2 Korintus 11 - Jaji ma Su-sungi

Paulus re rasul-rasul sa-sakala

¹ Kalaha ngoi ngowa'a haga ua, ngoi to golo'o ra ngini mangale ngini ni sidodai ninga 'akala ḇanyo sababu ngoi mau to mahie di'a ti'ara ua ma tero sa'olo ngowa'a haga! Ma nyonyata ngini reni sidodai ninga 'akala ḇanyo ra ngoi!

² Ngoi to jaga ngini tau-taunu ma tero sa'olo Ma Jou'ongu Madutu 'o jaga ngini. Ngini ma tero sa'olo mosolese matengo mo waro nau'u nyangu, ga'a ngoi timi sijaji di'a mo molo'ara reo na-nau'u matengo; Unanga gena-ge Kristus.

³ Mada'a ngoi to dodato ninga fikirana ri sanga sihaga singadolo ngini ni cufala riwara mete'e ra Kristus. Gena-ge ma tero sa'olo 'ua re 'au wali, ngo Hawa mo sanga sihaga toma 'Iblisi ga'a 'i matuhu sa'olo ngorana.

⁴ Sababu ngini ni sanangi ni dawongo ngowa'a ga'a 'aḏi sapolo ra ngini di'a 'aḏi doto'o mangale Yesus ma lelegu reo Yesus ga'a ngomi remi doto'o ra ngini. Re ngini ni dawongo roh bolo habari ga'a ma'u rapu rema Ngagara 'Ofi-'Ofi re Habari Roanga ga'a ngini reni dawongo!

⁵ Mada'a ngoi masiretene to basono tala sa'olo ngowa'a ma pake ua reo “rasul-rasul” ma lelegu ga'a 'aḏi ta'ajiri ananga masiretene lebe pahe reo ngoi.

⁶ Ngoi ḏa to pahe re to sawata'a ua, mada'a ngoi to haga ua wo-waro mangale Yesus. Gena-ge ngomi ma sibukiti ḏua ra ngini, taminga de'oso re ḏegoro re demo re ganau.

⁷ Toma 'orasa ngoi to singadolo Habari Roanga ra Ma Jou'ongu Madutu ino ra ngini, ngoi to golo'o bu-bula'a ua ra ngini. Siḏibo ḏi'i, ngoi to munara, la sanga oromo re ka'e. Dadi ngoi to dadi ma tero sa'olo ninga falalomu, la ngoi nyengara to sikau'u ngini. Wakutu ngoi to 'a'a so'o gena, ngoi to 'a'a ḏosa bolo ua?! Tantu ḏua, ua!

⁸ Wakutu ngoi to munara taninga sigolona kama sanga bu-bula'a ua, jama'ata-jama'ata ma lelegu 'aḏi pula'a bu-bula'a ra ngoi. Dadi nyengara ngowa'a 'aḏi kanau ngoi ta'u sirugi jama'ata gena-ge, la ngoi tunu riono ngini.

⁹ Toma 'orasa gena-ge na'o ngoi 'ari paralu 'i ngadolo ua, to golo'o bu-bula'a ra matengo i'a mai ua taninga sigolona toma limau Korintus. 'Oru ga'a ngoi 'ari paralu, ioronongoḏu ngo-ngaku rimoi toma Makedonia, ananga 'aḏi sapolo di'a ya sidodahe mo-moini. Ngoi ta jaga mode-mode'e, la awa to golo'o bu-bula'a, re ta jaga tau-taunu, la awa 'i dadi so'o gena-ge.

¹⁰ Re nange-ne ngoi to kanau ra Yesus 'ai lomanga: 'Oru ga'a ngoi aro to kanau 'i banari, ma tero sa'olo Yesus 'ai do-doto'o 'i banari. Ngoi to mahie 'ari diri, sababu ngoi to golo'o bu-bula'a ua ra ngini toma limau Korintus bolo 'a guna ḇato toma daeraha Akhaya mo-moini. Re matengo i'a mai ua nga'unu 'o dola'aku ngoi to mahie so'o gena-ge.

