2 Timotius 2 - Jaji ma Su-sungi

Kristus 'ai sordado ga'a 'aḏi cufala tamanga munara

¹ Timotius, ngana ma tero sa'olo 'ari ngowa'a nau'u, ngana balasu na site'e 'ani 'akala re sinyingara rea Ma Jou'ongu Madutu 'ai mura re dadalara ga'a 'O pula'a ḏua ra ngana, sababu no marimoi ra Kristus Yesus.

² Do-doto'o ga'a 'au nga'ene ngana na 'isene ḏua ra ngoi, toma ngowa'a repe manga biono, ngana balasu na siwatasa ḏi'i ra guna ḇato ga'a na'u ngaku ananga re manga madanga sawata'a di'a sidoto'o ngowa'a lelegu.

³ Ngana ma tero sa'olo Yesus Kristus 'ai sordado re balasu ḏu-ḏuanga ḏua na doiti sangisara mamete'e ra ngene, ma tero sa'olo sordado mode-mode'e.

⁴ Sordado matengo, unanga pa'i 'o 'urusu 'ai 'ahu masiretene ḇato ua, sababu 'o mau sisanangi 'ai sae'e 'ai 'akala re sinyingara.

⁵ So'o gena-ge ḏi'i, matengo 'o mete'e ma rerebe lalara, unanga 'o sanga nomoro ua, na'o 'o mete'e enanga ma 'atoranga ua.

⁶ So'o gena-ge ḏi'i, matengo 'o 'a'a guḏa ga'a 'o munara mode-mode'e, unanga gena-ge siḏa-siḏa 'a 'oro enanga ma hasili.

⁷ Na totoho la-la ino, 'oru ga'a ngoi tini siajele ḏua, re Ma Jou'ongu Madutu 'a siḇitanga re 'a sitarangi 'ani 'akala re sinyingara mangale 'ari do-doto'o 'oru ḇato.

⁸ Na 'eli-'elingi mangale Yesus Kristus wakutu na sanga ma sangisara. Unanga 'ai 'asala ra 'Olana Daud ino re 'O basono sengene mada'a dadunu 'O 'ahu moju toma ngowa'a senge-sengene manga sigolona. Habari Roanga gena-ge mangale Unanga, ngoi reta singadolo.

⁹ Sababu gena-ge, ngoi to sanga sangisara singadolo to sanga lara sa'olo ngowa'a ma jira. Mada'a Ma Jou'ongu Madutu 'ai demo ya lara yoḏu'u.

¹⁰ Sababu gena-ge, ngoi ta doiti sangisara mo-moini gena-ge di'a ngowa-ngowa'a ga'a Ma Jou'ongu Madutu 'o cumutu ḏua, la ananga ḏi'i 'aḏi sanga salamata re 'aḏi sanga mulia kasingado-ngadolo i'a toma soroga sababu 'aḏi marimoi ra Kristus Yesus.

¹¹ Demo nena-ne tero mode'e: “Na'o ngene nanga 'ahu ma siḏa 'i sengene ḏua mamete'e ra Unanga, ngene ḏi'i ḏuanga i'a wo sanga 'ahu su-sungi mamete'e ra Unanga.

¹² Na'o ngene wo doiti sangisara, ngene ḏuanga i'a wo parenta mamete'e ra Unanga. Mada'a na'o ngene wo masoloto Unanga, Unanga ḏuanga i'a 'o soloto ngene ḏi'i.

¹³ Na'o ngene wo cufala ua macako'o namo-namoto ra Unanga, Unanga 'o cufala macako'o namo-namoto ra ngene, sababu Unanga sanga ua 'A soloto 'Ai jaji.”

Ngowa'a munara sanga puji

¹⁴ Mo-moini gena-ge ngana balasu na siajele tau-taunu toma jama'ata. Ngana na'u sipo-poma ananga, re Ma Jou'ongu Madutu 'o dadi sakisi, awa ananga 'aḏi ma'u rubutu mangale demo-demo. Mo-moini gena-ge ma faeda 'i cua re ngowa'a ya 'isene manga 'akala re sinyingara 'i ruwahe.

¹⁵ Ngana balasu no makutale mode-mode'e, la no dadi guru ga'a no doto'o la-la do-doto'o banari ra Ma Jou'ongu Madutu ino. Na'o 'a'a so'o gena, ḏuanga i'a ngana no mara'a ua re 'ani do-doto'o 'i sisanangi Ma Jou'ongu Madutu 'ai 'akala re sinyingara.

