2 Korintus 8 - Jaji ma Su-sungi

Jama'ata-jama'ata toma daeraha Makedonia manga bu-bula'a

¹ Ioronongoḏu ngo-ngaku rimoi, ngomi mau mi siajele ra ngini mangale ngowa'a ngaku Yesus toma daeraha Makedonia. Ma duhu sa'olo Ma Jou'ongu Madutu ro sijumu 'Ai mura re dadalara ra ananga gena-ge singadolo ananga 'aḏi mau sijumu dadalara lai lamo'o toma ngowa'a ngaku Yesus toma daeraha Yudea.

² Kalaha ananga sanga sangisara tubuso, ananga 'aḏi maroanga. Kalaha ananga ngowa'a ma dinga'unu ua, ananga 'aḏi pula'a bu-bula'a lai lamo'o di'a riono ngowa'a ngaku Yesus toma daeraha Yudea.

³ Ngoi masiretene to waro pa'i ananga 'aḏi pula'a bu-bula'a mete'e manga dinga'unu ḇato ua, mada'a 'aḏi pula'a lebe lamo'o i'a reo ananga manga dinga'unu. Re 'a guna ua ya'u simau-mau.

⁴ Ananga 'aḏi golo'o tau-taunu ra ngomi, la ananga gena-ge nyengara 'aḏi riono Ma Jou'ongu Madutu 'ai 'umata toma daeraha Yudea.

⁵ Ngomi ma ta'ajiri ananga 'aḏi pula'a bu-bula'a pa'i ceka'a ua. Momongolo ua manga bu-bula'a lai lamo'o! Ananga si-siḏa ya sidoa'a manga 'akala re sinyingara ra Ma Jou Yesus, kara ra ngomi. Gena-ge 'i mete'e Ma Jou'ongu Madutu 'ai 'akala ma mau.

⁶ Dadi ngomi mi golo'o mode-mode'e ra Titus di'a dadunu 'o tagi ra ngini, la 'o riono ngini ni dowanga lomu ninga bu-bula'a singadolo siḏuanga. Ngomi mi golo'o 'a Titus sababu 'au nga'ene ro riono ngini mulaingi ni lomu ninga bu-bula'a.

⁷ Ngini reni dadi ma tero sa'olo ngowa'a rema-enanga toma 'ori i'a mo-moini: Ninga ngo-ngaku lai te'e, ni nga'unu doto'o ngowa'a, ninga wo-waro lai ngido, ni cufala mete'e Ma Jou Yesus re ni dadalara ngomi masala. Sababu gena-ge, ngomi golo'o ngini ḏi'i dadi ma tero sa'olo ngowa'a rema-enanga di'a pula'a bu-bula'a lai lamo'o toma ngowa'a ngaku Yesus toma daeraha Yudea.

⁸ Gena-ge, ngoi to parenta ngini ua. Mada'a ngoi to siajele mangale jama'ata Makedonia manga bu-bula'a, la ngini ni sanga donga di'a mete'e bolo ua jama'ata gena-ge manga ga'a. Dadi ngoi to disa waro ngadolo le'a ngini ninga dadalara toma ngowa'a ngaku Yesus ma lelegu.

⁹ Ngoi to paralu ua di'a parenta ngini sababu ngini rena waro mode-mode'e nanga Jou Yesus Kristus 'o dadalara ngene. Unanga gena-ge ngowa'a rema-enanga toma soroga, 'O kama kuranga 'oru ua. Mada'a Unanga 'o sisoi'i tala gena-ge re 'O madadi ngowa'a ma dinga'unu ua toma dungia nena-ne di'a ngini ninga paralu. Dadi Yesus 'ai dinga'unu ua gena-ge sidadi ngini ngowa'a rema-enanga toma soroga.

¹⁰ Dadi ngoi 'ari 'akala ma sanga mangale hali gena-ge: Ngini ni siḏuanga lomu ninga bu-bula'a ga'a ni mulaingi musungu toma ḏuḏunu. Ngini ma siḏa ga'a ni mafikiri re ni mulaingi ni lomu bu-bula'a gena-ge.

¹¹ Nange-ne, ngini balasu na dowanga lomu ninga bu-bula'a, mete'e ninga dinga'unu re na siḏuanga reninga samangata sa'olo 'au nga'ene ninga samangata ma mulaingi.

¹² Sababu na'o ngini ni pula'a reninga samangata mete'e ngini ninga dinga'unu, Ma Jou'ongu Madutu ḏuanga i'a 'a dawongo ninga bu-bula'a. Mada'a, Ma Jou'ongu Madutu 'o oḏu'u ngini ni pula'a pai-pai'i mete'e ua ngini ninga dinga'unu.

