1 Yohanes 5 - Jaji ma Su-sungi

'Utungu talaḏi dungia

¹ 'A guna ḇato 'aḏi ngaku mangale Yesus gena-ge 'O Kristus ga'a Ma Jou'ongu Madutu 'o sijaji pasala ḏua, ananga gena-ge Ma Jou'ongu Madutu 'ai ngowa-ngowa'a. 'A guna ḇato 'aḏi dadalara Ma Jou'ongu Madutu manga Ḇaḇa, 'aḏi dadalara ḏi'i 'Ai ngowa-ngowa'a.

² Nena-ne 'i dadi didina'o rimoi ngene wo waro mode-mode'e mangale ngene wo dadalara Ma Jou'ongu Madutu 'ai ngowa-ngowa'a: Ngene wo dadalara Ma Jou'ongu Madutu re wa mete'e Unanga 'ai parenta.

³ Dadi nena-ne wo dadalara Ma Jou'ongu Madutu: Wa mete'e 'Ai parenta ga'a 'i ḏubuso ua.

⁴ Sababu ngowa'a mo-moini ga'a Ma Jou'ongu Madutu 'ai ngowa-ngowa'a, ngene nga'unu rewo 'utungu talaḏi dungia ma jira. Ananga gena-ge raḏi 'utungu talaḏi dungia ma jira sababu pa'i manga ngo-ngaku ḇato.

⁵ 'A guna nga'unu 'o 'utungu talaḏi dungia ma jira?! Pa'i ngowa'a ngaku Yesus ḇato, Ma Jou'ongu Madutu 'ai Ngowa'a Nau'u.

Sakisi ro'ange mangale Yesus Kristus

⁶ Yesus Kristus, Unanga ga'a 'o sapolo toma dungia nena-ne re Yohanes 'o baptis Unanga reo ḇanyo. Re Yesus 'ai ngaunu 'i pa'ala wakutu 'o sengene toma salib. Unanga 'o sapolo toma dungia nena-ne pa'i di'a 'O sanga baptis ḇato ua, mada'a di'a 'O sanga baptis re 'Ai ngaunu 'i pa'ala ḏi'i. Re Ma Ngagara 'Ofi-'Ofi 'i pula'a sakisi pasala ḏua mangale mo-moini gena-ge 'i banari, re Ma Ngagara 'Ofi-'Ofi enanga kama sa-sakala ua.

⁷ 'Age sakisi ro'ange mangale Yesus Kristus:

⁸ Ma Ngagara 'Ofi-'Ofi, ḇanyo re ngaunu. Enanga ro'ange gena-ge 'i pula'a sakisi ma tero.

⁹ Ngene biasa wo ngaku sakisi toma manusia. Mada'a Ma Jou'ongu Madutu masiretene 'ai sakisi mai lebe te'e i'a sababu Unanga Ma Jou'ongu Madutu re Ro pula'a sakisi mangale 'Ai Ngowa'a Nau'u.

¹⁰ Sababu gena-ge, 'a guna ḇato 'aḏi ngaku Ma Jou'ongu Madutu 'ai Ngowa'a Nau'u, ananga gena-ge raḏi waro tamanga 'akala re sinyingara ma dara mangale Ma Jou'ongu Madutu 'ai sakisi gena-ge 'i banari. Mada'a 'a guna ḇato 'aḏi ngaku ua Ma Jou'ongu Madutu 'ai sakisi, ananga gena-ge 'aḏi kanau Ma Jou'ongu Madutu ngowa'a sa-sakala; sababu ananga 'aḏi ngaku sakisi ua ga'a Ma Jou'ongu Madutu ro kanau mangale 'Ai Ngowa'a Nau'u.

¹¹ Ma Jou'ongu Madutu 'a sisakisi ra ngene nena-ne: Unanga 'o pula'a 'ahu kasingado-ngadolo i'a ra ngene, re 'Ai Ngowa'a Nau'u, 'ahu gena-ge ma cimi.

