1 Petrus 1 - Jaji ma Su-sungi

^1-2 Surata nena-ne ma 'asala ra ngoi 'a Petrus, 'a Yesus Kristus 'ai so-soma'a. Ioronongoḏu ngo-ngaku rimoi, ngini Ma Jou'ongu Madutu 'ai 'umata ga'a ni matai are re ni tegoro ma tero sa'olo ngowa-ngowa'a tagi-tagi ino toma daeraha Pontus, Galatia, Kapadokia, Asia re Bitinia. Ma Jou'ongu Madutu, nanga Ḇaḇa, 'o cumutu ngini ni dadi 'ai 'umata mete'e Unanga 'ai mau. Unanga 'o pake 'ai Ngagara 'Ofi-'Ofi di'a siwola i'a ngini ni dadi 'Ai 'umata, la ni mete'e mode-mode'e Ma Jou Yesus Kristus ga'a 'Ai ngaunu 'i si'ofi ngini. Ngoi to golo'o Ma Jou'ongu Madutu 'o pula'a mura re dadalara re pula'a ḏi'i dame lamo-lamo'o ra ngini.

Masinganono mode-mode'e

³ Ino ngene wo puji re silamo'o Ma Jou'ongu Madutu, Yesus Kristus nanga Jou 'ai Ḇaḇa. Sababu Unanga 'o sijumu 'Ai 'akala re sinyingara ma la-la ra ngene, singadolo 'O pula'a 'ahu su-sungi ra ngene. Gena-ge 'i nyengara, sababu Yesus Kristus ro sengene, mada'a dadunu 'o 'ahu moju. Sababu gena-ge nanga ngo-nganono 'i dadi de-de'e rimoi.

⁴ Sababu ngene renanga ngo-nganono mode-mode'e, ngene wa waro mangale ngene ḏuanga i'a wo sanga warisi ga'a Ma Jou'ongu Madutu ra sidodahe di'a 'Ai 'umata toma soroga. Warisi gena-ge kama iranga ua, enanga 'i 'ofi-'ofi kama sorumu ua sababu warisi gena-ge ma ngi'i da'u toma soroga.

⁵ Warisi gena-ge di'a ngini mo-moini, sababu ngini reni ngaku Ma Jou'ongu Madutu. Sababu gena-ge Unanga 'o saolo ngini Rai kuasa, singadolo Kiamata ma Wangere 'i ngadolo. Toma 'orasa gena-ge, ngini ni sanga salamata ga'a Ma Jou'ongu Madutu 'a ḏu-ḏuanga ḏua di'a ngini.

⁶ Sababu ngo-nganono gena-ge, ngini ni maroanga masala. Kalaha nange-ne ngini ni basono 'akala re sinyingara kangela sababu ni sanga dola'aku re bo-baja fara muḏuo i'a, mada'a 'i ti'ara ua.

⁷ Ngini ni sanga dola'aku re bo-baja so'o gena, di'a disa waro ninga ngo-ngaku 'i mode-mode'e, bolo ua. Ngini ninga ngo-ngaku ma ijana lebe hali reo guraci, sababu toma wakutu rimoi 'o guraci enanga ḏuanga i'a 'i wejere. Na'o ngini ni disa waro guraci 'i mode-mode'e bolo ua, balasu ni pake u'u. So'o gena ḏi'i, na'o ngini ni disa waro ngini ninga ngo-ngaku 'i mode-mode'e bolo ua, balasu ni sanga dola'aku re bo-baja. Na'o ninga ngo-ngaku 'i mode-mode'e, Ma Jou'ongu Madutu ḏuanga i'a 'o sitoro, simulia re silamo'o ngini wakutu Yesus Kristus dadunu 'o sapolo moju re 'O masijumu toma ngowa'a mo-moini.

⁸ Kalaha ngini oḏi'i nyangu, ngini ni dadalara Unanga. Re kalaha ngini ni oḏi'i Unanga ua, ngini ni ngaku Unanga. Enanga gena-ge 'i si'a'a ngini ninga 'akala re sinyingara 'i maroanga ma pari cua,

⁹ sababu Ma Jou'ongu Madutu 'o sisalamata ngini. Gena-ge 'i dadi, sababu ngini ni ngaku mode-mode'e ra Kristus.

¹⁰ Mangale salamata gena-ge. Nabi-nabi raḏi lefo pasala ḏua mangale cocatu gena-ge ga'a Ma Jou'ongu Madutu ḏuanga i'a 'o pula'a ra ngini. Ananga gena-ge 'aḏi madoto'o mode-mode'e di'a disa waro mo-moini mangale salamata gena-ge, la ya sahe.

¹¹ Nabi-nabi gena-ge mau 'aḏi disa waro ngau re ma duhu sa'olo salamata gena-ge 'i dadi. Tamanga 'ahu matengo re matengo, Ma Ngagara 'Ofi-'Ofi ra Kristus 'i siajele ḏua mangale 'O Kristus: Ma duhu sa'olo Unanga ḏuanga i'a 'o basono sangisara re sikisa, mada'a togumu i'a Unanga ḏuanga i'a 'o sanga mulia.

¹² Ma Jou'ongu Madutu ro sijumu toma nabi-nabi mangale salamata ra Kristus gena-ge di'a ananga toma 'orasa gena-ge ua, mada'a di'a ngini 'orasa nange-ne. Sababu gena-ge Ma Jou'ongu Madutu 'o siḏingoto Ma Ngagara 'Ofi-'Ofi da'u soroga tala di'a sinyanyasele ngowa-ngowa'a ga'a singadolo Habari Roanga ra ngini mangale salamata ra Kristus, la ngini ni sanga salamata. Mala'ekata-mala'ekata mai ya nyafusu ḏi'i mau ya sahe mangale salamata ra Kristus gena-ge.

