula'a ḏi'i dame ra ngini.

Barakati ma repe sababu marimoi ra Kristus

³ Ngene wo puji re silamo'o Ma Jou'ongu Madutu, Unanga gena-ge nanga Jou Yesus Kristus 'ai Ḇaḇa. Unanga ro pula'a barakati mo-moini toma soroga ra ngene, sababu ngene rewo marimoi ra Kristus.

⁴ Dungia 'i dadi nyangu, Unanga rena pili ngene ḏuanga i'a wo dadi marimoi ra Kristus, la ngene wo dadi Unanga 'ai ngowa-ngowa'a, kananga ḏosa ua re kananga sala ua ra Unanga 'ai momina.

⁵ 'Ua re 'au wali moju, sababu Ma Jou'ongu Madutu 'o dadalara ngene Unanga ro sitantukanga 'o 'oro ngene sa'olo 'ai ngowa-ngowa'a nau'u madutu. Gena-ge ri dadi sababu Yesus Kristus 'ai se-sengene. Mo-moini gena-ge Ma Jou'ongu Madutu 'a si'a'a mete'e Unanga 'ai mau, la sisanangi Unanga 'ai 'akala re sinyingara.

⁶ Sababu gena-ge, ngene wo puji re silamo'o Ma Jou'ongu Madutu sababu Unanga 'ai mura re dadalara lai lamo'o ra ngene. Unanga ro sijumu mode-mode'e 'ai mura re dadalara sababu ngene rewo marimoi ra Yesus. Unanga gena-ge ga'a Ma Jou'ongu Madutu 'U dadalara.

⁷ Ngene rewo marimoi ra Kristus. Dadi gena-ge ma ngale Ma Jou'ongu Madutu ro singi-ngiranga nanga ḏosa-ḏosa re Unanga ro sibebasa ngene sababu Yesus 'ai ngaunu ri pa'ala di'a ngene. Gena-ge ri dadi sababu 'Ai mura re dadalara ga'a kama tola'a ua di'a ngene.

⁸ Unanga 'ai mura re dadalara gena-ge Unanga 'a sijumu kama tola'a ua, singadolo 'O pula'a 'Ai 'akala ma soro'unu ra ngene, la ngene wa sahe Unanga 'ai maksudu mo-moini di'a ngene.

⁹ Toma 'ua re 'au wali moju manusia ya waro ua Ma Jou'ongu Madutu 'ai rahasia Tai 'ulungu ma dara. Mada'a nange-ne, sababu Ma Jou'ongu Madutu 'o mau, Unanga 'a sijumu 'Ai maksudu ga'a 'A siḏagi sababu 'a Kristus 'ai se-sengene.

¹⁰ Ma Jou'ongu Madutu, Unanga 'ai maksudu so'o ne: Ma 'orasa 'i ngadolo ḏua mete'e Unanga 'ai mau, 'ori i'a mo-moini, bae toma dungia bae toma soroga, ḏuanga i'a mo-moini gena-ge 'i marimoi ra Kristus re Unanga 'a parenta.

¹¹ Ma Jou'ongu Madutu ro cumutu ngomi, ngowa'a Yahudi, di'a dadi 'Ai 'umata sababu mi marimoi ra Kristus. Gena-ge Unanga ra sitantukanga pasala ḏua re Unanga ḏi'i nga'unu 'O 'a'a mo-moini ga'a mete'e 'Ai mau

¹² Ma Jou'ongu Madutu 'o 'a'a so'o gena ra ngomi, ngowa'a Yahudi ga'a ngowa'a ma siḏa 'aḏi masinganono ra Kristus, la ngomi mi puji re silamo'o Unanga sababu 'Ai kabasarana.

