2 Petrus 3 - Jaji ma Su-sungi

Jaji mangale Ma Jou dadunu 'o sapolo moju

¹ Ioronongoḏu ngo-ngaku rimoi ga'a ngoi tunu dadalara. Nena-ne ngoi 'ari surata ma soi ḏiḏi ra ngini. Ngoi reto lefo surata ma dara ma mulaingi re surata soi ḏiḏi nena-ne ḏi'i ra ngini, sababu ngoi mau tunu si'elingi ngini mangale do-doto'o ma banari, la ngini ninga fikirana 'i dadi 'ofi-'ofi tau-taunu.

² Ngoi tunu si'elingi tau-taunu, la ngini ni 'eli-'elingi Ma Jou'ongu Madutu 'ai nabi 'ofi-'ofi 'ua re 'au wali 'oru ga'a ya siajele pasala ḏua. Re 'eli-'elingi ḏi'i Ma Jou ga'a nanga Salamata ma Cimi, Unanga gena-ge 'ai parenta ga'a Yesus 'ai so-soma'a nu singadolo ra ngini.

³ Ma siḏa-siḏa, ngini balasu na sahe mangale Kiamata ma Wangere. Wakutu wangere gena-ge ri co-cori, ngowa'a ga'a manga 'ahu romanga reo dungia ma nyafusu 'aḏi sapolo. Ananga ḏuanga i'a 'aḏi je-jengere ngini.

⁴ Ananga 'aḏi kanau so'o ne: “Ma Jou 'o sijaji ḏuanga i'a 'o sapolo, mada'a 'orasa nange-ne Unanga le'a?! Nanga ete re dotumu raḏi matai sengene. Mada'a mo-moini gena-ge ma tero ḇato sa'olo wakutu dungia 'i dadi ḏua singadolo toma 'orasa nange-ne!”

⁵ Ananga 'aḏi oḏu'u 'elingi mangale 'ua re 'au wali Ma Jou'ongu Madutu 'o sidadi diwanga re dungia, re 'O siwo-wola i'a tana'a reo ḇanyo re 'A siwaiti tana'a reo ḇanyo, mo-moini gena-ge Rai 'Idini ḇato.

⁶ Re 'ua re 'au wali Ma Jou'ongu Madutu 'o singi-ngiranga dungia reo ḇanyo gena-ge ḏi'i.

⁷ Mada'a toma 'orasa nange-ne, Ma Jou'ongu Madutu 'o kadiarata diwanga re dungia Rai 'Idini gena-ge singadolo Unanga 'a singi-ngiranga gena-ge reo u'u. 'Orasa nange-ne, diwanga re dungia 'A kadiarata singadolo ma 'orasa ngowa-ngowa'a ga'a 'aḏi lawana Unanga, ananga gena-ge 'aḏi sanga hukumu.

⁸ Mada'a ioronongoḏu ngo-ngaku rimoi ga'a ngoi tunu dadalara, 'age 'ori i'a rimoi ngini ni sidaioranga awa: Wangere moi ra Ma Jou'ongu Madutu 'ai momina ma tero musungu cala moi ra ngene manusia nanga momina. Re musungu cala moi ra Ma Jou'ongu Madutu 'ai momina ma tero re wangere moi ra ngene manusia nanga momina.

⁹ 'Age ngowa'a 'aḏi aje Ma Jou'ongu Madutu 'ai jaji lai kohi. Momongolo ua, Unanga 'o romanga reo 'akala ḇanyo, sababu Unanga oḏu'u matengo i'a mai ua 'o sanga hukumu. Unanga 'o mau ngowa-ngowa'a mo-moini 'aḏi sanga donga di'a maḏibo toma ngo'omo boloto.

¹⁰ Mada'a Ma Jou 'ai Wangere ḏuanga i'a 'i ngadolo ma tero sa'olo ngowa'a to-tori'i. Toma wangere gena-ge diwanga 'i iranga rema rurusu lai siḏi, re 'ori i'a i'a mo-moini toma diwanga 'i ro'u mo-moini. Re dungia re ma dara mo-moini, enanga 'i iranga.