¹¹ I'a sa'olo ngoi to kanau so'o gena?! Ngini ni fikiri ngoi to dadalara ngini ua?! Ma Jou'ongu Madutu 'a waro ngoi 'ari 'akala re sinyingara ma dara mangale ngoi nena-ne to dadalara ngini!

¹² 'Oru ga'a ngoi ta si'a'a 'orasa nange-ne, ḏuanga i'a ta si'a'a tau-taunu, la “rasul-rasul” ma lelegu ananga 'aḏi mahie manga diri yoḏu'u re 'aḏi kanau yoḏu'u mangale ananga 'aḏi munara ma tero sa'olo ngomi, sababu ananga gena-ge 'aḏi golo'o bu-bula'a.

¹³ Ngowa-ngowa'a so'o gena-ge rasul-rasul sa-sakala. Ananga ngowa-ngowa'a munara ga'a pa'i 'aḏi taḏusu ngowa'a manga la'o ḇato re 'aḏi matuhu ḇato sa'olo Yesus 'ai so-soma'a.

¹⁴ Heranga ua, na'o ananga manga ga'a so'o gena-ge sababu 'Iblisi masiretene mai 'i matuhu sa'olo mala'ekata tarangi.

¹⁵ Sababu gena-ge, heranga awa ḇato na'o 'Iblisi ma falalomu-falalomu 'i matuhu sa'olo Ma Jou'ongu Madutu 'ai falalomu. Ma ḏo-ḏogumu tala, ananga 'aḏi dawongo enanga ma bo-bangu mete'e ananga manga de'oso re ḏegoro.

Paulus 'ai sangisara sa'olo Yesus 'ai so-soma'a

¹⁶ Ngoi dadunu to kanau soi moi moju: Awa matengo i'a 'o ta'ajiri ngoi sa'olo ngowa'a haga sababu ngoi to mahie 'ari diri so'o gena-ge. Mada'a na'o 'age mamuni'a 'aḏi aje ngoi ngowa'a haga, 'oru ua. Na'o nyengara gari'a ni pula'a donga ra ngoi, ngowa'a haga nena-ne, di'a to mahie 'ari diri ceka'a ua.

¹⁷ 'Orasa nange-ne, ngoi to mahie 'ari diri so'o gena-ge, mada'a Ma Jou Yesus 'o soma'a ua di'a to 'a'a so'o gena-ge. Dadi hali gena-ge ngoi to kanau sa'olo ngowa'a haga.

¹⁸ 'Age ḏi'i rema ngowa'a manga repe 'aḏi mahie manga diri sababu manga munara ga'a 'aḏi si'a'a reo manga de-de'e masiretene. Dadi ngoi mai to mahie 'ari diri ḏi'i.

¹⁹ Ngini ni dawongo ngowa'a haga reninga 'akala re sinyingara sa-sanangi, sababu ngini ni basono tala ngini masiretene ngowa'a 'akala soro'unu! Mada'a ngini so'o gena ua!

²⁰ Sidogo ḏi'i, ngini ni sieanga i'a ḇato guru sa-sakala gena-ge ga'a si'a'a ngini manga ngowa'a budaka, bolo ya oromo ninga galasau'u ma duduala re 'aḏi 'oro 'utungu ra ngini bolo ananga 'aḏi mabasono tala ananga lebe la-lamo'o re 'aḏi sito-to'u ngini.

²¹ Tantu ḏua, na'o ngoi ta mete'e ninga fikirana re mete'e 'ari fikirana ua, ngoi balasu to mangaku mangale ananga gena-ge lebe nau'u reo ngoi! Dadi sababu ngoi to mete'e ua ananga gena-ge manga ga'a ra ngini, ngoi balasu to basono mara'a bolo ua?! So'o gena-ge, ua! Mada'a na'o ananga gena-ge 'aḏi nau'u di'a mahie manga diri, ngoi mai nyengara ḏi'i. Mada'a ngoi to si'elingi ngini, ngoi to kanau sa'olo ngowa'a haga ḇato!

