2 Korintus 10 - Jaji ma Su-sungi

Paulus 'o riono 'ai diri tai munara

¹ 'Age mamuni'a taninga sigolona ga'a 'aḏi kanau “ngoi to mereoso,” na'o to matalaḏi re to kanau ra ngini. Mada'a na'o ngoi ma'u kiḏanga re to lefo surata ra ngini, “ngoi lato te'e!” Mada'a ngoi Paulus to golo'o mode'e ra ngini to pake 'akala re sinyingara ma la-la re mereoso ma tero sa'olo Kristus 'ai 'akala re sinyingara.

² Ngoi to golo'o mode-mode'e ra ngini, awa simau-mau ngoi to pake demo kasara, na'o to sapolo ma'u talaḏi ra ngini. Sababu tari 'ulungu ma dara, ngoi ta sijumu 'ari nau'u ra ananga mamuni'a toma jama'ata Korintus ga'a 'aḏi kanau mangale ngomi minga de'oso re ḏegoro ma tero sa'olo ngowa'a dungia.

³ Tantu ḏua, ngomi 'ahu toma dungia ma dara moju, mada'a ngomi mi parangi ma tero ua sa'olo ngowa'a dungia manga duhu.

⁴ Minga dare tagi parangi 'i ma tero ua reo ngowa'a dungia manga dare. Mada'a mi pake Ma Jou'ongu Madutu 'ai kuasa sa'olo minga dare di'a mi lawana Unanga 'ai lawana. Ngomi ma tero sa'olo sordado-sordado ga'a 'aḏi siwejere manga lawana ma ngi'i lai te'e ga'a 'aḏi magogono toma dara.

⁵ Ngomi ma siruba ananga manga 'akala re sinyingara ma de-de'e re momole ga'a 'i sihaga ngowa'a re dola'aku ngowa'a 'aḏi nana'o Ma Jou'ongu Madutu. Gena-ge ma tero sa'olo sordado-sordado 'aḏi siwejere 'o hisa ga'a lai kapiringi. Re ngomi mi ngali ananga manga fikirana, ga'a 'au nga'ene 'aḏi dawongo Yesus ua, la ananga 'aḏi ta'aloko ra Kristus.

⁶ Ngomi mi ḏu-ḏuanga ḏua mi sihukumu 'a guna ḇato 'o oḏu'u ta'aloko ra Kristus. Mada'a ngomi totoma singadolo ngini reni sijumu ni ta'aloko ti-tiai ra Kristus.

⁷ Ngini balasu ni masahe 'oru 'i dadi taninga sigolona. 'Age rema ngowa'a ga'a 'aḏi ngaku mode-mode'e 'aḏi marimoi ra Kristus, mada'a 'aḏi ta'ajiri ngomi mi marimoi ra Kristus ua. Ananga gena-ge balasu 'aḏi ta'ajiri ngomi ḏi'i mi marimoi ra Kristus ma tero sa'olo ananga.

⁸ Kalaha ngoi to mahie mangale kuasa ga'a Kristus ro pula'a ra ngomi, ngoi to mara'a ua sababu kuasa gena-ge di'a ta site'e ninga ngo-ngaku, ta siwejere ua ninga ngo-ngaku.

⁹ Ngoi to oḏu'u ngini ni mafikiri ngoi reto siḏingoto surata-surata 'au nga'ene di'a simojo-mojongo ngini.

¹⁰ Ngoi to kanau so'o gena, sababu 'age rema ngowa'a 'aḏi kanau, “Surata-surata Paulus ma iḏingi lai te'e rema kuasa. Mada'a na'o unanga 'o made-de'oso tananga sigolona, unanga ngowa'a ma te'e ua re 'ai demo-demo ma ngale 'i cua.”

¹¹ Ngowa'a gena-ge balasu 'aḏi ma'insafu na'o ngomi 'age taninga sigolona, minga ga'a 'i ma tero sa'olo minga demo re ganau ga'a 'i silefo taminga surata-surata, wakutu ngomi ma'u kiḏanga ra ngini.

¹² Ngomi mi nau'u ua di'a mi site-tero bolo mi siḏe-ḏegoro minga 'ahu ma gau'u reo ananga ga'a 'aḏi mahie manga diri kau'u. Haga madutu sababu ananga 'aḏi 'a'a du-duga di'a situga ananga manga de'oso re ḏegoro masiretene, kara ananga 'aḏi sitantukanga manga de'oso re ḏegoro 'i rousu!

¹³ Ngomi so'o gena ua. Na'o ngomi mi mahie, mi palene daeraha munara ma bati ua. Na'o ngomi mi mahie, ngomi mi siajele pa'i mangale munara taminga daeraha ḇato ga'a Ma Jou'ongu Madutu ro pula'a kuasa ra ngomi. Re ngini ni osama nyo-nyoimi taminga daeraha munara sababu ngomi mi singadolo Habari Roanga ra ngini.

¹⁴ Sababu gena-ge, wakutu ngomi mi siajele mangale 'au nga'ene ngomi mi sapolo di'a mi singadolo Habari Roanga ra ngini, mode-mode'e ngomi supu ua taminga daeraha munara ma bati. Sababu 'au nga'ene, ngomi remi singadolo Habari Roanga mangale Kristus ra ngini.

¹⁵ Ngomi ḏi'i mahie ua, mangale ngowa'a lelegu manga munara ga'a 'i palisi taminga daeraha munara ma bati. Mada'a, ngomi mi nganono mangale ninga ngo-ngaku ra Kristus 'i madogo-dogo, la minga munara ma bati 'i madogo-dogo ḏi'i taninga sigolona.

¹⁶ Na'o so'o gena, ngomi nyengara singadolo Habari Roanga toma ngi'i ma lelegu ga'a matengo nyangu 'o sapolo di'a 'o singadolo Habari Roanga. Sababu ngomi mi oḏu'u mahie mangale ngowa'a manga munara ga'a ya si'a'a ḏua ra ananga manga daeraha.

¹⁷ Toma Boku 'Ofi-'Ofi 'i silefo so'o ne: “ 'A guna ḇato mau 'o sihie 'ori i'a i'a, ananga gena-ge balasu 'aḏi sihie mangale mo-moini ga'a Ma Jou'ongu Madutu ro 'a'a.”

¹⁸ Sababu ngowa'a ga'a 'aḏi mahie, ngowa'a gena-ge 'aḏi banari ua ra Ma Jou'ongu Madutu 'ai momina, mada'a pa'i ngowa'a ga'a Ma Jou'ongu Madutu masiretene ya'u sihie.