1 Petrus 4 - Jaji ma Su-sungi

'Ahu ma su-sungi

¹ Dadi sababu Kristus 'ai lese basono sangisara, ngini ḏi'i balasu ni ḏu-ḏuanga ḏua di'a basono sangisara. Ḏua ngini ni jaga ninga ngo-ngaku. Sababu 'a guna ḇato ga'a tamanga lese basono sangisara gena-ge, ananga 'aḏi 'a'a ḏosa riwara.

² Sababu gena-ge, ngini ni 'ahu-'ahu moju toma dungia, balasu ni mete'e Ma Jou'ongu Madutu 'ai 'akala ma mau re awa ni mete'e manusia manga nyafusu.

³ Ma siḏa ma di'ara ḏua, ngini ninga 'ahu ma duhu sa'olo ngowa-ngowa'a ga'a 'aḏi ngaku ua Ma Jou'ongu Madutu. Ngini ninga 'ahu mete'e dungia ma nyafusu: Ngini ni ka'e ni ma'eto-'etolo, re ni 'a'a laya kama 'atoranga ua, mete'e su-sudala, re silamo'o jou'ongu ma somoara.

⁴ Sababu gena-ge 'orasa nange-ne, ananga ga'a 'aḏi nana'o Ma Jou'ongu Madutu ua, ananga gena-ge 'aḏi kage re 'aḏi fitana ngini, sababu ananga 'aḏi oḏi'i ngini ninga 'ahu mete'e riwara manusia mo-moini manga nyafusu ma jira, ma tero sa'olo ananga ua.

⁵ Mada'a ḏuanga i'a ananga masiretene ya sitarangi mangale manga de'oso re ḏegoro ra Ma Jou'ongu Madutu ga'a ḏuanga i'a 'O sijuruhakimi ngowa'a 'ahu-'ahu re ngowa'a senge-sengene mo-moini.

⁶ Ma sababu gena-ge, Kristus 'a singadolo Habari Roanga toma ngowa'a ga'a 'aḏi dadi ngowa'a ngaku Yesus, mada'a nange-ne ananga gena-ge raḏi sengene. Gena-ge 'i dadi sababu Ma Jou'ongu Madutu ro sijuruhakimi ngowa'a gena-ge mete'e manga 'ahu, ma tero sa'olo 'O sijuruhakimi ngowa'a mo-moini, dadi ananga mo-moini gena-ge raḏi sengene. Mada'a ananga manga roh 'i tegoro toma soroga mete'e Ma Jou'ongu Madutu 'ai 'akala ma mau.

De'oso re ḏegoro ma 'ofi-'ofi

⁷ 'Orasa dungia ma ḏo-ḏogumu sa'i ri ngadolo. Sababu gena-ge, ni siogoro tala ninga 'akala re sinyingara re ni ma'istiari, la ngini nga'unu manyiata ra Unanga reninga 'akala bo-boloto.

⁸ Ma la-lamo'o ma re'u i'a ḏi'i, ngini balasu ni ma'u dadalara mode-mode'e. Sababu na'o ngini ni dadalara so'o gena-ge, matengo re matengo manga ḏosa ngini na gogono ua taninga 'akala re sinyingara.

⁹ Ngini matengo re matengo balasu ni dawongo ngowa'a ga'a masiḏingoto taninga wala, kama kuḏubungu ua.

¹⁰ Ngini matengo re matengo reni dawongo cocatu ma tero ua ga'a Ma Jou'ongu Madutu 'o pula'a mete'e 'Ai mura re dadalara. Sababu gena-ge, ngini balasu ni pake la-la cocatu gena-ge di'a ni ma'u riono matengo re matengo. Ngini balasu ni munara cufala ga'a Unanga ro siwatasa ra ngini.

