1 Yohanes 1 - Jaji ma Su-sungi

Ma Jou'ongu Madutu 'ai 'Idini

¹ Surata nena-ne, ngomi ma lefo re masiḏingoto ra ngini. Toma dara 'i silefo mangale Unanga ga'a silomanga Ma Jou'ongu Madutu 'ai 'Idini. 'Ua re 'au wali moju wakutu dungia nena-ne 'i sidadi nyangu, Unanga rema enanga ḏua re Unanga gena-ge 'o pula'a 'ahu. Ngomi masiretene ma 'isene reminga ngau'u, ngomi masiretene ma oḏi'i reminga la'o, ngomi masiretene ma siteru reminga giama ra Unanga.

² Wakutu Unanga, ga'a 'o pula'a 'ahu gena-ge, 'o masijumu ra ngomi masiretene ma sisakisi tala. Sababu gena-ge, nange-ne ngomi ma singadolo ra ngini. Ngomi mi singadolo ra ngini mangale Unanga gena-ge 'o pula'a 'ahu kasingado-ngadolo i'a. Unanga ro masijumu ra ngomi, re wakutu dungia 'i sidadi nyangu, Unanga gena-ge 'o marimoi ra Ma Jou'ongu Madutu 'ai Ḇaḇa.

³ Dadi 'oru ga'a ngomi ma oḏi'i re 'isene ḏua, nange-ne ngomi ma singadolo ra ngini, la ngini ni 'ahu marimoi ra ngomi. Sidogo ḏi'i, ngene wo 'ahu marimoi ḏua ra Ma Jou'ongu Madutu nanga Ḇaḇa re 'Ai Ngowa'a Nau'u, Yesus Kristus.

⁴ 'Oru ga'a ngomi ma lefo, la ngene mo-moini nanga 'akala re sinyingara ma roanga mode-mode'e.

Ma Jou'ongu Madutu tarangi ma cimi

⁵ Habari ga'a ngomi masiretene ma 'isene Tai Ngowa'a Nau'u re ngomi ma singadolo ra ngini: Ma Jou'ongu Madutu tarangi ma cimi. Sababu gena-ge, 'ori i'a hafu-hafu 'i marimoi yoḏu'u.

⁶ Sababu gena-ge, na'o ngene wo aje nanga 'ahu marimoi ra Unanga, mada'a momongolo ua ngene wo 'ahu toma hafu-hafu ma dara moju, ngene ro sa-sakala re wo mete'e ua Ma Jou'ongu Madutu 'ai do-doto'o banari.

⁷ Mada'a siḏibo ḏi'i, na'o ngene wo 'ahu toma tarangi ma dara ma tero Ma Jou'ongu Madutu toma tarangi ma dara, ngene wo 'ahu marimoi reo ngowa-ngowa'a ngaku Yesus ma lelegu. Re Ma Jou'ongu Madutu 'ai Ngowa'a Nau'u, Yesus Kristus, 'a si'ofi ngene nanga ḏosa-ḏosa mo-moini Rai ngaunu masiretene.

⁸ Na'o ngene wo kanau mangale ngene nanga ḏosa 'i cua, gena-ge wa sihaga nanga diri masiretene, re nanga de'oso re ḏegoro wa mete'e riwara Ma Jou'ongu Madutu 'ai do-doto'o banari.

⁹ Mada'a siḏibo ḏi'i, na'o ngene wo mangaku nanga ḏosa-ḏosa ra Ma Jou'ongu Madutu, Unanga 'o 'adili madutu re 'a sitotomo 'Ai jaji: Unanga 'a singi-ngiranga nanga ḏosa-ḏosa re na si'ofi ngene nanga sala mo-moini.

¹⁰ Mada'a na'o ngene wo aje ngene wo madaga'a ḏosa soi moi i'a mai nyangu, ngene gena-ge ma tero sa'olo wo kanau Ma Jou'ongu Madutu sa'olo ngowa'a sa-sakala re nanga 'akala re sinyingara wa mete'e riwara Ma Jou'ongu Madutu 'ai do-doto'o banari.