1 Korintus 9 - Jaji ma Su-sungi

Yesus 'ai so-soma'a manga haku

¹ Ngoi nyengara to mete'e 'ari mau bolo ua?! Ngoi Ma Jou Yesus 'ai so-soma'a bolo ua?! Ngoi masiretene to oḏi'i Yesus nanga Jou bolo ua?! Ngini 'ari galasau'u ma duduala ma hasili sababu Ma Jou'ongu Madutu 'o pake ngoi bolo ua?!

² Kalaha 'age mamuni'a ga'a 'aḏi dawongo ua ngoi sa'olo Yesus 'ai so-soma'a; ngini so'o gena ua. Sababu ngini ni ngaku Yesus wakutu ngoi masiretene to singadolo Habari Roanga ra ngini, la ngini ni ngaku. Sababu gena-ge ngini ni dadi bukiti rimoi mangale ngoi Yesus 'ai so-soma'a.

³ Na'o 'age rema ngowa'a 'aḏi sijuruhakimi ngoi, ngoi ta sangoro so'o ne:

⁴ Na'o Barnabas re ngoi, ngomi mi dawongo minga ngo-ngoromo re mi ka'e sababu ngomi mi munara di'a Ma Jou'ongu Madutu, enanga gena-ge sala bolo ua?!

⁵ Na'o ngomi mi gasa minga were'a ga'a ngowa'a ngaku Yesus taminga ḏo-ḏagi ma dara ma tero sa'olo Ma Jou Yesus 'ai no-nongoḏu, re Petrus re Yesus 'ai so-soma'a ma lelegu ḏi'i, enanga gena-ge sala bolo ua?!

⁶ Bolo balasu pa'i 'a Barnabas re ngoi ḇato ga'a balasu mi disa minga ngo-ngoromo masiretene!

⁷ Sanga ua, sordado matengo tagi ma'u parangi re unanga masiretene 'o disa 'ai ngo-ngoromo! Sanga ua, ngowa'a matengo so'ana 'anggur tamanga guḏa, mada'a ḏuanga i'a 'a oromo ua ma sowo'o! Sanga ua, ngowa'a matengo haiwani ma sowohi ḏuanga i'a 'a ka'e ua manga doba ma susu ga'a unanga 'a jaga lobi'i re wangere!

⁸ Ngoi to kanau so'o gena-ge sababu pa'i mete'e manusia nanga fikirana ḇato ua, mada'a sababu 'age ma tero 'i silefo ra Musa 'ai hukumu.

⁹ Ra Musa 'ai hukumu 'i silefo so'o ne: “Sapi ga'a sipake ruju gandum, awa na sao ma madanga.” Sanga ua, Ma Jou'ongu Madutu 'ai maksudu di'a pa'i sapi ḇato!

¹⁰ Tantu ḏua, 'Ai maksudu di'a ngene manusia! Demo-demo gena-ge 'i silefo di'a ngene sababu bae ngowa'a 'aḏi 'a'a guḏa re ngowa'a ga'a 'aḏi si'ofi gandum, ananga 'aḏi masinganono ḏuanga i'a ya sanga manga balangu toma guḏa ma hasili gena-ge.

¹¹ Ngomi remi soana 'ori i'a ma la-la ga'a ma 'asala toma Ngagara 'Ofi-'Ofi ino ra ngini ninga 'akala re sinyingara ma dara. Dadi na'o ngomi mi dawongo ngo-ngoromo re ka'e ra ngini ma tero sa'olo balangu ma hasili; sanga ua, gena-ge 'i 'adili ua!

¹² Na'o ngowa'a lelegu 'aḏi singadolo Habari Roanga ra ngini re ananga manga haku di'a sanga 'ori i'a ra ngini ino, tantu ḏua ngomi minga haku lebe lamo'o i'a di'a mi sanga 'ori i'a i'a ra ngini ino sababu ngomi mi singadolo siḏa Habari Roanga ra ngini! Kalaha ngomi sanga haku gena-ge, ngomi ma pake ua! Siḏibo ḏi'i, ngomi lebe mi nyanyaḏi mi basono tahana kangela mo-moini, reo ngomi mi dola'aku ngini di'a ni ngaku Habari Roanga ra Kristus ino, sababu ngomi remi golo'o ma ngogele.

¹³ Ngini ni waro bolo ua, mangale ngowa'a ga'a 'aḏi munara ra Ma Jou'ongu Madutu 'ai Wala, ananga sanga oromo toma ngi'i gena-ge?! Re ḏi'i ngowa'a ga'a 'uru-'urusu jou-jou ma kalero, ananga sanga balangu toma jou-jou ga'a ngowa'a 'aḏi pula'a.

¹⁴ So'o gena-ge ḏi'i, Ma Jou Yesus masiretene 'o parenta mangale ngowa'a ga'a 'aḏi singadolo Habari Roanga, ananga balasu sanga oromo tamanga ioronongoḏu ngo-ngaku rimoi ga'a manga munara gena-ge ma hasili.

¹⁵ Mada'a soi moi nyangu, ngoi to pake 'ari haku gena-ge di'a to golo'o 'oru ḇato ra ngini. Re ngoi to lefo surata nena-ne ma maksudu so'o gena ua, la ngini ni pula'a ngogele ra ngoi. Jobilaha, ngoi to sengene, reo matengo i'a 'o singiranga 'ari haku di'a to sanangi masala ga'a ngoi to golo'o ua 'oru ḇato ra ngini!

