1 Yohanes 3 - Jaji ma Su-sungi

Ma Jou'ongu Madutu 'ai ngowa-ngowa'a

¹ Ngene mode-mode'e wo heranga ma duhu sa'olo Ma Jou'ongu Madutu na dadalara ngene: Ngene nena-ne, Unanga 'o si'aro'o 'Ai ngowa-ngowa'a! Re mode-mode'e ngene Ma Jou'ongu Madutu 'ai ngowa-ngowa'a! Ngowa'a ga'a ngaku Yesus ua 'aḏi mangaku ua ngene sa'olo Ma Jou'ongu Madutu 'ai ngowa-ngowa'a, sababu ananga gena-ge 'aḏi nana'o Ma Jou'ongu Madutu ua.

² Ioronongoḏu ngo-ngaku rimoi ngoi tunu dadalara! Kalaha ngene nange-ne Ma Jou'ongu Madutu 'ai ngowa-ngowa'a, ngene wo waro nyangu mangale ḏuanga i'a nanga ḏe-ḏegoro ma duhu sa'olo. Sababu Ma Jou'ongu Madutu na siajele nyangu. Mada'a ngene rewo waro wakutu Kristus dadunu 'o sapolo moju, ngene wo dadi sa'olo Unanga, sababu wo oḏi'i Unanga 'ai ḏe-ḏegoro 'i ti-tiai.

³ Dadi ngowa'a mo-moini ga'a remanga ngo-nganono gena-ge, balasu 'aḏi ma'istiari manga diri, la ananga gena-ge mode-mode'e ngowa'a 'ofi-'ofi, ma tero sa'olo Kristus ga'a 'Ofi-'Ofi.

⁴ Ngowa'a mo-moini ga'a 'aḏi 'a'a ḏosa, 'aḏi mete'e ua Ma Jou'ongu Madutu 'ai hukumu ḏi'i. Sababu nena-ne ḏosa: Mete'e ua Ma Jou'ongu Madutu 'ai hukumu.

⁵ Ngini na waro Kristus masiretene kai ḏosa ua, re Unanga 'o sapolo toma dungia di'a 'a singi-ngiranga manusia manga ḏosa.

⁶ Ngowa'a mo-moini ga'a raḏi 'ahu marimoi ra Kristus, 'aḏi 'a'a ḏosa tau-taunu ua. Mada'a ngowa'a mo-moini ga'a 'a'a ḏosa tau-taunu, ananga gena-ge 'aḏi nana'o Kristus ua re 'aḏi sahe ua, i'a sa'olo Unanga 'o sapolo toma dungia nena-ne.

⁷ 'Ari ngowa-ngowa'a, ngini balasu ni ma'istiari ino awa-awa ngowa'a nu'u sihaga. Ngowa'a ga'a mete'e Ma Jou'ongu Madutu 'ai 'akala ma mau ananga gena-ge ngowa'a loasa re banari ma tero sa'olo Kristus.

⁸ Mada'a ngowa'a ga'a 'a'a ḏosa tau-taunu, ananga gena-ge 'Iblisi ma ngowa-ngowa'a. Sababu ma mulaingi i'a, 'Iblisi 'i baraḏosa ḏua. Ma sababu gena-ge, Ma Jou'ongu Madutu 'ai Ngowa'a Nau'u 'o sapolo toma dungia nena-ne di'a 'a siwejere 'Iblisi ma munara.

⁹ Ngowa'a ga'a raḏi dadi Ma Jou'ongu Madutu 'ai ngowa-ngowa'a 'aḏi 'a'a ḏosa tau-taunu ua sababu Ma Jou'ongu Madutu 'ai de'oso re ḏegoro 'i waiti tamanga 'ahu ma dara. Ananga gena-ge 'a'a ḏosa tau-taunu 'i yoḏu'u, sababu Ma Jou'ongu Madutu ya'u sidadi 'Ai ngowa-ngowa'a.

¹⁰ Nena-ne 'i dadi didina'o rimoi mangale ngene nyengara wa oḏi'i enanga 'i ma'u rapu Ma Jou'ongu Madutu 'ai ngowa-ngowa'a reo 'Iblisi ma ngowa-ngowa'a: 'A guna ḇato ga'a si'a'a mete'e ua Ma Jou'ongu Madutu 'ai 'akala ma mau bolo manga dadalara 'i cua tamanga ioronongoḏu ngo-ngaku rimoi, ananga gena-ge Ma Jou'ongu Madutu 'ai ngowa-ngowa'a ua.

Ma'u dadalara matengo re matengo

¹¹ Ma mulaingi ngini ni siajele pasala ḏua habari nena-ne: Ngene balasu wo ma'u dadalara matengo re matengo.

