1 Timotius 6 - Jaji ma Su-sungi

¹ Budaka ga'a ngowa'a ngaku Yesus balasu 'aḏi silamo'o mode-mode'e manga tuanga, la awa ngowa'a lelegu ga'a 'aḏi ngaku nyangu ya sijira yoḏu'u Ma Jou'ongu Madutu 'ai lomanga bolo nanga do-doto'o.

^2a Na'o tuanga re 'ai budaka, ananga gena-ge ngowa'a ngaku Yesus, awa budaka 'aḏi si'u'u ua, sababu manga tuanga ngowa'a ngaku Yesus ḏi'i. Mada'a budaka balasu 'aḏi de-de'oso tuanga gena-ge lebe rousu i'a ḏi'i, sababu budaka re tuanga ga'a sanga 'utungu tai budaka manga de-de'oso, ananga ngowa'a ngaku Yesus. Re ḏi'i, budaka 'aḏi dadalara manga tuanga sababu ananga nga muḏiḏi 'aḏi marimoi ra Yesus.

Do-doto'o ma rapu re ma banari

^2b Mo-moini gena-ge balasu ngana na sidoto'o re na'u ajele ma ngale.

³ 'A guna ḇato ga'a sidoto'o do-doto'o gena-ge ua, mada'a sidoto'o do-doto'o lelegu. Ḏua do-doto'o gena-ge 'i sa-sakala re ma 'asala ra nanga Jou Yesus Kristus ino ua re mete'e ua ḏi'i nanga 'agama ma do-doto'o.

⁴ Re ananga gena-ge ngowa'a momole re 'aḏi waro 'oru rimoi ua! Ngowa'a gena-ge si-siḏi fikirana singadolo ananga 'aḏi nyanyaḏi ma'u rubutu re ma'u tolabe mangale demo ma faeda 'i cua pa'i 'i sibaolo 'akala go-goḏi, 'aḏi nyanyaḏi ma'u salira, 'aḏi jajaha demo re 'aḏi ta'ajiri 'ori i'a ma jira,

⁵ re ma'u sangoro kama ḏo-ḏogumu ua. Ngowa-ngowa'a gena-ge manga fikirana ri tupunu di'a do-doto'o banari dadi mafikiri 'i banari riwara. Ananga gena-ge 'aḏi ta'ajiri na'o mete'e 'agama 'aḏi dadi ngowa'a rema-enanga.

⁶ Tantu ḏua, ngene wo sanga 'utungu lamo'o, na'o wo mete'e mode-mode'e 'agama banari re wo basono sanangi 'oru ḇato ga'a 'age ra ngene ḏua.

⁷ Sababu ngene wo sapolo toma dungia nena-ne wo gasa 'ori i'a rimoi ua. So'o gena ḏi'i ngene wo gasa 'ori i'a rimoi i'a ua, na'o wo maḏibo sisoi'i tala dungia.

⁸ Dadi na'o nanga ngo-ngoromo re pakeanga rema enanga ḏua, gena ḏua.

⁹ Mada'a ngowa'a ga'a mau manga 'ahu pai-pai'i, ananga capati eta'a toma 'Iblisi ma bo-baja re 'aḏi mete'e manga nyafusu lai repe singadolo ananga dadi nyafusu ma budaka. Nyafusu-nyafusu so'o gena-ge, nyafusu ma haga re sigasa ngowa'a toma jira ma dara.

¹⁰ Sababu na'o ngene wo nyafusu pa'i pipisi ḇato, tananga 'akala re sinyingara ma dara 'i baolo 'ori i'a ma jira mo-moini. 'Age ngowa'a mamuni'a 'aḏi dedele pa'i mau sanga pipisi ḇato singadolo 'aḏi mete'e riwara do-doto'o banari, dadi 'aḏi eta'a toma jira ma dara.

