2 Korintus 12 - Jaji ma Su-sungi

Ma Jou'ongu Madutu 'o pula'a tingoḏi'i ra Paulus

¹ Tantu ḏua, 'age ma 'utungu 'i cua na'o 'a guna ḇato 'o mahie 'ai diri. Mada'a ngoi mau to mahie 'ari diri sababu tingoḏi'i re demo-demo ga'a Ma Jou'ongu Madutu 'o pula'a ra ngoi:

² Musungu nyagi moi re rata toma ḏuḏunu, ngoi to nana'o ngowa'a ngaku Yesus matengo i'a ga'a kage-kage 'o sibere sie da'u toma soroga. (Ngoi ta waro ua, Unanga sibere rai lese bolo gena-ge pa'i tingoḏi'i ḇato, pa'i Ma Jou'ongu Madutu ḇato 'a waro.)

^3-4 Ngoi to kanau soi moi moju: Ngoi ta waro mangale unanga gena-ge 'o sibere sie dadi 'o osama toma Firdaus. (Ngoi ta waro ua: Unanga sibere rai lese bolo pa'i sa'olo tingoḏi'i ḇato. Pa'i Ma Jou'ongu Madutu ḇato 'a waro.) Toma ngi'i gena-ge unanga 'o 'isene mangale 'oru ga'a 'i rousu madutu. Mada'a matengo i'a mai ua nyengara ya cuḏuḏu'u bolo ya sikanau ra guna ḇato.

⁵ Unanga gena-ge ngoi tu sihie ra ngini, mada'a ngoi to mahie 'ari diri ua. Ngoi pa'i to mahie 'ari diri ra ngini, sababu 'ari lamahana ḇato.

⁶ Na'o ngoi to mau to mahie 'ari diri sababu 'ari tingoḏi'i gena-ge, ngoi to dadi ngowa'a haga ua sababu ngoi to kanau ba-banari. Mada'a ngoi to mahie 'ari diri ua mangale 'ari tingoḏi'i gena-ge, la matengo i'a mai ua silamo'o ngoi sababu ananga 'aḏi isene 'ari jarita gena-ge. Jobilaha ananga gena-ge 'aḏi silamo'o ngoi sababu 'ari de'oso re ḏegoro bolo 'ari demo re ganau.

⁷ Mada'a, ngoi 'ari lese sanga sangisara, la ngoi to dadi momole awa sababu 'ari tingoḏi'i ga'a Ma Jou'ongu Madutu ri siwaiti ra ngoi. Sangisara gena-ge ma tero sa'olo dodowo'o ga'a 'i topo'o 'ari lese tau-taunu. Enanga gena-ge ma tero sa'olo 'Iblisi ma so-soma'a. Ma Jou'ongu Madutu 'o nyengara gena-ge 'i dadi ra ngoi, la awa ngoi to momole.

⁸ Soi ro'ange ngoi to manyiata ra Ma Jou Yesus, to golo'o Unanga 'a siwoi'i 'ari sangisara.

⁹ Mada'a Unanga gena-ge 'a sangoro, “Ngoi tini singi-ngiranga ua 'ani sangisara gena-ge mada'a Ngoi tini riono Rari mura re dadalara. Enanga gena-ge ngana na paralu! Sababu wakutu ngana no basono tala lamahana, 'Ari kuasa nga'unu 'i si'a'a lebe ganapu tani 'ahu.” Sababu gena-ge ngoi to mahie 'ari diri sababu 'ari lamahana, sababu wakutu ngoi to lamahana, Kristus 'ai kuasa 'i sioḏi'i tari 'ahu.

¹⁰ Sababu gena-ge, ngoi to maroanga na'o ngoi to lamahana: Ngoi to maroanga bae ngoi to sanga susa, bae to sanga sangisara, bae to sanga sikisa bae sanga je-jengere, sababu ngoi to munara di'a Kristus. Wakutu ngoi to lamahana, 'orasa gena-ge ngoi to dadi te'e sababu Kristus 'ai kuasa 'i riono ngoi.

Paulus 'ai 'akala re sinyingara kangela toma jama'ata Korintus

¹¹ Mode-mode'e, ngoi to mahie 'ai diri ma tero sa'olo ngowa'a haga. Ngoi reto 'a'a so'o gena sababu ngini, ioronongoḏu ngo-ngaku rimoi. Momongolo ua, ngini balasu ni sitoro ngoi. Sababu kalaha ngoi ri ijana cua ra ngini, ngoi Yesus 'ai so-soma'a. Re ngoi masiretene to basono ua sa'olo ngowa'a ma pake ua reo “rasul-rasul” ma lelegu ga'a 'aḏi mafikiri ananga masiretene lebe pahe reo ngoi!