¹¹ Na'o matengo i'a 'o singadolo Habari ra Ma Jou'ongu Madutu ino, unanga balasu 'o kanau sa'olo ngowa'a ga'a Unanga 'o 'utusu di'a singadolo pa'i Habari gena-ge ḇato. Na'o matengo i'a 'o riono ngowa'a, 'o riono rai de-de'e ga'a Ma Jou'ongu Madutu ro pula'a ra unanga. Ngini ni 'a'a so'o gena-ge, la ngowa-ngowa'a ga'a oḏi'i ninga ga'a lai rousu, ḏuanga i'a 'aḏi puji re silamo'o Ma Jou'ongu Madutu sababu Yesus Kristus 'ai munara taninga 'akala re sinyingara ma dara. Ma Jou'ongu Madutu Unanga masiretene ga'a 'O parenta re 'O dawongo puji re silamo'o kasingado-ngadolo i'a. 'Amin.

Sangisara sa'olo ngowa'a ngaku Yesus

¹² Ioronongoḏu ngo-ngaku rimoi ga'a ngoi tunu dadalara, awa ni heranga na'o ni sanga sangisara lai siḏi. Sangisara gena-ge 'i sipake di'a disa waro ninga ngo-ngaku 'i mode-mode'e, bolo ua. Ngini ni ta'ajiri awa ngowa-ngowa'a ngaku Yesus 'aḏi basono kama sangisara ua.

¹³ Siḏibo ḏi'i, jobilaha ngini ni dawongo reninga roanga, sababu ngini sanga sangisara ḏi'i ma tero Yesus sanga sangisara. Kalaha so'o gena nange-ne, ḏuanga i'a toma 'orasa ngowa-ngowa'a ya oḏi'i simulia Unanga, ngini lebe maroanga.

¹⁴ Na'o ngowa'a 'aḏi je-jengere ngini sababu ni mete'e Kristus, ngini ni bara'utungu. Enanga gena-ge 'i dadi nana'o rimoi mangale Ma Jou'ongu Madutu 'ai Ngagara 'Ofi-'Ofi ga'a mulia, enanga 'age 'i tegoro ra ngini.

¹⁵ Mada'a na'o ngini ni sangisara, awa sababu ni sisengene ngowa'a, ni tori'i bolo ni madaga'a 'ori i'a ma jira bolo ni capuru ngowa'a lelegu manga hali.

¹⁶ Mada'a ni mara'a awa na'o ngini ni sangisara sababu ngini ngowa'a Kristen. Siḏibo ḏi'i, ngini ni sibere ie murasa ma la ra Ma Jou'ongu Madutu sababu ngini reni dadi mode-mode'e ngowa'a ngaku Yesus.

¹⁷ Ḏuanga i'a enanga ma 'orasa 'i ngadolo di'a Ma Jou'ongu Madutu 'o sijuruhakimi ngowa'a mo-moini, siḏa-siḏa sijuruhakimi Ma Jou'ongu Madutu 'ai ngowa-ngowa'a. Mada'a na'o Ma Jou'ongu Madutu 'o sijuruhakimi ngini siḏa, tantu ḏua ngowa'a ga'a 'aḏi ngaku ua Habari Roanga da'u ra Ma Jou'ongu Madutu tala, ananga gena-ge ḏuanga i'a sanga sangisara lebe tubuso.

¹⁸ Toma Boku 'Ofi-'Ofi ma dara 'i silefo so'o ne: “Na'o ngowa-ngowa'a ga'a 'aḏi mete'e Ma Jou'ongu Madutu 'ai 'akala ma mau mai 'aḏi sanga sangisara ḏi'i, kara 'aḏi sanga salamata toma soroga. 'Oru 'i dadi reo ngowa'a baraḏosa ga'a 'aḏi mete'e ua Ma Jou'ongu Madutu 'ai 'akala ma mau?!”

¹⁹ Sababu gena-ge, na'o ngini ni sanga sangisara, sababu enanga gena-ge 'i mete'e Ma Jou'ongu Madutu 'ai 'akala ma mau, ngini balasu na sidoa'a ninga 'ahu ra Ma Jou'ongu Madutu ga'a sidadi ngini, Unanga gena-ge kama soloto ua 'Ai jaji. Re awa ngini ni matogumu ni 'a'a 'ori i'a ma la-la.