²² Ananga gena-ge, ngowa'a 'Ibrani?! Ngoi ḏi'i, ngowa'a 'Ibrani. Ananga gena-ge, ngowa'a Israel? Ngoi ḏi'i, ngowa'a Israel. Ananga gena-ge 'a Abraham 'ai ju'uda?! Ngoi mai so'o ananga ḏi'i.

²³ Ananga gena-ge Kristus 'ai falalomu-falalomu?! (Na'o ngoi to kanau so'o gena-ge, ngoi ma tero sa'olo ngowa'a haga ḇato.) Mada'a ngoi ne falalomu-falalomu lebe cufala reo ananga mo-moini: Ngoi to munara lebe sau'u i'a, ngowa'a singosama ngoi toma bui lebe repe, to sanga ca'olo lebe siḏi, re soi rai o'o i'a sa'i to sengene.

²⁴ Soi romotoa ḏua, ngowa'a Yahudi 'aḏi sihukumu ngoi: Ananga gena-ge 'aḏi ca'olo reo si-sipo soi nyagi ro'ange re siworo.

²⁵ Ngowa'a Roma raḏi ca'olo ngoi soi ro'ange, 'age soi moi ḏi'i ri poini reo maḏi. Ngoi to sidete minga kapala 'i tirini soi ro'ange, re soi moi ngoi to ra-rarini toma ngoloto ma re'u ma di'ara 'utu moi re wange moi.

²⁶ Tari ḏo-ḏagi ma jelele i'a to sanga bahala ma repe: Palene ḇanyo 'o ngu'uisi, tola'a i'a ngowa'a to-tori'i manga ngi'i. Ngoi to sanga sikisa toma ngowa'a Yahudi, re 'age ḏi'i toma ngowa'a Yahudi ua. Ngoi to sanga bahala toma ngowa'a toma limau ma dara, re 'age ḏi'i toma limau ma ḏuḏunu. Bahala toma ngoloto, re bahala ra ananga gena-ge ga'a 'aḏi matuhu sa'olo ngowa-ngowa'a ngaku Yesus, mada'a 'aḏi sa-sakala.

²⁷ Ngoi to munara sau'u madutu 'ari obongo rotu-rotu, to munara ma sisengene i'a: Soi rai o'o i'a kama otu mai ua, kama oromo mai ua, kama ka'e mai ua. Soi rai o'o i'a, ngoi to manahana sawini, re ngoi to basono 'alo sababu 'ari pakeanga repe ua.

²⁸ Sidogo ḏi'i wange moi-wange moi, ngoi 'ari 'akala re sinyingara 'i dodato mangale jama'ata mo-moini.

²⁹ Na'o 'age rema ngowa'a matengo i'a 'o basono lamahana, ngoi ḏi'i to basono ma tero sa'olo unanga. Na'o 'age rema ngowa'a matengo i'a 'o eta'a toma ḏosa, ngoi 'ari 'akala re sinyingara 'i kangela.

³⁰ Na'o ngoi ḏi'i balasu to mahie 'ari diri, la ngini ni 'isene ngoi; ngoi to sihie mangale 'oru ga'a 'i sijumu 'ari lamahana.

³¹ Ma Jou'ongu Madutu, Ma Jou Yesus 'ai Ḇaḇa, 'A waro mangale ngoi to sa-sakala ua. Unanga gena-ge ga'a ngene balasu wo silamo'o re siḏubuso 'Ai lomanga kasingado-ngadolo i'a.

³² Wakutu ngoi toma limau Damsyik, 'Olana Aretas 'ai aḏutala gubernur matengo 'o kuasa toma daeraha gena-ge. Unanga gena-ge 'o soma'a 'ai sordado-sordado 'aḏi jaga toma limau ma ngalana lamo'o di'a 'aḏi cako'o ngoi.

³³ Mada'a 'ari ḏagilomu 'aḏi riono ngoi di'a to sisoi'i tala limau gena-ge. Ananga gena-ge 'aḏi sigare ngoi toma karajanga lamo'o, kara siguci mete'e ge-gelo ma duso'o. So'o gena, ngoi to palasara ra gubernur 'ai sordado-sordado.