1 Timotius 2 - Jaji ma Su-sungi

Ma duhu sa'olo jama'ata 'aḏi silamo'o re siḏubuso Ma Jou'ongu Madutu

¹ Sababu gena-ge, siḏa-siḏa ngoi to babata mode-mode'e ra ngini di'a ngini ni golo'o ra Ma Jou'ongu Madutu, la 'A sitailako ninga paralu matengo re matengo, re ni manyiata di'a ngowa'a lelegu manga paralu, re ni sibere ie murasa ma la ra Ma Jou'ongu Madutu mangale 'oru ga'a Unanga 'a si'a'a ḏua ra ngini matengo re matengo. Ngini ni manyiata ḏi'i di'a ngowa'a mo-moini:

² di'a 'olana-'olana re ngowa'a la-lamo'o, la ngini ninga 'ahu toma dame re sanangi ma dara re sijumu ninga 'ahu ga'a 'i loasa re banari ra Ma Jou'ongu Madutu, re si'a'a ḏi'i 'ori i'a ma la-la toma ngowa'a mo-moini.

³ Manyiata so'o gena 'i rousu masala re sisanangi Ma Jou'ongu Madutu 'ai 'akala re sinyingara, Unanga ga'a nanga Salamata ma Cimi.

⁴ Unanga 'o mau ngowa'a mo-moini sanga salamata re 'aḏi waro do-doto'o banari mangale Kristus.

⁵ Sababu Ma Jou'ongu Madutu pa'i matengo re 'age pa'i matengo ḇato nga'unu dadi lese to golona ra Ma Jou'ongu Madutu re manusia. Unanga gena-ge Kristus Yesus, 'o manusia ḏi'i.

⁶ Unanga 'o sidoa'a 'ai 'ahu di'a 'o tuusu manusia mo-moini, la Unanga 'a sibebasa ananga gena-ge tamanga ḏosa ma kuasa. Unanga 'o si'a'a so'o gena-ge wakutu Ma Jou'ongu Madutu 'o sitantukanga pasala ḏua ma 'orasa 'i tero-tero, la Unanga 'o sijumu 'Ai mau mangale manusia mo-moini 'aḏi sanga salamata.

⁷ Sababu so'o gena, Ma Jou'ongu Madutu 'o cumutu ngoi di'a to dadi Unanga 'ai so-soma'a, la ngoi to singadolo Habari Roanga re to doto'o habari banari mangale Kristus Yesus toma ngowa'a Yahudi ua. 'Oru ga'a to siajele nena-ne, mode-mode'e; ngoi to sa-sakala ua.

⁸ Sababu gena-ge, le'a ḇato ngini malomu di'a ni silamo'o re siḏubuso Ma Jou'ongu Madutu, ngoi to golo'o 'o na-nau'u 'aḏi manyiata. Mada'a na-nau'u balasu manga 'ahu mete'e Ma Jou'ongu Madutu 'ai do-doto'o re wakutu ananga 'aḏi manyiata kamanga ruta ua, bolo kamanga gogono 'akala ua toma ngowa'a lelegu tamanga 'akala re sinyingara ma dara.

⁹ So'o gena ḏi'i, we-were'a balasu 'aḏi mapake camari awa, la awa na-nau'u ya'u nyafusu re manga utu biasa ḇato. Awa ḏi'i 'aḏi mapake guraci, 'o mutiara bolo pakeanga ma ijana hali-hali di'a ngowa'a ya'u sitoro.

¹⁰ Siḏibo ḏi'i, ngowa'a 'aḏi sitoro were'a, sababu manga de'oso re ḏegoro ga'a 'i banari di'a were'a ga'a 'aḏi masiajele mangale ananga gena-ge ngowa'a ngaku Yesus.

¹¹ Wakutu ngowa'a 'aḏi doto'o, we-were'a balasu 'aḏi 'isene masiogoro remanga 'akala re sinyingara maholo tala.

¹² Ngoi to simaha ua we-were'a 'aḏi doto'o bolo 'aḏi parenta 'o na-nau'u. We-were'a balasu 'aḏi masiogoro re 'isene na'o ngowa'a 'aḏi doto'o.

¹³ Sababu ma mulaingi Ma Jou'ongu Madutu 'o sidadi 'a Adam ḏua, kara ngo Hawa

¹⁴ re 'a Adam 'o sanga sihaga toma cuku'u ua, mada'a ngo Hawa mo sanga sihaga re mo eta'a toma ḏosa.

¹⁵ Mada'a Ma Jou'ongu Madutu ḏuanga i'a 'o sisalamata we-were'a sababu ananga 'aḏi maḏe-ḏegoro i'a, na'o ya siholo manga 'akala re sinyingara, 'aḏi ngaku tau-taunu ra Kristus, 'aḏi dadalara ngowa'a lelegu re 'aḏi sijumu manga 'ahu ga'a 'i loasa re banari.