¹⁶ Mada'a wakutu ngoi to singadolo Habari Roanga, ngoi to matoro yoḏu'u sababu Ma Jou'ongu Madutu 'o soma'a di'a ta si'a'a so'o gena-ge. Na'o ta si'a'a ua, ḏuanga i'a ngoi to sanga hukumu.

¹⁷ Na'o munara ga'a ngoi ta si'a'a gena-ge sababu ngoi 'ari mau masiretene; tantu ḏua ta sanga enanga ma ngogele. Mada'a Habari Roanga ga'a ngoi ta singadolo gena-ge, ngoi 'ari tugasa ta si'a'a munara gena-ge sababu Ma Jou'ongu Madutu ro siwatasa ra ngoi.

¹⁸ Na'o so'o gena, 'oru 'ari munara ma ngogele? Nena-ne pa'i ngoi 'ari ngogele ḇato: Ngoi ta singadolo Habari Roanga kama ngogele ua! Dadi ngoi to pake ua haku gena-ge di'a to golo'o 'ori i'a i'a ra ngini, la ngoi to 'a'a dola'aku rimoi i'a mai ua di'a ngini ni dawongo Habari Roanga gena-ge.

¹⁹ Ngoi to dadi budaka ra guna ḇato ua: ngoi ngowa'a bebasa! Kalaha so'o gena-ge, ngoi to mete'e ngowa'a mo-moini manga mau. Dadi ngoi ma tero sa'olo budaka toma ngowa'a mo-moini, la ngowa'a ḏuanga i'a lebe dogo 'aḏi sanga salamata:

²⁰ Dadi toma ngowa'a Yahudi manga biono, ngoi to 'a'a diri ma tero sa'olo ngowa'a Yahudi, la ananga 'aḏi mete'e re 'aḏi ngaku Kristus. Kalaha Musa 'ai hukumu 'i piri'u ngoi ua, toma ngowa'a ga'a 'aḏi mete'e re macako'o namo-namoto ra Musa 'ai hukumu manga biono, ngoi to 'a'a diri ma tero sa'olo ananga ḏi'i, la nga'unu ta'u gasa ananga ra Kristus.

²¹ Toma ngowa'a Yahudi ua manga biono, ngoi to 'a'a diri ma tero sa'olo ngowa'a Yahudi ua, ga'a 'ahu mete'e ua 'a Musa 'ai hukumu, la nga'unu ta'u sigasa ananga gena-ge ra Kristus. (Mada'a 'ari maksudu ua: Ngoi to mete'e Ma Jou'ongu Madutu 'ai hukumu ua. Momongolo ua, ngoi to mete'e mode-mode'e Kristus 'ai Hukumu.)

²² Wakutu ngoi 'age ra ananga ga'a manga ngo-ngaku 'i te'e nyangu manga sigolona, ngoi ta 'a'a ua 'ori i'a ga'a ananga ya fikiri 'i sala, la ngoi nga'unu ta'u sigasa ananga manga ngo-ngaku lebe te'e. Ngoi to 'a'a diri ma tero sa'olo 'a guna ḇato, dadi reo duhu 'oru ḇato ngoi ta'u sigasa ananga mamuni'a toma salamata.

²³ Ngoi to si'a'a mo-moini gena-ge, dadi nga'unu ngowa'a lebe dogo 'aḏi ngaku Habari Roanga, la ngoi ḏi'i sanga bara'utungu mamete'e ra ananga gena-ge.

²⁴ Ngini ni waro bolo ua, mangale ngowa'a 'aḏi marerebe lalara, ngowa'a mo-moini 'aḏi lalara, mada'a pa'i matengo ḇato sanga nomoro?! Sababu gena-ge, ngini ninga de'oso re ḏegoro balasu ma tero sa'olo ngowa'a ga'a lalara makutale mode-mode'e di'a sanga nomoro.

²⁵ 'A guna ḇato na'o 'o mau mete'e tandingi, ngowa'a gena-ge balasu 'o manahana 'ai diri toma 'ori i'a mo-moini. Unanga 'o 'a'a so'o gena-ge sababu, kalaha lastari saya-saya ti'ara ua 'i wa'alo, unanga 'o nyafusu sanga lastari saya-saya siteru tai sae'e. Mada'a ngene wo manahana diri toma 'ori i'a mo-moini, sababu ngene wo nyafusu nanga sae'e 'i siteru lastari saya-saya gena-ge kama wa'alo ua nena-ne re si'a.

²⁶ Sababu gena-ge, ngoi to lalara enanga rema maksudu di'a sanga nomoro ma tero sa'olo tandingi ma'u tutu'u, ngoi to tutu'u sabaranga ua.

²⁷ Ngoi ma tero sa'olo matengo 'o tutu'u 'ai diri, la 'ai lese 'i dadi ma tero sa'olo 'ai budaka. Ngoi to 'a'a so'o gena-ge, awa-awa nena-ne 'i dadi ra ngoi: Ngoi reto singadolo Habari Roanga toma ngowa-ngowa'a lelegu, ḏuanga i'a Ma Jou'ongu Madutu 'o siteru ua tari sae'e rema lastari saya-saya kama wa'alo ua nena-ne re si'a.