Mete'e 'ahu 'ofi-'ofi ma ngo'omo

¹³ Sababu gena-ge, ngini balasu ninga 'akala re sinyingara 'i ḏu-ḏuanga ḏua di'a ni mete'e Ma Jou'ongu Madutu 'ai demo. Ni ma'istiari ninga 'ahu re ni masinganono pa'i ra Ma Jou'ongu Madutu 'ai barakati ḇato ga'a Unanga ḏuanga i'a 'o pula'a ra ngini wakutu Yesus Kristus dadunu 'o sapolo re masijumu 'ai diri.

¹⁴ Sa'olo Ma Jou'ongu Madutu 'ai ngowa-ngowa'a, ngini ninga 'ahu balasu mete'e Unanga 'ai mau. Wakutu ngini nana'o nyangu Ma Jou'ongu Madutu, ninga nyafusu ma jira lai repe, mada'a nange-ne ngini ni sieanga ḏua. Awa nyafusu-nyafusu ma jira gena-ge 'i parenta ninga 'ahu moju.

¹⁵ Siḏibo ḏi'i, ngini ninga de'oso re ḏegoro mo-moini balasu 'i 'ofi-'ofi, ma tero sa'olo Unanga ga'a 'O 'Ofi-'Ofi. Unanga masiretene gena-ge 'O cumutu ngini di'a ni dadi 'Ai ngowa-ngowa'a.

¹⁶ Toma Boku 'Ofi-'Ofi ma dara 'i silefo so'o ne: “Ngini balasu ni 'ofi-'ofi, sababu Ngoi to 'Ofi-'Ofi.”

¹⁷ Wakutu ngini ni manyiata ra Ma Jou'ongu Madutu, ngini terongo Unanga ninga Ḇaḇa. Mada'a balasu ni 'elingi Unanga gena-ge 'o pa'ala kaci moi ua! Unanga masiretene 'a sitantukanga hukumu 'oru mete'e ananga manga ga'a matengo re matengo. Sababu gena-ge, ngini balasu ni silamo'o re mojongo Ma Jou'ongu Madutu wakutu ni 'ahu-'ahu toma dungia moju, ma tero sa'olo ngowa'a tagi-tagi ino 'aḏi tegoro toma ngowa'a lelegu manga nagara.

¹⁸ Ninga 'ahu balasu 'i 'ofi-'ofi sababu ngini ni waro ḏua ma duhu sa'olo Ma Jou'ongu Madutu ro sibebasa ngini toma 'ahu ma faeda 'i cua, ga'a ninga ete re dotumu sisoi'i tala ra ngini. Ma Jou'ongu Madutu 'o tuusu ngini reo guraci re salaka ua. Enanga gena-ge 'i tahana kasingado-ngadolo i'a ua.

¹⁹ Mada'a Kristus 'a fangu rai ngaunu masiretene. Enanga gena-ge lai hali ma pari cua. Unanga gena-ge 'o dadi ma tero sa'olo 'o doba ma ngowa, kama faja ceka'a i'a mai ua, sa'olo jou-jou di'a ngini.

²⁰ Wakutu dungia ne 'i dadi nyangu, Ma Jou'ongu Madutu 'o cumutu Kristus di'a 'O sibebasa ngini. Mada'a Unanga ro sapolo toma 'orasa nena-ne wakutu Kiamata ma Wangere sa'i ri ngadolo.

²¹ Sababu Kristus 'ai ga'a di'a ngini, ngini ni ngaku ra Ma Jou'ongu Madutu ga'a dadunu 'O si'ahu moju Kristus gena-ge toma ngowa'a senge-sengene manga sigolona re 'U simulia Unanga ḏi'i. Sababu gena-ge, ngini ni nganono re ni ngaku ra Ma Jou'ongu Madutu, mangale Unanga ḏuanga i'a 'o sisalamata ngini ḏi'i.

²² Dadi nange-ne ngini ninga 'akala re sinyingara 'i dadi 'ofi-'ofi, sababu ngini ni mete'e Ma Jou'ongu Madutu 'ai do-doto'o banari singadolo mode-mode'e ngini ma'u dadalara ninga ioronongoḏu ngo-ngaku rimoi. Kalaha so'o gena, ngoi to pula'a duga re domolo moju, ngini balasu ni ma'u dadalara reo 'akala re sinyingara mode-mode'e,

²³ sababu ngini dadunu reni sibuoro moju. Ngini reni sanga 'ahu su-sungi taninga ḇaḇa re ngina ua ga'a basono sengene, mada'a ra Unanga ga'a kama sengene ua. Gena-ge 'i dadi sababu ngini ni ngaku Ma Jou'ongu Madutu 'ai demo ga'a 'i 'ahu re 'i tahana kasingado-ngadolo i'a

²⁴ Toma Boku 'Ofi-'Ofi 'i silefo so'o ne: “Ngowa'a toma dungia mo-moini ma tero sa'olo rurubu re ngowa'a manga kabasarana mo-moini ma tero sa'olo saya-saya; Rurubu 'i wa'alo, ma saya-saya 'i matai turono.

²⁵ Mada'a Ma Jou'ongu Madutu 'ai demo, kama iranga ua kasingado-ngadolo i'a.” Demo gena-ge Habari Roanga ga'a ri singadolo ra ngini.