1 Tesalonika 3 - Jaji ma Su-sungi

¹ Ioronongoḏu ngo-ngaku rimoi, ngomi mi 'elingi ngini lai siḏi singadolo mau ma'u sanga moju. Sababu gena-ge, wakutu ngomi mi manahana ri yoḏu'u, ngomi nga muḏiḏi mi mafakati mi tegoro toma limau Atena moju

² re mi 'utusu 'a Timotius 'o tagi siḏa toma limau Tesalonika, la unanga 'o babata ngini re 'o site'e ninga ngo-ngaku ra Yesus Kristus. Timotius ḏi'i 'o dadi Ma Jou'ongu Madutu 'ai falalomu, 'o munara rimoi ra ngomi di'a singadolo Habari Roanga.

³ Ngomi mi 'utusu unanga 'o sibabata re site'e ngini, la matengo i'a ua ni madorusu sababu ni sanga ma sikisa. Ngini masiretene na waro ḏua mangale sikisa mo-moini gena-ge 'i osama Ma Jou'ongu Madutu 'ai 'akala ma mau di'a ngene,

⁴ sababu wakutu ngomi 'age taninga sigolona moju, ngomi mi siajele tau-taunu mangale ngene ḏuanga i'a wa basono ma sangisara. Nange-ne 'i dadi ma tero sa'olo ngomi mi siajele pasala ḏua ra ngini.

⁵ Sababu gena-ge, wakutu ngoi ta tahana ta nga'unu riwara totoma habari mangale ngini, ngoi to 'utusu 'a Timotius ra ngini di'a 'a disa waro mangale ngini ninga ngo-ngaku ra Ma Jou Yesus: lai te'e moju bolo ua. Ngoi to dodato awa-awa ngini ni eta'a toma 'Iblisi ma bo-baja, marai minga galasau'u ma duduala 'i parasaja.

⁶ Nange-ne 'a Timotius da'a ra ngini ino re 'o maḏibo ḏua 'ane re 'o siajele ḏua habari la-la mangale ninga ngo-ngaku ra Ma Jou Yesus re ngini ni ma'u dadalara. Unanga 'o siajele ḏua ra ngomi, ninga 'akala re sinyingara 'i sanangi masala wakutu ni si'elingi ie ngomi, re ni ma'u sanga ra ngomi ma tero sa'olo ngomi mau ma'u sanga moju ra ngini.

⁷ Sababu gena-ge, kalaha ngomi mi sanga susa re sangisara re sikisa, wakutu ngomi mi 'isene mangale ngini ninga ngo-ngaku lai te'e re ni macako'o namo-namoto ra Ma Jou Yesus, gena-ge 'i site'e ngomi minga 'akala re sinyingara;

⁸ singadolo 'orasa nange-ne, ngomi mabasono mode-mode'e minga 'ahu 'i loasa sababu ngini ni macako'o namo-namoto ra Ma Jou Yesus.

⁹ Sababu gena-ge, wakutu ngomi mi manyiata, ngomi mabalasa ma nga'unu ua remi pula'a murasa ma la ra Ma Jou'ongu Madutu, sababu ma basono roanga re monere, sababu ngini.

¹⁰ Lobi'i re wangere, ngomi mi manyiata golo'o ra Ma Jou'ongu Madutu reminga 'akala re sinyingara mode-mode'e, nga'unu gari'a ngomi masiretene ma'u sanga ra ngini, la 'oru enanga 'i tiai nyangu mangale ninga ngo-ngaku ra Ma Jou Yesus, nga'unu ngomi ma dogo.

¹¹ Ngoi to golo'o ra Ma Jou'ongu Madutu masiretene nanga Ḇaḇa re nanga Jou Yesus Kristus di'a pula'a ngo'omo, la ngomi ma'u sanga moju ra ngini.

¹² Re ngomi mi golo'o ra Ma Jou di'a 'A dogo ninga dadalara matengo re matengo re ngowa'a mo-moini, ma tero sa'olo ngomi mi dadalara ngini.

¹³ Ḏi'i, ngomi mi golo'o ra Unanga gena-ge mangale 'a site'e ninga 'akala re sinyingara, la ra Ma Jou'ongu Madutu nanga Ḇaḇa 'ai momina ngini ngowa'a 'ofi-'ofi re de'oso re ḏegoro ma rapu ua wakutu Ma Jou Yesus dadunu 'o sapolo moju mame-mete'e ngowa'a ga'a raḏi dadi Ma Jou'ongu Madutu 'ai ngowa-ngowa'a.