2 Korintus 9 - Jaji ma Su-sungi

Bu-bula'a di'a ngowa'a ngaku Yesus

¹ Ma nyonyata, ngoi to lefo surata riwara ra ngini mangale ninga bu-bula'a ga'a ngini ḏuanga i'a siḏingoto di'a Ma Jou'ongu Madutu 'ai 'umata toma daeraha Yudea.

² Sababu ngoi ta waro ngini ni samangata di'a ni riono ngowa'a, re ngoi tini sitoro mangale ngini toma ngowa-ngowa'a Makedonia. Musungu toma ḏuḏunu, ngoi to sijarita ra ananga gena-ge mangale ninga ioronongoḏu ngo-ngaku rimoi toma jama'ata Korintus toma daeraha Akhaya ni ḏu-ḏuanga ḏua di'a pula'a ninga bu-bula'a. Dadi ngowa'a repe toma daeraha Makedonia 'aḏi mau lomu bu-bula'a ḏi'i, sababu 'aḏi 'isene ninga samangata gena-ge.

³ Mada'a ngoi tu siḏingoto 'a Titus re 'ai ḏagilomu nga muḏiḏi ra ngini, la 'oru ga'a ngomi mi sitoro mangale ngini, awa 'i dadi parasaja. Dadi ngini balasu ni ḏu-ḏuanga ḏua sababu ngoi to kanau ra ananga mangale ngini ni ḏu-ḏuanga ḏua reninga bu-bula'a gena-ge.

⁴ Ngoi to dodato awa-awa 'age rema ngowa'a Makedonia 'aḏi mamete'e ra ngoi wakutu ngoi to sapolo ra ngini, re ananga ya oḏi'i ngini ni ḏuanga nyangu. Tantu ḏua, ngomi mi mara'a masala, sababu ngomi remi kanau mangale ngomi mi ngaku mode-mode'e ngini ni ḏu-ḏuanga ḏua. Re ngini masiretene ni mara'a ḏi'i!

⁵ Ma sababu gena-ge, ngoi ta basono tala paralu madutu ta'u siḏingoto ananga siḏa di'a 'aḏi 'urusu lomu ninga bu-bula'a ga'a ngini reni sijaji ḏua. Ngoi to 'a'a so'o gena, la wakutu ḏuanga i'a ngoi to sapolo ninga bu-bula'a lamo'o 'i ḏu-ḏuanga ḏua. Gena-ge 'i dadi didina'o rimoi mangale ngini ni pula'a ninga 'akala re sinyingara sa-sanangi, kama simau-mau ua.

⁶ Elingi nena-ne: Ngowa'a ga'a 'aḏi maotomo repe ua, ḏuanga i'a ya 'utu'u ya sanga ma hasili repe ua ḏi'i. Mada'a ngowa'a ga'a 'aḏi maotomo lai repe, ḏuanga i'a ananga ya sanga ma hasili lai repe ḏi'i.

⁷ 'A guna ḇato awa pula'a rai 'akala re sinyingara sitaka-taka, bolo sababu 'o masimau-mau. Siḏibo ḏi'i, matengo re matengo balasu 'o pula'a mete'e 'ai putusanga masiretene remanga 'akala re sinyingara sa-sanangi. Sababu Ma Jou'ongu Madutu 'o dadalara ngowa'a ga'a 'aḏi pula'a remanga 'akala re sinyingara sa-sanangi.

⁸ Sidogo ḏi'i, Ma Jou'ongu Madutu rai kuasa 'o pula'a barakati pai-pai'i ra ngini, la ngini ninga paralu kama kuranga ua. Siḏibo ḏi'i, ngini ninga paralu ni sanga pai'i tau-taunu. Unanga ḏuanga i'a 'o 'a'a so'o gena-ge, la ngini nga'unu ni madaga'a 'ori i'a ma la-la lebe dogo-dogo di'a ni riono ngowa-ngowa'a.

⁹ Gena-ge ma tero sa'olo toma Boku 'Ofi-'Ofi ri silefo mangale Ma Jou'ongu Madutu so'o ne: “Unanga rai mura re dadalara 'o pula'a barakati toma ngowa-ngowa'a ma dinga'unu ua, re 'Ai 'akala re sinyingara ma la-la, nena re si'a kasingado-ngadolo i'a.”

¹⁰ Ma Jou'ongu Madutu masiretene 'o pula'a gisisi di'a ngowa'a ga'a siare gisisi re ma hasili di'a ngene wa oromo. So'o gena ḏi'i, Unanga gena-ge 'o pula'a ra ngini 'ori i'a mo-moini ga'a ni paralu re 'a dogo pai-pai'i. Dadi ngini nyengara dogo ni pula'a bu-bula'a toma ngowa'a lelegu.

¹¹ Dadi ḏuanga i'a ngini ma tero sa'olo ngowa'a rema-enanga toma 'oru ḇato, la ngini nga'unu ni pula'a ninga bu-bula'a lai lamo'o reninga 'akala re sinyingara 'i sasalanga ua toma donga mo-moini. Re ninga bu-bula'a lai lamo'o gena-ge ga'a ngomi mi sibalangu, 'i si'a'a ngowa'a repe 'aḏi sibere ie murasa ma la ra Ma Jou'ongu Madutu.

¹² Sababu ga'a ma la-la gena-ge, ngini na si'a'a pa'i sitotomo ananga manga paralu ḇato ua, mada'a 'i si'a'a ngowa'a repe 'aḏi sibere ie murasa ma la ra Ma Jou'ongu Madutu ḏi'i.

¹³ Dadi sababu ninga bu-bula'a lai lamo'o ga'a 'i sipula'a reninga 'akala re sinyingara ma la-la, ngowa'a ngaku Yesus manga repe toma daeraha Yudea 'aḏi puji re silamo'o Ma Jou'ongu Madutu. Sababu ananga ya oḏi'i ngini ni sijumu ninga duhu ga'a ni mete'e Habari Roanga mangale Kristus. Re ananga ḏi'i 'aḏi puji re silamo'o Ma Jou'ongu Madutu, sababu ngini ninga 'akala re sinyingara ma la-la ni sibalangu ninga bu-bula'a ra ananga re ngowa'a lelegu mo-moini.

¹⁴ Ḏua 'i baolo rorasa tamanga 'akala re sinyingara ma dara dadalara ra ngini, re ananga 'aḏi manyiata di'a ngini, sababu Ma Jou'ongu Madutu 'o sijumu 'Ai mura re dadalara lai lamo'o ra ngini.

¹⁵ Ino, ngene wo sibere ie murasa ma la ra Ma Jou'ongu Madutu, sababu Unanga 'ai bu-bula'a ma pari cua ra ngene.