1 Petrus 3 - Jaji ma Su-sungi

Were'a re nau'u

¹ So'o gena ḏi'i ngini were'a-were'a: Ngini balasu ni ta'aloko taninga nau'u. Dadi na'o ninga nau'u 'aḏi ngaku nyangu Ma Jou'ongu Madutu 'ai demo, kalaha ngini ni sihabari ua ra ananga, ananga nyengara 'aḏi ngaku Habari Roanga mangale Kristus,

² sababu ananga ya oḏi'i ngini ninga de'oso re ḏegoro 'ofi-'ofi, re ngini ni sita'aloko ananga.

³ Awa pa'i ni sijumu ninga jamani reni tuhu ninga utu ma rousu bolo ni pake guraci bolo pakeanga ma ijana hali-hali. Gena-ge ngowa'a ya oḏi'i pa'i toma ḏuḏunu.

⁴ Mada'a ngini balasu ni sijumu ninga jamani mode-mode'e taninga nau'u reni sidodai ninga 'akala re sinyingara mereoso re kama 'oro mangale ua ga'a 'i baolo taninga 'akala re sinyingara ma dara. Jamani gena-ge kasingado-ngadolo i'a, re lai hali madutu ra Ma Jou'ongu Madutu 'ai momina.

⁵ De'oso re ḏegoro so'o gena-ge we-were'a ma siḏa moju ya si'a'a ḏua. We-were'a gena-ge manga 'ahu 'ofi-'ofi re raḏi ngaku mangale Ma Jou'ongu Madutu ḏuanga i'a 'o 'a'a 'oru, ga'a Ro sijaji ḏua. Ananga ḏi'i 'aḏi ta'aloko tamanga nau'u re sababu gena-ge ya sirousu manga diri.

⁶ Ngo Sara, Abraham 'ai were'a, mo 'a'a so'o gena ḏi'i. Munanga mo ta'aloko ra Abraham re mo 'aro'o unanga, 'ami tuanga. Na'o ngini ni mete'e ngo Sara 'ami de'oso re ḏegoro kama mojongo ua, ngini ma tero sa'olo ngo Sara 'ami ngowa-ngowa'a.

⁷ So'o gena ḏi'i ngini nau'u-nau'u: Ngini balasu ni 'ahu marimoi taninga were'a mete'e wo-waro so'o ne: Ananga manga de-de'e ma tero ua ra ngini ninga de-de'e re ḏi'i Ma Jou'ongu Madutu 'o pula'a 'ahu kasingado-ngadolo i'a ra ananga ma tero ngini. Sababu gena-ge, nau'u-nau'u ngini balasu ni silamo'o ninga were'a. Ngini balasu ni si'a'a so'o gena, la wakutu ngini ni manyiata ra Ma Jou'ongu Madutu ninga nyiata 'i sanga dola'aku ua.

Sangisara sababu wo madiga'a 'ori i'a ma la-la

⁸ Ma ḏo-ḏogumu tala, ngini balasu ni 'ahu ma'u 'aro'o la matengo re matengo reninga rorasa. Re balasu ni ma'u dadalara matengo re matengo, ma tero sa'olo ngowa'a gia nongoḏu 'aḏi ma'u dadalara, re ninga 'akala re sinyingara la-la re ni maholo ninga diri.

⁹ Na'o ngowa'a 'aḏi 'a'a cira ngini, awa ngini balasa 'a'a cira ananga, re na'o ngowa'a 'aḏi do-doana ngini, awa ngini balasa do-doana ananga. Siḏibo ḏi'i, ngini balasu ni golo'o Ma Jou'ongu Madutu 'o sibarakati ananga. Sababu Ma Jou'ongu Madutu 'aro'o ngini, la ngini ni sibarakati ngowa'a lelegu, la ngini ḏi'i ni sanga barakati ra Unanga gena-ge.

¹⁰ Sababu toma Boku 'Ofi-'Ofi 'i silefo so'o ne: “Na'o ngowa'a 'aḏi mau manga 'ahu lai rousu re sanangi, ngowa'a gena-ge balasu ya jaga manga 'uḏu, la 'aḏi kanau awa demo ma jira re 'aḏi matogumu sihaga ngowa'a.

¹¹ Ngowa'a gena-ge balasu 'aḏi matogumu 'a'a ḏosa re balasu 'aḏi 'a'a 'ori i'a ma la-la. Re ananga balasu 'aḏi disa mode-mode'e mangale 'ahu ma'u 'aro'o la matengo re matengo.

¹² Ma Jou'ongu Madutu 'o tailako ngowa'a ga'a mete'e Unanga 'ai mau re 'a dawongo ananga manga nyiata. Mada'a 'O lawana ngowa'a ga'a 'aḏi 'a'a 'ori i'a ma jira.”