¹³ Ngoi 'ari maksudu ua tini siḏubuso ngini, re ta'u sikare ngowa'a lelegu toma bu-bula'a gena-ge. Mada'a 'ari maksudu ngini re ngowa'a lelegu taninga 'ahu kama kuranga ua.

¹⁴ Nange-ne ngini 'ahu pai-pai'i dadi nyengara ni sitotomo ngowa'a ngaku Yesus toma Yudea manga kuranga re ngadolo ua. So'o gena ḏi'i ḏuanga i'a, na'o ngini ni kuranga re ngadolo ua, ananga ḏi'i riono re sitotomo ninga kuranga. Duhu so'o gena-ge, ngini fara ḏiḏi ni ma'u riono, dadi ngini kama kuranga ua.

¹⁵ Gena-ge ma tero sa'olo toma Boku 'Ofi-'Ofi 'i silefo so'o ne: “Ngowa'a ga'a 'aḏi lomu ma hasili lai repe, 'aḏi pai'i ua; re ngowa'a ga'a 'aḏi lomu ma hasili repe ua, 'aḏi kuranga ua.”

Titus re ioronongoḏu nga muḏiḏi ngo-ngaku rimoi 'aḏi tagi toma limau Korintus

¹⁶ Ngomi sibere ie minga murasa ma la ra Ma Jou'ongu Madutu, sababu Unanga ro sigaraki Titus 'ai 'akala re sinyingara di'a riono ngini. Dadi Titus 'ai mau gena-ge ma tero sa'olo 'ari mau.

¹⁷ Ngoi to kanau so'o gena, sababu 'a Titus pa'i 'o dawongo rai samangata ngomi minga go-golo'o ḇato ua, mada'a rai samangata masiretene 'a putusu ḏua di'a 'o tagi ra ngini.

¹⁸ Re ḏi'i ngomi siḏingoto mamete'e ra unanga, ioronongoḏu matengo ngo-ngaku rimoi. Unanga gena-ge, ngowa'a toma jama'ata-jama'ata mo-moini 'u silamo'o, sababu 'o munara cufala singadolo Habari Roanga ra Ma Jou'ongu Madutu tala.

¹⁹ Sidogo ḏi'i, unanga gena-ge, jama'ata-jama'ata toma daeraha Makedonia raḏi pili re sitantukanga di'a ḏuanga i'a 'o ḏagilomu ngomi taminga ḏo-ḏagi ma dara di'a singadolo ninga bu-bula'a toma jama'ata Yerusalem. Ngomi minga maksudu nena-ne, la Ma Jou'ongu Madutu ngowa'a 'U simulia, re ngowa'a 'aḏi oḏi'i ngomi mi riono ngini reminga 'akala re sinyingara sa-sanangi.

²⁰ Unanga gena-ge ḏuanga i'a 'o mamete'e ra ngomi di'a singadolo ninga bu-bula'a lai lamo'o toma jama'ata Yerusalem, la ngowa'a 'aḏi disa sala yoḏu'u mangale ma duhu sa'olo ngomi malomu re sibalangu ninga bu-bula'a lamo'o.

²¹ Ngomi mi 'istiari di'a mi 'a'a ba-banari ra Ma Jou'ongu Madutu 'ai momina re manusia manga momina ḏi'i.

²² Sidogo ḏi'i, ngomi ḏuanga i'a mi siḏingoto nanga ioronongoḏu ngo-ngaku rimoi mamete'e rea Titus reo unanga gena-ge. Dadi ngowa'a nga ḏu'ange 'aḏi tagi ra ngini di'a lomu ninga bu-bula'a. Ngowa'a lelegu gena-ge, ngomi remi disa waro soi muḏuo i'a ḏua unanga 'o munara cufala di'a Ma Jou'ongu Madutu. Re nange-ne unanga 'ai nyafusu 'i ganapu madogo-dogo riono ngini, sababu unanga 'o ngaku mode-mode'e ngini ni siḏuanga ni lomu ninga bu-bula'a di'a jama'ata Yerusalem.

²³ Mangale 'a Titus, unanga ngoi 'ari ḏagilomu cori madutu re ḏagilomu munara di'a riono ngini. Mangale 'ai ḏagilomu nga muḏiḏi, ananga gena-ge sanga 'utusu toma jama'ata-jama'ata Makedonia re manga de'oso re ḏegoro 'i silamo'o Kristus.

²⁴ Sababu gena-ge ngomi ma singanono ni sijumu ninga dadalara toma ioronongoḏu nga ḏu'ange ngo-ngaku rimoi gena-ge, la ngowa'a toma jama'ata-jama'ata lelegu 'aḏi sahe i'a sa'olo ngini ni dadi ngomi minga biono gau'u.