Ajele ma ngale di'a 'a Timotius

¹¹ Mada'a ngana Timotius Ma Jou'ongu Madutu 'ai ngowa'a ga'a Unanga 'o cumutu ḏua dadi ngana balasu no maki-kiḏanga toma de'oso re ḏegoro gena-ge. Siḏibo ḏi'i, ngana no makutale mode-mode'e di'a no mete'e Ma Jou'ongu Madutu 'ai 'akala ma mau re dadi ngowa'a loasa re banari ra Ma Jou'ongu Madutu 'ai momina, ganapu dogo te'e 'ani ngo-ngaku ra Kristus, ma'u dadalara matengo re matengo, 'ani ngo-ngaku 'i kama elala ua na'o sanga sangisara, re pake 'akala ḇanyo.

¹² Makutale mode-mode'e di'a 'ani 'ahu 'i mete'e Ma Jou Yesus tau-taunu, la ngana marerebe nomoro: 'ahu kasingado-ngadolo i'a. Sababu di'a gena-ge Ma Jou'ongu Madutu 'o 'aro'o ngana wakutu ngana no mangaku ḏua mangale 'ani ngo-ngaku ra Kristus toma ngowa'a repe manga biono.

¹³ Ma Jou'ongu Madutu 'o si'ahu 'oru ḇato re Yesus Kristus 'o sakisi banari ra Pontius Pilatus; ra Manga momina, ngoi to golo'o ra ngana:

¹⁴ Na mete'e 'ari bererongo gena-ge rani 'akala re sinyingara mode-mode'e, la 'ani de'oso re ḏegoro kama rapu ua, singadolo ḏuanga i'a ma 'orasa enanga 'i ngadolo nanga Jou Yesus Kristus dadunu 'o sapolo moju.

¹⁵ Unanga 'ai ta-sapolo enanga ma 'orasa 'i tero-tero ga'a Ma Jou'ongu Madutu masiretene 'a sitantukanga - Unanga gena-ge ga'a 'Ai ngowa-ngowa'a 'U puji re silamo'o. Unanga gena-ge 'Ai kuasa ma pari cua re 'Olana toma 'olana mo-moini, re Ma Jou toma tuanga mo-moini.

¹⁶ Unanga gena-ge ḇato, maut 'u 'aturu yoḏu'u, 'o 'ahu toma cahaya ga'a manusia ngene wo sebanga i'a mai yoḏu'u, manusia matengo i'a mai nyangu wo oḏi'i unanga. Dadi ino ngene wu silamo'o Unanga ga'a 'O patasa di'a 'O parenta kasingado-ngadolo i'a. 'Amin.

¹⁷ Ngana balasu no golo'o toma ngowa-ngowa'a rema-enanga toma dungia nena-ne, awa ananga 'aḏi momole re awa 'aḏi masinganono toma 'ori i'a 'i kakali ua ma tero sa'olo manga harata. Ananga balasu 'aḏi masinganono ra Ma Jou'ongu Madutu ga'a 'o pula'a 'oru ḇato ra ngene pai-pai'i di'a ngene nanga 'ahu.

¹⁸ No golo'o ra ananga, ananga balasu ya sijumu manga 'akala re sinyingara ma la-la, 'aḏi 'a'a ga'a ma la-la ḇato re tala'a ua.

¹⁹ Na'o ananga 'aḏi 'a'a so'o gena, ma tero sa'olo ananga 'aḏi gogono manga harata toma soroga. Gena-ge 'i dadi ananga manga golago di'a wakutu Yesus ḏuanga i'a dadunu sapolo moju, la ananga 'aḏi dawongo 'ahu banari.

²⁰ Timotius, ngoi to siwatasa do-doto'o banari ra ngana, nange-ne na kadiarata la-la ino. Ngana no maki-kiḏanga toma demo re ganau ga'a ma faeda 'i cua re ni rubutu awa 'ori i'a ga'a ananga 'aḏi kanau manga wo-waro mangale Ma Jou'ongu Madutu mada'a wo-waro gena-ge 'i ma tero ua Ma Jou'ongu Madutu 'ai demo.

²¹ 'Age ngowa'a mamuni'a ga'a raḏi ngaku wo-waro gena-ge singadolo ananga 'aḏi si'a'a ngowa'a raḏi sai'i toma do-doto'o mangale Kristus ga'a ananga ya ngaku ḏua 'au nga'ene. Ngoi to golo'o Ma Jou'ongu Madutu mangale 'Ai mura re dadalara sieanga i'a ua ngini.