¹¹ Sababu mo-moini gena-ge Unanga 'a singi-ngiranga, dadi ninga 'ahu ma duhu sa'olo?! Ngini balasu ninga 'ahu 'ofi-'ofi re siboloto ninga 'akala re sinyingara di'a pa'i Ma Jou'ongu Madutu ḇato,

¹² sababu ngini ni totoma Ma Jou'ongu Madutu 'ai Wangere 'i ngadolo, Wangere gena-ge ga'a Unanga 'a sitantukanga. Re Ngini balasu ni munara, la Wangere gena-ge 'i ngadolo caiti. Wangere gena-ge diwanga 'i ro'u simoini. Re sababu sau'u siḏi woḏi, 'ori i'a i'a mo-moini toma ḏuanga i'a 'i 'uisi.

¹³ Mada'a ngene wo totoma 'oru ga'a Ma Jou'ongu Madutu 'o sijaji pasala ḏua ra ngene: Diwanga su-sungi re dungia su-sungi ga'a 'i romanga reo ngowa'a loasa re banari.

¹⁴ Sababu gena-ge, ioronongoḏu ngo-ngaku rimoi ga'a ngoi tunu dadalara, wakutu ngini ni totoma ma 'orasa gena-ge moju, ngini balasu ni makutale mode-mode'e, la ninga 'ahu 'i dadi 'ofi-'ofi, kama ḏosa awa ra Ma Jou'ongu Madutu 'ai momina, re balasu ni makutale mode-mode'e ni 'ahu marimoi la-la ra Ma Jou'ongu Madutu.

¹⁵ 'Eli-'elingi, Ma Jou'ongu Madutu 'ai 'akala ḇanyo gena-ge 'i pula'a donga toma manusia di'a ananga 'aḏi maḏibo toma ngo'omo boloto, la 'aḏi sanga salamata. Nanga ioronongoḏu ngo-ngaku rimoi ga'a wu dadalara, 'a Paulus, ro lefo surata-surata ḏua ra ngini. Re unanga gena-ge 'o lefo surata-surata gena-ge rai 'akala soro'unu ra Ma Jou'ongu Madutu tala.

¹⁶ Ra Paulus 'ai surata ma dara mo-moini 'a silefo mangale 'ori i'a gena-ge 'i ma tero. 'Age ḏi'i 'ori i'a mamuni'a ga'a wa disa sahe kangela re ngowa'a 'aḏi waro 'oru ua remanga ngo-ngaku 'i te'e, ananga gena-ge ya sice-celolo surata ma ngale. Gena-ge wa heranga awa sababu 'age toma balangu ma lelegu ḏi'i toma Boku 'Ofi-'Ofi ma dara ananga ya si'a'a so'o gena ḏi'i. 'Oru ga'a ananga ya 'a'a gena-ge pa'i ya sigasa ananga masiretene toma sengene kasingado-ngadolo i'a.

¹⁷ Mada'a ioronongoḏu ngo-ngaku rimoi ga'a ngoi tunu dadalara, ngini ni waro ḏua, duhu so'o gena-ge. Sababu gena-ge ni ma'istiari la-la: Awa ngini ngowa'a nu'u sihaga remanga 'ulungu ma rousu ua, singadolo ni sitaka-taka 'oru ga'a ni ngaku mode-mode'e nange-ne.

¹⁸ Sidiḇo ḏi'i, ngini balasu ni 'ahu boloto, la ngini ganapu basono Unanga 'ai mura re dadalara re ni sidogo ninga wo-waro ra Unanga. Unanga gena-ge nanga Jou Yesus Kristus ga'a nanga Salamata ma cimi. Puji re silamo'o Unanga nange-ne re singado-ngadolo i'a. 'Amin.