¹² Awa ngene ma tero sa'olo 'a Kain 'o dadi 'Iblisi ma ngowa'a re 'a sisengene 'ai nongoḏu masiretene. I'a sa'olo unanga gena-ge 'o sisengene 'ai nongoḏu?! Sababu 'ai de'oso re ḏegoro gena-ge 'i cira mada'a ma nongoḏu 'ai de'oso re ḏegoro 'i loasa re banari.

¹³ Sababu gena-ge, 'ari ioronongoḏu ngo-ngaku rimoi, ni heranga awa na'o ngowa'a ngaku Yesus ua 'aḏi emono ngini.

¹⁴ Ngene rewa waro ngene ma tero sa'olo ngowa'a sengene riwara, mada'a ngene ngowa'a ga'a sanga 'ahu kasingado-ngadolo i'a, sababu wo dadalara nanga ioronongoḏu ngo-ngaku rimoi. Mada'a ngowa'a ga'a 'aḏi dadalara ua manga ioronongoḏu ngo-ngaku rimoi, ananga gena-ge ma tero sa'olo ngowa'a raḏi sengene.

¹⁵ Ngowa'a ga'a 'aḏi dadalara ua manga ioronongoḏu ngo-ngaku rimoi, ananga gena-ge ma tero sa'olo ngowa'a ga'a 'aḏi sisengene ngowa'a. Re ngini na waro ḏi'i mangale na'o matengo 'o sisengene ngowa'a, unanga gena-ge 'o sanga ua 'ahu kasingado-ngadolo i'a.

¹⁶ Gena-ge 'i sijumu ra ngene mangale ma'u dadalara ma ngo'omo: Yesus Kristus nyengara ra sipula'a 'ai 'ahu, la ngene wo sanga salamata. Sababu gena-ge, ngene ḏi'i balasu wo nyengara wa sipula'a nanga 'ahu di'a nanga ioronongoḏu ngo-ngaku rimoi!

¹⁷ Na'o ngini reninga bai'i ni oḏi'i ninga ioronongoḏu ngo-ngaku rimoi 'aḏi basono kuranga, mada'a ni siwaro i'a ua, nyengara ngini ni aje ni dadalara Ma Jou'ongu Madutu?! Tantu ḏua, ua!

¹⁸ 'Ari ngowa-ngowa'a. Awa ngene nanga dadalara pa'i toma 'uḏu ma betu'u, bolo pa'i renanga demo ḇato. Mada'a ngene balasu wa sijumu dadalara gena-ge 'i baolo tananga 'akala re sinyingara ma dara mode-mode'e, singadolo ngowa'a ya oḏi'i gena-ge tananga ga'a.

'Akala namo-namoto ra Ma Jou'ongu Madutu 'ai momina

^19-20 Na'o ngene wo dadalara mode-mode'e ioronongoḏu ngo-ngaku rimoi so'o gena-ge, ngene ra waro mode-mode'e mangale ngene Ma Jou'ongu Madutu 'ai ngowa-ngowa'a, Unanga ga'a 'O ba-banari. Dadi ngene nanga 'akala re sinyingara 'i ogoro wakutu ngene wo manyiata ra Unanga, kalaha nanga 'akala re sinyingara 'i sisala ngene. Sababu Ma Jou'ongu Madutu 'ai wo-waro lebe kau'u reo ngene nanga 'akala re sinyingara; Unanga 'a waro mo-moini mangale ngene.

²¹ Dadi ngini ioronongoḏu ngo-ngaku rimoi ga'a ngoi tunu dadalara, na'o nanga 'akala re sinyingara 'i sisala ngene ua, ngene nyengara wo manyiata renanga 'akala namo-namoto ra Ma Jou'ongu Madutu.

²² Dadi 'oru ḇato ga'a ngene wo golo'o ra Unanga, ngene wa sanga, sababu ngene wa mete'e 'Ai parenta re wa sisanangi Unanga 'ai 'akala re sinyingara.

²³ Unanga 'ai parenta ra ngene so'o ne: Ngene balasu ngaku mangale Ma Jou'ongu Madutu 'ai Ngowa'a Nau'u, Unanga gena-ge Yesus Kristus, re ngene ḏi'i balasu wo ma'u dadalara matengo re matengo.

²⁴ Ngowa'a mo-moini ga'a 'aḏi mete'e Ma Jou'ongu Madutu 'ai parenta, ananga manga 'ahu marimoi ra Unanga, re Unanga marimoi ra ananga. Re ngene wa waro Ma Jou'ongu Madutu 'o marimoi ra ngene sababu Ma Ngagara 'Ofi-'Ofi ri sipula'a ra ngene.