¹³ Re ngini ḏi'i, ngowa'a Yahudi ua, reni osama nyo-nyoimi ra Ma Jou'ongu Madutu 'ai 'umata. Sababu wakutu ni 'isene 'Ai habari banari Tai Habari Roanga ga'a 'i nyengara sigasa ngini toma salamata, ngini ni ngaku ra Kristus re dadi ni marimoi ra Unanga. Sababu gena-ge, Ma Jou'ongu Madutu 'o pula'a Ma Ngagara 'Ofi-'Ofi ra ngini ga'a 'A sijaji pasala ḏua. Ma Ngagara 'Ofi-'Ofi 'i dadi nana'o rimoi mangale ngini reni osama nyo-nyoimi ra Unanga 'ai 'umata.

¹⁴ Ma Ngagara 'Ofi-'Ofi gena-ge 'i dadi bukiti tantu ḏua ngene ḏuanga i'a wo dawongo 'ori i'a mo-moini ga'a Ma Jou'ongu Madutu ro sijaji pasala ḏua. Ḏuanga i'a wakutu ma 'orasa 'i ngadolo, Ma Jou'ongu Madutu 'o sibebasa ngene mode-mode'e, sababu ngene Unanga 'ai 'umata. Sababu gena-ge, ino ngene wo puji re silamo'o Ma Jou'ongu Madutu sababu 'Ai kabasarana.

Paulus 'o manyiata

^15-16 Dadi ngini reni osama nyo-nyoimi ra Ma Jou'ongu Madutu 'ai 'umata. Sababu gena-ge, ngoi kama togumu ua to sibere ie 'ari murasa ma la ra Ma Jou'ongu Madutu mangale ngini, sababu ngoi reto 'isene ngini reni ngaku Ma Jou Yesus re ni dadalara Ma Jou'ongu Madutu 'ai 'umata. Wakutu ngoi to manyiata to terongo tau-taunu ninga lomanga.

¹⁷ Ngoi to manyiata tau-taunu to golo'o tananga Ḇaḇa ga'a 'o mulia, Unanga gena-ge nanga Jou Yesus Kristus 'ai Jou'ongu Madutu, mangale Ma Ngagara 'Ofi-'Ofi ḏuanga i'a 'i pula'a 'akala ma soro'unu re 'i sijumu Ma Jou'ongu Madutu ra ngini, la ngini ni nana'o Unanga mode-mode'e:

¹⁸ Dadi ngini ninga fikirana 'i dadi tarangi mangale barakati di'a ngini. Barakati gena-ge ga'a ninga ngo-nganono, sababu Unanga ro 'aro'o ngini. Re ngini balasu ni sahe mode-mode'e mangale Ma Jou'ongu Madutu 'ai barakati ma mulia Ra sidodahe di'a 'Ai 'umata.

¹⁹ Re ḏi'i ngini ni waro Unanga 'ai kuasa ma pari cua ga'a 'i munara ra ngene, ngowa'a ga'a rewo ngaku Unanga. Kuasa gena-ge ma pari cua

²⁰ ga'a Unanga ra sipake di'a dadunu 'O si'ahu moju Kristus tai se-sengene re 'U sitegoro Tai giama ma kuwiḏa i'a toma soroga.

²¹ Kristus 'ai ḏe-ḏegoro gena-ge lebe kau'u reo pamarenta mo-moini, ngowa'a mo-moini remanga kuasa, ngowa'a bi-biri'i mo-moini, tuanga mo-moini re 'a guna ḇato manga ḏe-ḏegoro kau'u, bae 'aḏi 'ahu 'orasa nange-ne, bae toma biono i'a.

²² Re Ma Jou'ongu Madutu 'a sita'aloko mo-moini ra Kristus 'ai kuasa ma 'aḏu. Re Kristus gena-ge, ga'a 'O parenta mo-moini, 'o dadi jama'ata manga sae'e.

²³ Jama'ata gena-ge 'a Kristus 'ai lese. 'Ai jama'ata gena-ge, 'oru ḇato re ngi'i le'a ḇato, Unanga 'a sitomoto reo 'Ai 'ahu.