2 Yohanes 1 - Jaji ma Su-sungi

¹ Ngoi, jama'ata ma bi-biri'i, to lefo surata nena-ne toma ngina ga'a Ma Jou'ongu Madutu ro cumutu re 'ami ngowa-ngowa'a ga'a ngoi mode-mode'e tunu dadalara. Pa'i ngoi ua ga'a to dadalara ngini, mada'a ngowa'a mo-moini ga'a raḏi nana'o Ma Jou'ongu Madutu 'ai do-doto'o 'i banari, ananga ḏi'i 'aḏi dadalara ngini

² Sababu Ma Jou'ongu Madutu 'ai demo 'i banari 'i tegoro ra ngene nanga 'akala re sinyingara re demo gena-ge 'i tegoro tau-taunu ra ngene kasingado-ngadolo i'a.

³ Ngoi to golo'o ra Ma Jou'ongu Madutu, nanga Ḇaḇa, re 'Ai Ngowa'a Nau'u di'a 'Aḏi pula'a dame, mura re dadalara, re 'Aḏi sijumu 'akala re sinyingara ma la-la ra ngene. Ngene ga'a rewo ngaku Ma Jou'ongu Madutu 'ai demo 'i banari re wo dadalara ioronongoḏu ngo-ngaku rimoi.

Ba-banari re dadalara

⁴ Ngoi to maroanga masala wakutu to sanga waro, ngina 'ami ngowa-ngowa'a mamuni'a manga 'ahu mete'e Ma Jou'ongu Madutu 'ai do-doto'o 'i banari. Do-doto'o gena-ge ma tero Ma Jou'ongu Madutu ro soma'a ngene wa mete'e.

⁵ Sababu gena-ge, ngoi to golo'o mode-mode'e toma ngina, mangale ngene mo-moini balasu ma'u dadalara matengo re matengo. 'Oru ga'a ngoi to lefo nena-ne, 'o parenta ma su-sungi ua. Parenta gena-ge, ngene rewa waro wakutu ngene mulaingi wo ngaku Yesus.

⁶ Nena-ne si'aro'o dadalara: Wakutu ngene nanga 'ahu mete'e Ma Jou'ongu Madutu 'ai parenta. Parenta mangale ngini balasu ma'u dadalara matengo re matengo, ngini rena 'isene ḏua wakutu ngini mulaingi ngaku Yesus.

⁷ Sababu ngowa'a ga'a sihaga ngowa'a, ananga manga repe 'aḏi tagi matai are toma dungia sitabi donga. Ananga gena-ge 'aḏi mangaku ua mangale Yesus Kristus 'o sapolo toma dungia nena-ne sa'olo manusia. Ananga gena-ge ma tero sa'olo ngowa'a matengo ga'a sihaga ngowa-ngowa'a re unanga gena-ge 'o Kristus Sa-sakala.

⁸ Sababu gena-ge, ngini balasu ni ma'istiari, la na siiranga awa ninga ngogele ga'a ngomi re ngini munara ma'u mete'e. Mada'a ni ma'istiari, la ngini nyengara ni sanga ngogele mo-moini ra Ma Jou'ongu Madutu.

⁹ 'A guna ḇato 'o mete'e 'a Kristus 'ai do-doto'o ua, re 'o maki-kiḏanga 'oru ga'a Unanga ro doto'o, Ma Jou'ongu Madutu 'o marimoi ua ra unanga. Mada'a, 'a guna ḇato 'o mete'e tau-taunu Kristus 'ai do-doto'o, Ma Jou'ongu Madutu, re 'Ai Ngowa'a Nau'u ḏi'i 'aḏi marimoi ra unanga.

¹⁰ Sababu gena-ge, na'o matengo i'a 'o sapolo re 'o doto'o ra ngini 'o do-doto'o ga'a mete'e ua Kristus 'ai do-doto'o, ngini ni dawongo unanga awa taninga wala, bolo ni pula'a tabea sa'olo 'ani ioronongoḏu ngo-ngaku rimoi mai awa.

¹¹ Sababu na'o wu tabea so'o gena-ge, ngene ma tero ḇato wo 'a'a 'ori i'a ma jira mame-mete'e ra unanga.

Surata ma ḏo-ḏogumu

¹² Ma repe moju ngoi paralu ta siajele ra ngini, mada'a ta basono tala lebe rousu to pake surata awa. Sababu gena-ge, ngoi to nyafusu tini tutumu, kara wo makanau talaḏi biono re biono, la monere tananga 'akala re sinyingara 'i ti-tiai.

¹³ Ngina, ngana 'ani ngowa-ngowa'a 'ane ga'a Ma Jou'ongu Madutu 'o cumutu ḏua ḏi'i, 'aḏi siḏingoto manga tabea ra ngana.