¹² Ngoi reto 'a'a ga'a hera-heranga, didina'o heranga re 'ori i'a hera-heranga taninga sigolona re ngoi to manahana rari 'akala ḇanyo masala. Enanga gena-ge 'i dadi bukiti mangale ngoi, Yesus 'ai so-soma'a mode-mode'e.

¹³ Ngoi mau to sano: Toma parkara 'oru, ngoi tini siwaro i'a ua na'o ngoi to site-tero ninga jama'ata reo jama'ata ma lelegu?! Pa'i so'o nena-ne ḇato: Ngoi tini sikangela ua di'a ni pula'a bu-bula'a ra ngoi! Ngoi balasu to golo'o ma'afu di'a “ 'ari sala” gena-ge, bolo ua?! Tantu ḏua, ua!

¹⁴ Re nange-ne ngoi to ḏu-ḏuanga ḏua di'a tini tutumu toma soi ro'ange re ngoi to oḏu'u tini sikangela. Ngoi to mau ngini ninga harata ua, mada'a ninga 'akala re sinyingara, la ngini rini dadalara ngoi. Sababu ngowa 'olo 'aḏi disa nafaka ua di'a bi-biri'i, mada'a bi-biri'i balasu disa nafaka di'a ngowa 'olo.

¹⁵ Sababu gena-ge rari 'akala re sinyingara sa-sanangi ḏuanga i'a ta sipula'a 'oru ḇato ninga paralu. Sidogo ḏi'i 'ari diri ḏuanga i'a ta sipula'a ḏi'i ra ngini! Na'o 'ari dadalara so'o gena ra ngini, i'a sa'olo ngini dadalara ngoi pa'i ceka'a i'a ḇato?!

¹⁶ Ngini ni 'akoru, ngoi tini sikangela ngini ua sababu ngoi to golo'o ua bu-bula'a. Mada'a ngowa'a ma lelegu 'aḏi kanau mangale ngoi ga'a sihaga ngowa'a. Ananga gena-ge 'aḏi kanau ngoi tini sihaga. Dadi to sanga 'utungu ra ngini, bolo ua?! Tantu ḏua, ua!

¹⁷ Ananga ga'a ngoi ta'u 'utusu tagi ra ngini, ngoi to 'oro 'utungu ra ananga, bolo ua?! Tantu ḏua, ua!

¹⁸ Ngoi to 'utusu 'a Titus re ioronongoḏu matengo ngo-ngaku rimoi mamete'e di'a 'aḏi tutumu ngini. 'A Titus 'o sihaga di'a 'oro 'utungu ra ngini, bolo ua?! So'o gena-ge, ua! Titus re ngoi, ngomi nga muḏiḏi mi munara ma duhu rimoi re minga de'oso re ḏegoro ma tero.

¹⁹ Ngini ḏa ni fikiri ngomi mi riono minga diri?! Ngini ni rapu! Ma Jou'ongu Madutu 'a waro ngomi kanau mete'e Kristus 'ai mau. Re 'oru ḇato ngomi 'a'a di'a site'e ninga ngo-ngaku, ngini ga'a ngomi mi dadalara.

²⁰ Ngoi to dodato na'o ḏuanga i'a ngoi tini tutumu, ngoi to sanga i'a ngini, ma tero ua ga'a ngoi to masinganono. So'o gena ḏi'i, wakutu ngini ma'u sanga ra ngoi ma tero ua ga'a ngini masinganono. Ngoi to dodato ngoi to sanga ngini ma'u tolabe, ruta caiti i'a, 'akala go-goḏi, singa'unu 'ahu masiretene, ma'u fitana, ma'u sikanau, momole, re 'a'a kaco.

²¹ Ngoi to dodato na'o ḏuanga i'a to sapolo dadunu ra ngini, 'ari Jou'ongu Madutu 'o sipake-pake ngoi ua taninga biono. Dadi ngoi to 'aḏi sababu taninga sigolona 'age ngowa'a manga repe moju ga'a 'a'a ḏosa. Ananga gena-ge 'aḏi maḏibo toma ngo'omo boloto nyangu re 'aḏi matogumu ua 'a'a 'ori i'a ma cafarune, su-sudala, re 'ori i'a ga'a patasa ua di'a ngowa'a ngaku Yesus.