2 Korintus 3 - Jaji ma Su-sungi

Falalomu-falalomu toma jaji ma su-sungi

¹ Ḏa ngini ni ta'ajiri ngomi mi matoro ngomi minga diri masiretene?! Mada'a ngini ni rapu! Bolo ḏa ngini ni ta'ajiri ngomi mi paralu surata toma ngowa'a lelegu ga'a ananga 'aḏi sitoro ngomi, la ngini ḏuanga i'a ni dawongo ngomi?! Bolo ḏa ngini ni ta'ajiri ngomi mi paralu surata ra ngini ga'a ni sitoro ngomi, la ngowa'a lelegu ḏuanga i'a 'aḏi dawongo ngomi?! 'Age ngowa'a mamuni'a ga'a 'aḏi paralu surata-surata gena-ge!

² Mada'a ngomi paralu surata ua! Sababu ioronongoḏu ngo-ngaku rimoi, ngini masiretene ma tero sa'olo surata ga'a ni sitoro ngomi. Sababu ngowa'a mo-moini 'aḏi oḏi'i ninga ngo-ngaku taninga 'ahu. Dadi ananga raḏi waro ngini reni ngaku Kristus mode-mode'e. Surata gena-ge 'i silefo ra ngomi minga 'akala re sinyingara ma dara ḏi'i, sababu ngomi mi dadalara ngini.

³ Ananga masiretene nga'unu ya oḏi'i mangale ngini, 'ari ioronongoḏu ngo-ngaku rimoi, ni dadi surata ga'a Kristus ra silefo, sababu ngomi minga munara taninga sigolona. Surata gena-ge silefo reo tinta ua, mada'a rema Ngagara 'Ofi-'Ofi ra Ma Jou'ongu Madutu ga'a 'O 'ahu-'ahu. Re ḏi'i 'i silefo toma maḏi ua, mada'a taninga 'akala re sinyingara ma dara.

⁴ Ngomi lami nau'u di'a kanau so'o gena mangale ngomi masiretene, sababu ngomi mi ngaku Ma Jou'ongu Madutu re ḏi'i mi marimoi ra Kristus.

⁵ Ngomi kaminga 'alasana ceka'a i'a mai ua di'a mi kanau mangale ngomi ma nga'unu ma si'a'a munara gena-ge. Mada'a pa'i Ma Jou'ongu Madutu ḇato 'o pula'a kuasa ra ngomi.

⁶ Unanga gena-ge 'o si'a'a ngomi nga'unu mi dadi 'Ai falalomu-falalomu toma jaji ma su-sungi. Jaji gena-ge toma Ngagara 'Ofi-'Ofi ino, toma hukumu ua ga'a manusia ya lefo toma boku. Sababu 'oru ga'a silefo toma boku 'i sigasa ngowa'a toma sengene, mada'a jaji toma Ngagara 'Ofi-'Ofi ino, 'i sigasa ngowa'a toma 'ahu.

⁷ Kalaha jaji, ga'a ri lefo toma maḏi, 'i sigasa ngowa'a toma sengene, 'O mulia ma cahaya da'u ra Ma Jou'ongu Madutu tala 'i 'erese Musa 'ai biono singadolo 'a Musa 'ai biono 'i supu cahaya. Kalaha toma 'orasa gena-ge cahaya ra Musa 'ai biono enanga ri roasa, cahaya gena-ge ma pari cua singadolo ngowa'a Israel tatamo yoḏu'u Musa 'ai biono. Sababu gena-ge, jaji ga'a sigasa ngowa'a toma sengene, enanga gena-ge 'i sapolo mamete'e reo cahaya lamo'o.

⁸ Tantu ḏua jaji ma su-sungi ra Ma Jou'ongu Madutu 'ai Ngagara 'Ofi-'Ofi, enanga gena-ge ḏuanga i'a 'i sapolo mamete'e rema cahaya lebe la-lamo'o i'a ḏi'i.

⁹ Na'o jaji ma siḏa ga'a sihukumu manusia enanga rema mulia, tantu ḏua jaji ma su-sungi ra Ma Jou'ongu Madutu enanga lebe mulia i'a ḏi'i; sababu jaji gena-ge 'i sidadi matengo i'a ngowa'a loasa re banari ra Ma Jou'ongu Madutu 'ai momina.

¹⁰ Tantu ḏua, jaji ma siḏa ra Musa enanga rema mulia. Mada'a na'o ngene wa site-tero enanga ma mulia reo mulia toma jaji ma su-sungi ra Ma Jou'ongu Madutu, enanga gena-ge 'i ma tero sa'olo jaji ma siḏa ma mulia 'i moini ḏua.

¹¹ Na'o kalaha jaji ma siḏa 'i tahana ua, enanga rema mulia. Tantu ḏua jaji ma su-sungi ga'a 'i kasingado-ngadolo i'a, enanga ma mulia lebe mulia i'a ḏi'i.

¹² Dadi sababu ngomi minga ngo-nganono toma jaji ma su-sungi, ngomi mi nau'u di'a mi sirera re siwalata habari mangale jaji ma su-sungi gena-ge.

¹³ Ngomi ma tero ua sa'olo 'a Musa ga'a 'a damunu 'ai biono, la awa ngowa'a ya oḏi'i 'ai biono. Reo da-daku gena-ge ngowa'a Israel ya oḏi'i Ma Jou'ongu Madutu 'ai cahaya ua, enanga gena-ge ga'a 'i rongo ra Musa 'ai biono.

¹⁴ Ananga gena-ge manga fikirana ri kuci, enanga 'i ma tero sa'olo daku manga biono reo jujuwurungu. Re singadolo 'orasa nange-ne ananga manga fikirana enanga 'i damunu moju wakutu ananga 'aḏi baca boku-boku toma jaji ma siḏa. Ananga gena-ge 'aḏi sahe ua mangale jaji ma siḏa 'i moini ḏua. Jujuwurungu gena-ge nyengara 'i woi'i na'o pa'i ngowa'a matengo 'o marimoi ra Kristus ḇato.

¹⁵ 'Orasa nange-ne ḏi'i mai, na'o ngowa'a Israel 'aḏi baca Musa 'ai boku-boku, enanga 'i ma tero sa'olo ananga manga fikirana 'i kuci, enanga 'i ma tero sa'olo daku manga biono reo jujuwurungu moju!

¹⁶ Mada'a na'o matengo i'a 'o ngaku Ma Jou, unanga gena-ge 'ai fikirana ma jujuwurungu ri woi'i.

¹⁷ Na, Ma Jou gena-ge Ma Ngagara 'Ofi-'Ofi. Re 'a guna ḇato Ma Ngagara 'Ofi-'Ofi ra Ma Jou ri osama tai 'akala re sinyingara ma dara, unanga gena-ge basono bebasa.

¹⁸ 'Orasa nange-ne, enanga ma tero sa'olo Ma Jou ra woi'i jujuwurungu ra ngene mo-moini tananga fikirana. Dadi ngene wo basono Ma Jou 'ai mulia, gena-ge 'Ai kuasa. Sababu gena-ge, ngene nanga 'ahu 'i ngali 'i dadi ma tero sa'olo Unanga; lebe ti'ara lebe sijumu 'Ai kuasa tananga 'ahu. Kuasa gena-ge da'u ra Ma Jou tala, ga'a Ma Ngagara 'Ofi-'Ofi.