¹³ Na'o ngini ni 'a'a 'ori i'a ma la-la tau-taunu, matengo i'a mai ua 'o 'a'a 'ori i'a ma jira ra ngini.

¹⁴ Mada'a na'o ngini ni sanga sangisara sababu ni 'a'a 'ori i'a ma la-la, Ma Jou'ongu Madutu 'o sibarakati ngini. Ngini ni mojongo awa 'a guna ḇato re ni dodato awa 'oru ḇato.

¹⁵ Mada'a taninga 'akala re sinyingara ma dara, ngini balasu ni ngaku re ni silamo'o Kristus, sa'olo ninga Jou. Na'o ngowa'a 'aḏi sano mangale ninga ngo-nganono, ngini balasu ni ḏu-ḏuanga ḏua na sitarangi ra ananga mangale ngo-nganono taninga 'akala re sinyingara ma dara. Mada'a ngini ni 'a'a mete'e 'akala re sinyingara mereoso re ni silamo'o ananga.

¹⁶ Sababu gena-ge, ngini ninga 'akala re sinyingara ma kanau 'i 'ofi-'ofi kama basono mara'a ua. Dadi na'o ngini ninga de'oso re ḏegoro lai rousu sababu ni marimoi ra Kristus mada'a ngowa'a nu'u fitana, ḏuanga i'a ananga gena-ge 'aḏi mara'a masiretene, sababu manga fitana 'i banari ua.

¹⁷ Jobilaha, na'o Ma Jou'ongu Madutu 'ai 'akala ma mau, ngene wo basono sangisara sababu wo madiga'a 'ori i'a ma la-la reo basono sangisara sababu wo madaga'a 'ori i'a ma jira.

¹⁸ Sababu kalaha Kristus kai ḏosa ua, Unanga ro basono sangisara. Unanga ro basono sengene soi moi di'a 'a doiti manusia nanga ḏosa. Unanga 'a si'a'a so'o gena, la ngene manusia nyengara wo marimoi ra Ma Jou'ongu Madutu. Manusia wo sisengene Unanga pa'i 'ai lese ḇato, mada'a sababu Ma Ngagara 'Ofi-'Ofi ma kuasa, Ma Jou'ongu Madutu dadunu 'o si'ahu Unanga moju.

¹⁹ Ma Jou Yesus 'o pake Ma Ngagara 'Ofi-'Ofi gena-ge di'a tagi re singadolo 'Ai Habari toma roh-roh ga'a singosama toma bui re 'i totoma enanga ma 'orasa di'a sanga hukumu.

²⁰ Roh-roh gena-ge toma ngowa-ngowa'a ga'a 'aḏi 'ahu-'ahu toma 'orasa Nuh. Ananga gena-ge 'aḏi mete'e ua Habari ra Ma Jou'ongu Madutu ino ga'a Nuh ya'u singadolo. Ma Jou'ongu Madutu 'o totoma rai 'akala ḇanyo, la ananga 'aḏi maḏibo toma ngo'omo boloto wakutu 'a Nuh 'o 'a'a kapala. Mada'a ngowa'a 'aḏi repe ua ga'a 'aḏi palene ra Nuh 'ai kapala, pa'i nga tu'angere ḇato. Re wakutu Ma Jou'ongu Madutu 'o sibere ḇanyo siromanga dungia sitabi donga, pa'i ananga ḇato 'aḏi sanga salamata. Dadi ananga 'aḏi sanga salamata sababu ma ḇanyo ga'a 'i romanga dungia sitabi donga gena-ge.

²¹ Dadi sibere ḇanyo sa'olo didina'o rimoi mangale ananga sanga salamata ra Ma Jou'ongu Madutu 'ai hukumu. So'o gena-ge ḏi'i, nange-ne baptis sa'olo nana'o rimoi mangale ngini ni sanga salamata Tai hukumu. Baptis gena-ge ma maksudu di'a si'ofi ua ninga lese, mada'a mangale ngini reni golo'o ra Ma Jou'ongu Madutu di'a si'ofi ninga 'akala re sinyingara ma kanau. Ḏua sababu Ma Jou'ongu Madutu dadunu 'o si'ahu moju Yesus Kristus, ngini nga'unu ni ngaku ninga 'akala re sinyingara ma dara ri 'ofi re reni sanga salamata.

²² Yesus Kristus gena-ge ro pere ḏua toma soroga re 'O tegoro ra Ma Jou'ongu Madutu 'Ai giama ma kuwiḏa i'a. Mala'ekata-mala'ekata 'aḏi ta'aloko ra Unanga re ḏi'i 'ori i'a mo-moini ga'a rema kuasa, mo-moini 'i ta'aloko ra Unanga.