¹⁶ Ngana no maki-kiḏanga toma ngowa'a manga jarita ma faeda 'i cua ga'a 'i sije-jengere Ma Jou'ongu Madutu. Jarita so'o gena-ge si'a'a ngowa'a ganapu dadi cira.

¹⁷ Ananga gena-ge manga do-doto'o 'i rera re walata ma tero sa'olo si-siḏi bara. Ananga gena-ge manga sigolona 'age 'a Himeneus ra Filetus.

¹⁸ Ananga raḏi rapu ngo'omo re manga 'ahu 'i banari riwara. Ananga 'aḏi siruwahe ngowa'a ngaku Yesus manga ngo-ngaku, sababu 'aḏi sidoto'o sa-sakala mangale ngowa'a raḏi sengene ananga gena-ge dadunu raḏi 'ahu.

¹⁹ Mada'a do-doto'o banari ma tero sa'olo bangini ga'a Ma Jou'ongu Madutu 'a side'oso pasala ḏua; 'i elala yoḏu'u. Toma bangini ma re'u 'i silefo so'o ne: “Ma Jou'ongu Madutu 'a nana'o ngowa-ngowa'a ga'a Unanga 'o cumutu ḏua” re “ 'A guna ḇato raḏi mangaku, ‘Ananga ga'a Ma Jou'ongu Madutu ya'u cumutu ḏua’, ngowa'a gena-ge balasu 'aḏi matogumu madaga'a 'ori i'a ma jira.”

²⁰ 'Age toma wala lamo'o re rousu ma dara rema itomo ma pakakasa fara muḏuo i'a. 'Age fara moi si'a'a reo salaka, 'age fara moi si'a'a reo guraci re fara ḏiḏi gena-ge ya sipake di'a laya. 'Age ḏi'i fara moi si'a'a reo ate bolo reo tana'a re fara ḏiḏi gena-ge ya sipake di'a wange moi-wange moi.

²¹ Sababu gena-ge, ngowa-ngowa'a ga'a si'ofi manga 'ahu, ananga gena-ge 'aḏi dadi ma tero sa'olo itomo ma pakakasa di'a ya sipake wakutu manga laya. Ngowa'a gena-ge Ma Jou'ongu Madutu 'a pake sidadi itomo ma pakakasa, ra wola i'a di'a 'a sipake toma munara la-la.

²² Sababu gena-ge, ngana no maki-kiḏanga toma ngowa'a ra-ramasa ie manga nyafusu ma jira. Siḏibo ḏi'i, ngana balasu munara mode-mode'e di'a madaga'a 'ori i'a ma la-la re no mete'e tau-taunu do-doto'o banari, no dadalara ngowa'a lelegu re no 'ahu toma dame toma ngowa'a ga'a 'aḏi manyiata ra Ma Jou'ongu Madutu remanga 'akala re sinyingara 'ofi-'ofi.

²³ Awa no mete'e ngowa'a haga ga'a ma'u tolabe mangale 'oru ḇato ma faeda 'i cua. Ngana waro mo-moini gena-ge pa'i sibaolo ma'u lawana.

²⁴ Ngowa-ngowa'a ga'a 'aḏi munara ra Ma Jou, ananga balasu 'aḏi ma'u tolabe awa toma ngowa'a lelegu. Siḏibo ḏi'i, ananga balasu ya sidodai manga seri'i re go-gasa ra guna ḇato re nga'unu doto'o ngowa'a reo 'ori i'a ma la-la remanga 'akala ḇanyo.

²⁵ Ananga 'aḏi doto'o balasu pake 'akala ḇanyo toma ngowa'a ga'a ya'u lawana ananga. Na'o nyengara gari'a, Ma Jou'ongu Madutu 'o pula'a donga ra ananga ga'a 'aḏi lawana ngana, la 'aḏi maḏibo toma ngo'omo boloto re 'aḏi dawongo do-doto'o banari,

²⁶ re 'aḏi ma'insafu re 'aḏi palasara toma 'Iblisi ma bo-baja ga'a 'i dawana ananga ḏua, re 'i simau-mau ananga 'aḏi mete'e enanga ma mau.