2 Tesalonika 2 - Jaji ma Su-sungi

Ngowa'a matengo 'ai 'akala re sinyingara 'i cira madutu

¹ Ioronongoḏu ngo-ngaku rimoi, ngoi to siajele ra ngini mangale ḏuanga i'a Ma Jou Yesus Kristus dadunu 'o sapolo moju re mangale ḏuanga i'a Unanga na lomu ngene ga'a wo 'ahu marimoi ra Unanga. Dadi ngoi to golo'o ra ngini:

² Kalaha ngini ni 'isene habari, bae nubuata, bae do-doto'o bolo surata 'age rema ngowa'a 'aḏi kanau ra ngomi ino, mangale ma 'orasa enanga 'i ngadolo ḏua di'a Unanga dadunu 'o sapolo, awa ninga 'akala re sinyingara 'i waro gogare riwara, bolo 'i kangela!

³ Awa ngini ni mete'e ngowa'a lelegu gena-ge manga demo ga'a sihaga ngowa'a dadi ngini ni ta'ajiri ma 'orasa gena-ge 'i ngadolo ḏua; mada'a 'i ngadolo nyangu. Mo-moini nena-ne balasu 'i dadi siḏa: Ngowa'a repe 'aḏi masoloto Kristus re 'aḏi 'ahu 'i marimoi riwara ra Ma Jou'ongu Madutu re ngowa'a matengo 'ai 'akala re sinyingara lai cira madutu, unanga gena-ge ro waiti ga'a Ma Jou'ongu Madutu 'u sitantukanga ḏua 'o osama toma naraka.

⁴ Ngowa'a matengo gena-ge Ma Jou'ongu Madutu 'ai lawana re 'o matoro 'ai diri toma jou'ongu ma somoara mo-moini ga'a ngowa'a ya si'aro'o jou'ongu-jou'ongu, bolo ya silamo'o re siḏubuso. Unanga ḏuanga i'a 'o tegoro ra Ma Jou'ongu Madutu 'ai Wala re 'a sibobita mangale unanga masiretene sa'olo Ma Jou'ongu Madutu.

⁵ Na 'eli-'elingi 'au nga'ene wakutu ngoi to tegoro taninga sigolona, ngoi ta siajele pasala ḏua mangale mo-moini gena-ge!

⁶ Re ngini na waro ngowa'a matengo 'ai 'akala re sinyingara lai cira madutu 'o waiti nyangu, sababu 'age rema dola'aku. Ḏuanga i'a, toma 'orasa ga'a Ma Jou'ongu Madutu 'A sitantukanga pasala ḏua, ngowa'a matengo 'ai 'akala re sinyingara lai cira madutu ḏuanga i'a 'o waiti.

⁷ Nange-ne 'Iblisi 'i munara 'i sigogoro, la ngowa'a 'aḏi dawongo awa Ma Jou'ongu Madutu 'ai habari. Mada'a matengo ga'a 'ai 'akala re sinyingara lai cira madutu gena-ge 'o waiti nyangu, sababu 'o sanga dola'aku. Dadi wakutu Ma Jou'ongu Madutu 'a silage dola'aku gena-ge,

⁸ ngowa'a matengo 'ai 'akala re sinyingara lai cira madutu 'o waiti re Ma Jou Yesus 'o sisengene ngowa'a matengo gena-ge pa'i Rai demo ḇato re 'O singi-ngiranga unanga gena-ge 'ai kuasa Rai kabasarana wakutu Unanga dadunu 'o sapolo moju.

⁹ Mada'a wakutu Yesus dadunu 'o sapolo nyangu, unanga ga'a 'akala re sinyingara lai cira madutu gena-ge ḏuanga i'a 'i waiti reo 'Iblisi ma kuasa lamo'o, re 'aḏi 'a'a didina'o heranga re 'ori i'a hera-heranga fara muḏuo i'a di'a sihaga ngowa'a.

¹⁰ Unanga gena-ge ḏuanga i'a 'o pake duhu ma jira mo-moini di'a sihaga ngowa'a ga'a 'aḏi iranga ngo'omo, sababu manga 'akala re sinyingara ma ngalana ri kuci re ḏi'i ananga 'aḏi nyanyaḏi ua 'isene habari banari da'u ra Ma Jou'ongu Madutu tala ga'a nyengara 'O sisalamata ananga.

¹¹ Sababu gena-ge, Ma Jou'ongu Madutu 'o pake 'Ai kuasa di'a 'O si'a'a ananga gena-ge 'aḏi ganapu ngaku ngowa'a matengo ga'a 'akala re sinyingara lai cira madutu, unanga gena-ge 'ai demo sa-sakala.

¹² Ngowa'a mo-moini ga'a 'aḏi ngaku ua habari banari mada'a 'aḏi nyanyaḏi 'a'a 'ori i'a ma jira; ma ḏo-ḏogumu tala, ananga gena-ge Ma Jou'ongu Madutu ya'u sihukumu.

Ngini sanga cumutu, la ni salamata

¹³ Ioronongoḏu ngo-ngaku rimoi ga'a Ma Jou Yesus 'o dadalara, mode-mode'e 'i banari mangale ngomi mi sibere ie minga murasa ma la ra Ma Jou'ongu Madutu tau-taunu mangale ngini. Sababu toma 'ua re 'au wali moju Ma Jou'ongu Madutu 'o cumutu ḏua ngini, la sisalamata ngini. Enanga gena-ge 'i dadi, sababu Ma Ngagara 'Ofi-'Ofi 'i sidadi ngini Unanga 'ai ngowa'a 'ofi-'ofi, re sababu ngini ni ngaku habari banari ra Ma Jou'ongu Madutu ino.

¹⁴ Sababu di'a gena-ge, Ma Jou'ongu Madutu 'o 'aro'o ngini, la ḏuanga i'a ngini ni sanga mulia mamete'e ra Yesus Kristus nanga Jou. Gena-ge 'i dadi sababu ngomi singadolo Habari Roanga ra ngini.

¹⁵ Sababu gena-ge, ioronongoḏu ngo-ngaku rimoi ngini mo-moini balasu ni te'oso ogo-ogoro taninga ngo-ngaku re ni macako'o namo-namoto ra Ma Jou Yesus 'ai do-doto'o ga'a ngomi pula'a ra ngini; bae ma silefo, bae masimada-madanga.

Manyiata

^16-17 Ma Jou'ongu Madutu nanga Ḇaḇa 'o dadalara ngene re mete'e 'Ai mura re dadalara, Unanga na si'a'a ngene nanga 'akala namo-namoto re dadi site'e nanga ngo-nganono. Sababu gena-ge, ngoi to golo'o Ma Jou'ongu Madutu nanga Ḇaḇa re nanga Jou Yesus Kristus masiretene 'o babata ngini re site'e ninga 'akala re sinyingara, la ngini nga'unu ni si'a'a re ni sihabari 'ori i'a la-la.