1 Timotius 4 - Jaji ma Su-sungi

Guru-Guru sa-sakala

¹ Mada'a Ma Ngagara 'Ofi-'Ofi 'i siajele mode-mode'e mangale ḏuanga i'a ma 'orasa 'i ngadolo 'age rema ngowa'a ga'a 'aḏi soloto Kristus. Ananga ḏuanga i'a 'aḏi 'isene roh-roh ma jira re ya mete'e enanga ma do-doto'o ma jira.

² Ngowa'a munafiki, ananga 'aḏi singadolo do-doto'o gena-ge. Ngowa-ngowa'a gena-ge manga midingi ri pici, sababu manga 'akala re sinyingara ma kanau ri hafu-hafu.

³ Ananga 'aḏi doto'o ngowa'a 'aḏi molo'ara awa, re oromo awa ngo-ngoromo haram. Mada'a ngo-ngoromo gena-ge, Ma Jou'ongu Madutu 'a sidadi di'a manusia ya oromo. Sababu gena-ge, ngene ga'a rewo ngaku Kristus re wa waro ḏua do-doto'o banari ra Ma Jou'ongu Madutu, ngene wo sibere ie murasa ma la ra Unanga, kara wa oromo ngo-ngoromo gena-ge.

⁴ 'Ori i'a mo-moini ga'a Ma Jou'ongu Madutu 'a sidadi, gena-ge rousu. Sababu gena-ge, na'o wa dawongo ḏua re sibere ie murasa ma la ra Ma Jou'ongu Madutu, rimoi i'a mai ua enanga 'i haram.

⁵ Sababu mete'e Ma Jou'ongu Madutu 'ai demo re wo manyiata so'o gena-ge, ngo-ngoromo gena-ge 'i dadi wosono ua.

Kristus Yesus 'ai falalomu balasu 'o munara cufala madutu

⁶ Na'o do-doto'o mo-moini gena-ge ngana na'u doto'o tani ioronongoḏu ngo-ngaku rimoi mo-moini, ngana ḏuanga i'a no dadi 'a Kristus Yesus 'ai falalomu 'o munara cufala madutu. Re ngana ḏuanga i'a na site'e 'ani ngo-ngaku reo demo ra Ma Jou'ongu Madutu ga'a ngene wa ngaku re Unanga 'ai do-doto'o banari ga'a ngene wa mete'e singadolo 'orasa nange-ne.

⁷ Ngana balasu no maki-kiḏanga toma jarita-jarita sa-sakala ga'a ma faeda 'i cua di'a ngowa'a ga'a mau 'ahu loasa re banari. Siḏibo ḏi'i, ngana balasu no madoto'o masiretene di'a no 'ahu loasa re banari.

⁸ Na'o ngene wo site'e nanga lese, ma faeda pa'i ceka'a ua. Mada'a na'o wa site'e nanga nyawa sababu wo mete'e Ma Jou'ongu Madutu 'ai do-doto'o mangale 'ahu loasa re banari, enanga ma faeda lai lamo'o toma 'ori i'a mo-moini. Sababu na'o wo 'ahu so'o gena-ge, ngene wo sanga 'ahu ga'a Unanga 'a sijaji toma 'orasa nange-ne re 'ahu toma biono i'a.

⁹ Demo-demo gena-ge enanga 'i tero, dadi balasu wa dawongo re wa ngaku mode-mode'e.

¹⁰ Sababu gena-ge, ngene makutale mode-mode'e re munara mode-mode'e di'a wa mete'e demo-demo gena-ge ga'a 'i banari. Sababu ngene pa'i wo masinganono ḇato ra Ma Jou'ongu Madutu ga'a 'O 'ahu kasingado-ngadolo i'a re 'O sisalamata ngowa'a mo-moini, ngowa'a gena-ge ga'a raḏi ngaku Yesus.

¹¹ Na'u sidoto'o mo-moini gena-ge re na'u soma'a jama'ata ya mete'e do-doto'o gena-ge.

¹² Awa na'u sieanga i'a matengo i'a 'aḏi sipa-pake ua ngana sababu ngana no ra-ramasa ie moju. Siḏibo ḏi'i, ngana balasu no sijumu ngo'omo, la ngowa'a ngaku Yesus ya mete'e 'ani demo re ganau, 'ani de'oso re ḏegoro, 'ani 'ahu ma duhu no dadalara ngowa'a ngaku Yesus, 'ani ngo-ngaku re 'ani 'ahu 'ofi-'ofi ma dara.

¹³ Ngana balasu no cufala di'a baca Boku 'Ofi-'Ofi toma ngowa'a ngaku Yesus re na'u babata re na'u doto'o ananga, singadolo ngoi to sapolo.

¹⁴ Awa ngana siwaro i'a ua no pake cocatu ra Ma Jou'ongu Madutu 'ai Ngagara 'Ofi-'Ofi ga'a sipula'a ḏua ra ngana, wakutu jama'ata ma bi-biri'i ya siteru manga giama ra ngana ni sae'e, re nabi-nabi ya singadolo Ma Jou'ongu Madutu 'ai bererongo ra ngana.

¹⁵ Mo-moini gena-ge no cufala na si'a'a, la ngowa'a ya oḏi'i Ma Jou'ongu Madutu 'ai munara tani 'ahu ma dara.

¹⁶ Ngana balasu no ma'istiari la-la: bae 'ani 'ahu, bae 'ani do-doto'o. Mo-moini gena-ge ngana balasu na si'a'a kama ḏogumu ua. Na'o si'a'a so'o gena-ge, ngana no sisalamata 'ani diri masiretene re ngowa'a lelegu ga'a ya 'isene ngana 'ani do-doto'o.