¹² Ngowa'a ga'a 'aḏi marimoi Rai Ngowa'a Nau'u, ananga gena-ge sanga 'ahu kasingado-ngadolo i'a re ngowa'a ga'a 'aḏi marimoi ua ra Unanga gena-ge, ananga gena-ge sanga 'ahu kasingado-ngadolo i'a ua.

'Ahu kasingado-ngadolo i'a

¹³ Ngoi to lefo surata nena-ne ra ngini ga'a rini ngaku ḏua Unanga, Ma Jou'ongu Madutu 'ai Ngowa'a Nau'u, la ngini na waro mangale ngini reni sanga 'ahu kasingado-ngadolo i'a.

¹⁴ Re ngene wo talaḏi Ma Jou'ongu Madutu kananga mojongo ua, sababu ngene wo ngaku mode-mode'e Unanga ra dawongo ngene nanga go-golo'o na'o ngene wo manyiata mete'e Unanga 'ai mau.

¹⁵ Re sababu ngene wa waro mangale Unanga 'o dawongo ngene nanga go-golo'o, ngene wo waro ḏi'i Unanga ḏuanga i'a 'o pula'a ra ngene 'oru ḇato ga'a ngene wo golo'o ra Unanga.

¹⁶ Na'o ngini ni oḏi'i i'a ninga ioronongoḏu matengo ngo-ngaku rimoi 'o 'a'a ḏosa ga'a 'i sigasa ua toma sengene kasingado-ngadolo i'a, ngini balasu ni manyiata ra Ma Jou'ongu Madutu, la Ma Jou'ongu Madutu ḏuanga i'a 'O pula'a 'ahu ra unanga gena-ge. Ngini nyengara ni golo'o so'o gena-ge di'a ngowa'a ga'a 'a'a ḏosa gena-ge. Mada'a 'age ḏosa ga'a 'i sigasa toma sengene kasingado-ngadolo i'a. Mangale gena-ge, ngoi to soma'a ua ngini ni manyiata ra Ma Jou'ongu Madutu di'a ananga ga'a 'aḏi 'a'a ḏosa so'o gena-ge.

¹⁷ 'A'a sala 'oru ḇato, gena-ge ḏosa. Mada'a 'age ḏi'i ḏosa ga'a sigasa ua ngowa'a toma sengene kasingado-ngadolo i'a.

¹⁸ Ngene wo waro ngowa'a mo-moini ga'a 'aḏi dadi Ma Jou'ongu Madutu 'ai ngowa-ngowa'a, ananga gena-ge 'aḏi madaga'a ua ḏosa tau-taunu sababu Ma Jou'ongu Madutu 'ai Ngowa'a Nau'u 'a saolo. Sababu gena-ge, 'Iblisi nyengara 'i si'a'a 'ori i'a ma jira yoḏu'u ra ananga gena-ge.

¹⁹ Ngene rewo waro mangale ngene nange-ne Ma Jou'ongu Madutu 'ai ngowa-ngowa'a, re dungia sitabi donga nena-ne 'i tegoro toma 'Iblisi ma kuasa.

²⁰ Ngene rewo waro ḏi'i mangale Ma Jou'ongu Madutu 'ai Ngowa'a Nau'u ro sapolo re Ro pula'a wo-waro ra ngene, la ngene wu nana'o Ma Jou'ongu Madutu ga'a banari. Ngene wo 'ahu marimoi ra Ma Jou'ongu Madutu ga'a banari re wo 'ahu marimoi Rai Ngowa'a Nau'u, Yesus Kristus. Unanga gena-ge mode-mode'e ma tero Ma Jou'ongu Madutu re Unanga masiretene 'ahu kasingado-ngadolo i'a ma cimi.

²¹ 'Ari ngowa-ngowa'a, ngini balasu ni maki-kiḏanga toma silamo'o re siḏubuso jou'ongu ma somoara.