3 Yohanes 1 - Jaji ma Su-sungi

¹ Ngoi, jama'ata ma bi-biri'i, to lefo surata nena-ne ra ngana, Gayus 'ari ioronongoḏu ngo-ngaku rimoi ga'a ngoi tini dadalara mode-mode'e.

² 'Ari ioronongoḏu ngo-ngaku rimoi ga'a ngoi tini dadalara. Wakutu ngoi to manyiata, to golo'o ra Ma Jou'ongu Madutu, la ngana 'ani ga'a mo-moini la-la re ngana ni 'ahu la-la tau-taunu ma tero sa'olo 'ani nyawa 'i la-la ḏua.

³ 'Age nanga ioronongoḏu ngo-ngaku rimoi mamuni'a 'aḏi sapolo re siajele habari ra ngoi mangale ngana. Ananga gena-ge 'aḏi siajele ngana mode-mode'e no setia masala ra Ma Jou'ongu Madutu, Unanga gena-ge ga'a 'O ba-banari. Re ḏi'i 'ani 'ahu mode-mode'e 'i mete'e Ma Jou'ongu Madutu 'ai do-doto'o banari. Sababu gena-ge, 'ari 'akala re sinyingara 'i maroanga.

⁴ Ta site-tero reo 'ori i'a i'a yoḏu'u 'ari roanga nena-ne, wakutu to 'isene mangale 'ari ngowa'a ngaku Yesus 'aḏi 'ahu mete'e Ma Jou'ongu Madutu 'ai do-doto'o banari.

Gayus sanga sitoro

⁵ Gayus, 'ari ioronongoḏu ngo-ngaku rimoi ga'a ngoi tini dadalara! Kalaha 'ani ioronongoḏu ngo-ngaku rimoi ngowa'a tagi-tagi ino, ngana no cufala madutu no riono ananga gena-ge.

⁶ Ngowa'a tagi-tagi ino gena-ge raḏi sijarita taminga jama'ata 'ane mangale 'ani dadalara. Ngoi to golo'o ngana na'u riono tau-taunu ananga tamanga ḏo-ḏagi ma dara, la ananga nga'unu ya dowanga manga ḏo-ḏagi. Sababu duhu so'o gena-ge 'i sisanangi Ma Jou'ongu Madutu 'ai 'akala re sinyingara.

⁷ Sababu tamanga ḏo-ḏagi di'a sihabari mangale Kristus, ananga 'aḏi sanga 'ori i'a mai ua toma ngowa-ngowa'a Yahudi ua.

⁸ Sababu gena-ge, ngene ngowa'a ngaku Yesus balasu wa'u riono ananga gena-ge. Riono ananga gena-ge ma tero ḇato sa'olo ngene ḏi'i wa sirera re wa siwalata Ma Jou'ongu Madutu 'ai do-doto'o banari.

Yohanes 'o ḇangata 'a Diotrefes, re 'o sitoro 'a Demetrius

⁹ Ngoi reto lefo surata tani jama'ata, mada'a 'a Diotrefes, ga'a 'o nyafusu dadi jama'ata ma bi-biri'i, unanga 'o dawongo 'ari demo ua.

¹⁰ Sababu gena-ge, maha ngoi to sapolo kara ta sijarita mangale unanga gena-ge 'ai duhu ma jira re 'o kanau sa-sakala ga'a 'a sidodai ra ngomi! Sidogo ḏi'i, wakutu nanga ioronongoḏu ngo-ngaku rimoi raḏi sapolo, Diotrefes ya'u dawongo ua re unanga ya'u simaha ua ngowa'a ga'a mau 'aḏi dawongo ananga gena-ge, re ya'u dusu'u sisupu toma lo-lomu jama'ata gena-ge!

¹¹ Gayus, 'ari ioronongoḏu ngo-ngaku rimoi ga'a ngoi tini dadalara, ngana no cuḏuḏu'u ua de'oso re ḏegoro ma jira mada'a na cuḏuḏu'u de'oso re ḏegoro ma la-la. Sababu ngowa'a ga'a 'aḏi cuḏuḏu'u de'oso re ḏegoro ma la-la, ananga gena-ge Ma Jou'ongu Madutu 'ai ngowa-ngowa'a. Mada'a ngowa'a ga'a 'aḏi 'a'a 'ori i'a ma jira ananga gena-ge 'aḏi nana'o Ma Jou'ongu Madutu nyangu.

¹² Ngowa'a mo-moini 'aḏi sitoro 'a Demetrius. Unanga gena-ge patasa di'a ngowa-ngowa'a 'u sitoro unanga. Sababu 'ai de'oso re ḏegoro mete'e Ma Jou'ongu Madutu 'ai do-doto'o banari. Ngomi ḏi'i mi sitoro unanga; re 'ari ioronongoḏu ngo-ngaku rimoi, ngini ni waro 'oru ga'a ngomi mi siajele, ngini nga'unu ni dawongo sababu 'i banari.

Surata ma ḏo-ḏogumu

¹³ Ma repe moju ngoi paralu ta siajele ra ngana, mada'a ta basono tala lebe rousu to pake surata awa.

¹⁴ Na'o nyengara gari'a, tiara riwara ngoi to ma'u sanga ra ngana, kara wo makanau talaḏi biono re biono.

¹⁵ Ngoi to golo'o ra Ma Jou'ongu Madutu di'a 'O pula'a dame ra ngana. Re 'ani ioronongoḏu ngo-ngaku rimoi tari ngi'i 'aḏi siḏingoto manga tabea ra ngana. Singadolo ḏi'i 'ari tabea tari ioronongoḏu ngo-ngaku rimoi mo-moini; matengo togumu matengo.