2 Korintus 2 - Jaji ma Su-sungi

¹ Sababu gena-ge, ngoi to sapolo ra ngini, la awa nanga 'akala re sinyingara 'i kangela moju; ma tero sa'olo 'oru 'i dadi wakutu ngoi to sapolo 'au nga'ene!

² Sababu na'o ngoi ḏuanga i'a to sikangela ninga 'akala re sinyingara, 'a guna ua sisanangi ngoi?! Pa'i ngini ḇato ni sisanangi ngoi! Dadi na'o ngoi to sikangela ninga 'akala re sinyingara, 'age rema ngowa'a matengo i'a mai ua di'a sisanangi ngoi!

³ Sababu gena-ge, 'au nga'ene ngoi to lefo surata ra ngini. Ngoi to oḏu'u awa-awa to sapolo ra ngini re 'ari 'akala re sinyingara 'i dadi kangela sababu ninga de'oso re ḏegoro. Momongolo ua, ngini balasu ni 'a'a ngoi to maroanga. Re tantu ḏua, na'o ngoi to maroanga, ngini mo-moini ḏi'i ni maroanga.

⁴ Ngoi 'ari 'akala re sinyingara 'i tola'a re kangela lai siḏi, singadolo 'ari 'ongoro mai turono wakutu to lefo surata gena-ge ra ngini. 'Ari maksudu, awa ngini ninga 'akala re sinyingara 'i dadi kangela, mada'a balasu ni waro ngoi mode-mode'e tini dadalara ngini.

Si'apongo ngowa'a matengo ga'a 'a'a ḏosa gena-ge

⁵ Ngowa'a matengo ga'a ro 'a'a ḏosa re ga'a ngoi tu silefo 'au nga'ene: Unanga gena-ge ro sikangela pa'i 'ari 'akala re sinyingara ḇato ua, mada'a ra ngini mo-moini, bolo 'age manga repe taninga sigolona. Sababu gena-ge, ngoi to oḏu'u kanau pai'i mangale unanga

⁶ Ngowa'a repe raḏi sihukumu unanga gena-ge. Nu sihukumu rawara, sababu unanga 'o sanga hukumu lai ḏubuso ḏua.

⁷ Nange-ne, ngini balasu ni si'apongo unanga, re ni site'e 'ai 'akala re sinyingara moju. Awa ni sieanga i'a unanga 'ai 'akala re sinyingara kangela kama ḏo-ḏogumu ua.

⁸ Sababu gena-ge, ngoi to golo'o mode-mode'e ngini balasu ni si'a'a so'o gena ra unanga, la ni sijumu mangale ngini reni dadalara unanga.

⁹ Wakutu 'au nga'ene ngoi reto lefo surata ra ngini, 'ari maksudu di'a tunu tai'i, la ngoi to waro mode-mode'e ngini ni mete'e 'ari bererongo mo-moini, bolo ua.

¹⁰ Nange-ne, ngoi to siajele sihukumu rawara unanga ga'a 'o 'a'a ḏosa re nu si'apongo unanga gena-ge. Na'o ngini ni si'apongo unanga, ngoi ḏi'i to si'apongo unanga. Na'o 'ori i'a ga'a paralu madutu ngoi ta si'apongo, Kristus 'ari sakisi mangale ngoi reto si'apongo unanga. Re ngoi reto si'a'a so'o gena-ge di'a ngini ninga la.

¹¹ Re ḏi'i, la ngene wo dola'aku 'Iblisi ma bo-baja di'a sitogumu ngene wo si'apongo unanga gena-ge. Sababu ngene wa waro 'Iblisi 'i disa donga di'a baja ngene wo 'a'a ḏosa.

Paulus 'o madodato sababu unanga 'o sanga habari ua ra Titus

¹² Wakutu ngoi to ngadolo toma limau Troas, 'ari maksudu to singadolo Habari Roanga mangale Kristus. Toma limau gena-ge, Ma Jou Yesus ro welanga ngalana di'a ngoi, la to munara di'a Unanga.

¹³ Mada'a tari 'akala re sinyingara ma dara 'i dodato, sababu 'a Titus, nanga ioronongoḏu ngo-ngaku rimoi, unanga 'o cua toma Troas. Dadi ngoi to sisoi'i tala limau gena-ge, re ngoi reto sapolo toma daeraha Makedonia.

Rema 'utungu mete'e Kristus

¹⁴ Mada'a nange-ne ngoi ta sibere ie 'ari murasa ma la ra Ma Jou'ongu Madutu, sababu ngomi mi marimoi ra Kristus, Unanga 'o gasa ngomi ma tero sa'olo 'Ai sordado ga'a mi 'utungu taminga lawana 'Iblisi. Unanga 'o pake ngomi di'a singadolo Habari Roanga toma dungia sitabi donga mangale Kristus. Habari Roanga gena-ge ma tero sa'olo manyanyi ma bounu lai sa'i.

^15-16 Dadi wakutu ngomi mi singadolo Habari Roanga mangale Kristus, ngomi ma tero sa'olo manyanyi ma bounu lai sa'i ra Ma Jou'ongu Madutu. Toma ngowa-ngowa'a ga'a Ma Jou'ongu Madutu ya'u sisalamata, ngomi ma tero sa'olo bounu ga'a 'i sigasa 'ahu sababu ngomi mi singadolo habari mangale 'ahu kasingado-ngadolo i'a. Mada'a toma ngowa'a ga'a 'aḏi sanga salamata ua, ngomi ma tero sa'olo bounu ga'a 'i sigasa sengene sababu ngomi mi singadolo habari mangale sengene kasingado-ngadolo i'a. Matengo i'a mai ua 'a pake 'ai de-de'e masiretene nga'unu siḏagi munara gena-ge!

¹⁷ Ngowa'a repe ya singadolo Ma Jou'ongu Madutu 'ai demo sababu ananga mau manga 'ahu pai-pai'i. Mada'a ngomi Ma Jou'ongu Madutu 'ai so-soma'a re mi marimoi ra Kristus, ngomi mi singadolo habari ra Ma Jou'ongu Madutu reminga 'akala re sinyingara bo-boloto re Ma Jou'ongu Madutu 'o dadi ngomi minga sakisi.