1 Petrus 5 - Jaji ma Su-sungi

Duga re domolo di'a jama'ata ma bi-biri'i re ngowa'a tubaie-tubaie

¹ Ngoi to ajele ma ngale ra ngini, jama'ata ma bi-biri'i sababu ngoi ḏi'i jama'ata ma bi-biri'i ma tero sa'olo ngini, re ḏi'i ngoi to oḏi'i masiretene 'a Kristus 'ai sangisara. Ḏuanga i'a, wakutu ma 'orasa enanga 'i ngadolo Ma Jou'ongu Madutu 'o sijumu Kristus 'ai mulia ra ngene mo-moini, ngoi ḏi'i ta dawongo Unanga 'ai mulia ma balangu.

² Ngoi to golo'o mode-mode'e ra ngini, ni jaga la-la jama'ata ga'a Ma Jou'ongu Madutu 'o siwatasa ra ngini, ma tero sa'olo sowohi 'aḏi jaga la-la manga doba-doba. Munara gena-ge awa ni 'a'a rema pakisa, mada'a reninga 'akala re sinyingara sa-sanangi. Sababu Ma Jou'ongu Madutu 'o mau ngini ni 'a'a so'o gena. Awa ngini ni 'a'a sababu 'age rema karana. Siḏibo ḏi'i, sababu ngini nyafusu masala ni riono ananga.

³ So'o gena ḏi'i, awa ngini ni parenta ma tero sa'olo 'olana 'o parenta toma ngowa-ngowa'a, ga'a Ma Jou'ongu Madutu 'o siwatasa ra ngini. Siḏibo ḏi'i ngini balasu ninga 'ahu ma duhu la-la sa'olo nana'o rimoi di'a ananga ya cuḏuḏu'u.

⁴ Wakutu ḏuanga i'a Sowohi ma Sae'e Unanga 'o sapolo, Unanga 'o pula'a lastari ra ngini. Lastari gena-ge 'i jama-jamanga kama iranga ua, nange-ne re si'a.

⁵ So'o gena ḏi'i, ngini ngowa'a tubaie-tubaie ngini balasu ni ta'aloko ngowa'a ga'a raḏi 'umuru i'a. Ioronongoḏu ngo-ngaku rimoi mo-moini, ngini balasu ma'u riono i'a re ino, reninga 'akala re sinyingara maholo tala. Sababu toma Boku 'Ofi-'Ofi 'i silefo so'o ne: “Ma Jou'ongu Madutu 'o lawana ngowa'a ga'a 'o matoro, mada'a unanga ga'a 'o siholo 'ai 'akala re sinyingara, Ma Jou'ongu Madutu 'u pula'a 'Ai mura re dadalara.”

⁶ Sababu gena-ge, ngini balasu ni masiholo ninga diri ra Ma Jou'ongu Madutu, Unanga ga'a 'Ai kuasa ma pari cua. Sababu wakutu Ma Jou'ongu Madutu 'o sitantukanga enanga ma 'orasa 'i tero-tero, Unanga ḏuanga i'a 'o sihie ninga diri.

⁷ Sidoa'a ninga dodato mo-moini ra Ma Jou'ongu Madutu, Unanga gena-ge 'a sitotomo ninga 'ahu ma paralu sababu Unanga 'o kadiarata ngini.

⁸ Ni ma'istiari re ni ḏu-ḏuanga ḏua tau-taunu di'a ni talaḏi 'oru ḇato ga'a ḏuanga i'a 'i dadi. Sababu 'Iblisi ga'a ninga lawana 'i koloḏi i'a re ino, di'a 'i sijira ninga ngo-ngaku 'i ma tero sa'olo singa 'i maboa-boa'a disa ma ngo-ngoromo.

⁹ Ngini balasu ni lawana 'Iblisi reninga ngo-ngaku lai te'e ra Kristus. Sababu ngini na waro mangale ninga ioronongoḏu ngo-ngaku rimoi toma dungia sitabi donga 'aḏi sanga sangisara ḏi'i, ma tero sa'olo 'oru ga'a ngini na sanga.

¹⁰ Ti'ara ua, ngini ni basono ma sangisara. Togumu i'a Ma Jou'ongu Madutu 'o sitiai ngini moju: Unanga gena-ge masiretene 'O site'e ninga ngo-ngaku, la ninga ngo-ngaku kama elala ua, mada'a ni nga'unu tahana toma 'oru ḇato. Unanga 'o 'a'a so'o gena-ge, sababu Unanga romanga mura re dadalara re Ro 'aro'o ngini di'a ni sanga balangu Tai kabasarana kama ḏo-ḏogumu ua, sababu ni marimoi ra Kristus.

¹¹ Puji re silamo'o Ma Jou'ongu Madutu, sababu Unanga gena-ge, 'o parenta kasingado-ngadolo i'a. 'Amin.

Tabea re surata ma ḏo-ḏogumu

¹² Wakutu ngoi to lefo surata nena-ne 'i kiḏanga ua, 'a Silwanus 'o riono ngoi. Re ngoi to waro unanga sa'olo ioronongoḏu ngo-ngaku rimoi ga'a 'o munara cufala ra Yesus. Tari surata gena-ge ma dara, to babata ngini re to siajele mode-mode'e mangale ma duhu sa'olo Ma Jou'ongu Madutu 'o sijumu 'ai mura re dadalara ra ngene. Kalaha ngini reni sanga sangisara, awa ni matogumu ni macako'o namo-namoto Tai mura re dadalara gena-ge.

¹³ Jama'ata Babel ga'a osama nyo-nyoimi ra Ma Jou'ongu Madutu 'ai 'umata ḏi'i, ananga gena-ge 'aḏi siḏingoto tabea ra ngini. Re 'a Markus ga'a ngoi tu dadalara ma tero sa'olo 'ari ngowa'a, unanga ḏi'i 'o siḏingoto tabea ra ngini.

¹⁴ Ni ma'u tabea i'a re ino matengo re matengo reninga dadalara sa'olo ngowa'a ngaku Yesus. Ngoi to golo'o ra Ma Jou'ongu Madutu mangale Unanga 'o pula'a dame ra ngini mo-moini sababu ngini ni marimoi ra Kristus.